Ntơm rnôk ndâk năm 1977 tât rnôk aơ, geh nau kơl an bah ăp gưl uỷ, n’gâng kan ăp gưl ndrel ƀon lan tâm nkuăl, Ngih săm ƀŭt THPT Phạm Hùng hŏ rlet nau jêr, tâm rnglăp, nsôih rlet rlau, tâm rlong ntĭm nti ueh, geh dơi ăp nau geh kơp dơn. Rnôk aơ đah 40 jrâu nti, rnoh kon se nti lah 1.571 kon se.

            Ntoh măt rđau kan Đảng, Ngih dak, Kruanh Quốc hội Trần Thanh Mẫn ntoh nau rhơn bah năp nau tă geh bah ngih săm ƀŭt tâm rơh rlau aơ rnơm nau nsôih bah ăp kơn nai ntĭm ndrel kon se nti, nkre rnê n’gâng kan ntĭm nti n’gor Vĩnh Long lah ntŭk ang bah nkuăl Đồng bằng sông Cửu Long lah êng, bah nkuăl Nam Bộ ndrel lam dak lah nsum.

            Kruanh Quốc hội Trần Thanh Mẫn lah rjăp, Đảng ndrel Ngih dak nơm mro năl nau kan ntĭm nti lah nau tơm, ntuh kơl ân ntĭm nti lah ntuh kơl ân hun hao, dŏng ăp nau ueh ngăn gay kơl an nau kan ntĭm nti, đăp mpăn kon se tâm rnôk năm nti kŏ geh hăn nti, ăp kon se geh ntĭm nti ueh ngăn; rgum ntĭm nti ân geh nau blau nâp, ngoai tâm ăp nau khlay ƀư jêng nau dơi bah nau rêh kon nŭih ndrel nau hun hao ngăch, nâp nâl bah neh dak, lah rjăp nau nsôih ntul rlong ndrel nau dăng bah neh dak tâm nkuăl ndrel lam ntur neh.

            Kruanh Quốc hội Trần Thanh Mẫn ân lah, du năm nti mhe ntơm tât đah âk nau rhơn ndrel ntul rlong mhe; ntrong 3 năm ntĭm nti Phổ thông geh nau khlay, nkah nau têh jêng mpeh ăp ding bah kon se. Ndri ma, Kruanh Quốc hôi ŭch ăp kon se mra geh nau rhơn, nsôih tâm nau ntĭm nti; mô rlu nsôih, nsôih chiăr nti tĭng nau ang bah Wa Hồ, nŭih leo trong bah drâu Wa Phạm Hùng ƀon tơm Vĩnh Long; tâm rnglăp, tâm rŏng, tâm kơl ndrel geh nau dơi; nchrăp tŏng nau kan, nau blau, rƀŏng trong, đah ăp nau kan têh gay trong kan ndâk nau rêh êp tât, plŏ kơl an nuih n’hâm deh jêng bah me mbŏ, nau kơl ntĭm nti bah nai ntĭm nti.

            Kruanh Quốc hội Trần Thanh Mẫn đă ăp nai ntĭm nti kon se ‘lah nŭih leo trong mpeh nau rêh, nau nsôih nti ndrel nau blau”; mro gơih ma nau kan, lôch n’hâm ŭch rŏng, ntĭm nti ân kon se; “Nai ntĭm kơt me mbŏ”, ngăn lah lah nŭih kơl ndâk nau blau, nau nsôih ân kon se gơih nti, nchiăr nti nau rêh, joi ăp nau mhe blau.

            ‘Gâp rnơm lah rmôt nŭih cán bộ, nai ntĭm, ăp kon se bah ngih săm ƀŭt ngăn ngên ƀư ueh nau ntĭm nti bah Tổng Bí thư, Kruanh dak Tô Lâm tâm n’ha săm ƀŭt njoăl ntŭk kan ntĭm nti di rnôk lăp năm nti mhe; mô rlu nau rgâl mhe, n’hao nau nâp ntĭm ndrel nti, ndâk nau ntĭm nti ngăn ngên geh âk ntil nau ueh geh ơm bah nkuăl neh geh nau dơi, ntoh lư Long Hồ, Vĩnh Long; rgop nau ueh ngăn tâm nau kan ‘n’hao nau blau, ntĭm nti nŭih, ntĭm nti nau blau”, tâm di đah ngih săm ƀŭt geh moh săk Kruanh Hội đồng Bộ trưởng Phạm Hùng. Năm nti 2024-2025, bôk nau kan ntĭm nti năm 2018 mra geh ƀư, lah năm nti ƀư rơh thi tốt nghiệp THPT tĭng nau kan mhe. Gâp đă N’gâng kan ntĭm nti lŏ rđau, ƀư ân ueh nau kan ntĭm nti phổ thông mhe, ơm ƀư ân jêh nau kan ntĭm nti, mbơh mpeh rơh tâm rlong, pơk trong ueh ngăn ân ăp kon se ndrel rnăk vâl”.

            Kruanh Quốc hội Trần Thanh Mẫn đă ăp gưl uỷ đảng, n’gâng kan, Mặt trận Tổ quốc, ăp rmôt kan, ăp gưl, ăp ntŭk kan bah n’gor Vĩnh Long ndrel nkuăl Long Hồ lŏ kơl an, ntĭm rđau đăp mpăn tŏng nau dơi mpeh ntŭk ntu ƀư kan ndrel tơm prăk kơl an nau kan ntĭm ntil mât chăm, hun hao nŭih nai ntĭm nti ndrel cán bộ mât nau kan ntĭm nti tŏng nŭih nai ntĭm tĭng rnoh ntrŭnh đă; rgâl ngăn rjăp nau kan ntĭm ndrel nti, n’hao nau nâp nau kan ntĭm nti ăp ntŭk, ăp gưl nti, ntrŭt dăng nau kan ndâk njêng nau gơih nti, n’hao nau tâm rgop đah rnăk vâl, ngih săm ƀŭt ndrel ntŭk rêh jêng tâm nau kan ntĭm nti./.