Ntoh nau tâm nar pah kan, Kruanh Quốc hội Trần Thanh Mẫn mbơh, ân tât rnôk aơ, Quốc hội hŏ ƀư âk nau kan têh, nê lah nau ƀư 14 rơh rƀŭn, tâm nê geh rơh rƀŭn nâm ơm ndrel ndal. Nau ƀư nau nchrăp kan bah Đảng đoàn Quốc hội, Nau ntrŭnh Đại hội lam dak tal 13, nau rgum mrô 19 bah Bộ Chính trị mpeh nau rƀŏng bôk nau kan ndâk njêng pháp luật năm kan Quốc jội gưl 15 geh nau dơi ân geh kơp dơn. Ngăn lah, tâm 156 nau kan ndâk pháp luật ri hŏ jêh 131 nau kan. Ăp bôk nau kan, nau nchrăp bah Đảng đoàn Quốc hội hŏ geh ƀư rlau 81%. Nau geh jêh rơh rƀŭn bah kơi prêh lơn rơh rƀŭn bah năp, geh cử tri ndrel ƀon lan rnê prêh.

            Tĭng Kruanh Quốc hội Trần Thanh Mẫn, rơh rƀŭn aơ gay nchră ăp nau tă geh dơi ƀư, nkre mêt uănh ăp nau ê dơi ƀư, nau hôm kol, ân geh rhuăt nau tă blau dơi gay ƀư ân ueh lơn.

            Mbơh, tâm rơh hôm e, Quốc hội mra ƀư 3 rơh rbŭn ndrel du rơh rƀŭn ncgră lôch nau kan bah Quốc hội gưl 15, Kruanh Quốc hội Trần Than Mẫn mbơh, aơ lah rnoh nau kan têh. Ndri ma, Kruanh Quốc hội đă, Hội đồng Dân tộc, ăp Uỷ ban bah Quốc hội ân ƀư ueh ngăn gay geh ăp nau dơi. Ngăn lah năm 2025, neh dak nơm mra geh âk nau kan têh, kơt: Nkah gĭt 80 năm cách mạng khay 8 ndrel Quốc khánh 2/9; 50 năm rklaih miền Nam đăp mpăn neh dak, nau nchrăp ân săch nŭih kan ntoh măt Quốc hội gưl 16 ndrel HĐND ăp gưl năm kan 2026-2031. Năm 2026, Quốc hội nkah 80 năm nar săch kan Quốc hội Việt Nam.

            Tâm rơh pah kan, Kruanh ăp Uỷ ban Văn hoá, ntĭm nti; Uỷ ban xã hội; Ban nau kan ntoh măt hŏ mbơh nau tă geh dơi ƀư bah nau kan, nau ƀư ntơm bôk năm kan Quốc hội gưl 15 tât rnôk aơ ndrel nau nchrăp, rƀŏng, nau kan tơm tât lôch năm kan.

            Jêh rnôk djăt ăp nau rgop mbơh nau, lôch nau tâm nar rƀŭn, Kruanh Quốc hội Trần Thanh Mẫn rnê prêh ăp nau tă geh dơi bư bah ăp uỷ ban. Tâm nê, Uỷ ban Xã hội hŏ ƀư jêh 10 nau kan; Uỷ ban Văn hoá, ntĭm nti ƀư jêh 6 nau kan, Ban công tác ntoh măt ƀư jêh 10 nau kan. Mpeh nau ndâk pháp luật, Uỷ ban Xã hội ƀư jêh 25 nau kan, Uỷ ban Văn hoá, ntĭm nti ƀư jêh 14 nau kan; Ban nau kan ntoh măt ƀư jêh 4 nau kan.

            Kruanh Quốc hội kŏ ân lah, bol ma geh dơi ăp nau kan ueh, bol ma hôm âk nau ê dơi tâm nau tâm rgop kan, ndâk nau nchrăp kan ê tâm dăch ma nau ngăn, nau ntrŭnh ê năn, khoa học.

            Kruanh Quốc hội Trần Thanh Mẫn, đă, ăp Uỷ ban, Ban nau kan ntoh măt ân geh ƀư rjăp lơn gay rklaih ăp nau hôm kol, đăp mpăn nau tâm rnglăp tâm ban tâm ntrong kan, n’hao nau mât mpôn nau geh dơi, nau ƀư rnôk ntoh nau ngơi:

            ‘Gâp đă ân rgum rgâl ntrong pah kan bah Hội đồng Dân tộc, ăp uỷ ban bah Quốc hội, dăp rgum nau kan khoa học, moh nau kan khlay, tơm gay ma nsŭn n’hâm ƀư, ntrơn jao nkô̆ nau ndâk nau nchrăp bah rơh rƀŭn tal 8, tâm rgop ƀư rơh rƀŭn ntoh măt Quốc hội ƀư nau kan tal 6; lŏ mĭn njêng, mbơh, djăt, rgâl ăp nau nchrăp luật, nau ntrŭnh hŏ geh Quốc hội rgop nau tâm rơh rƀŭn tal 7 gay mbơh nchră tâm rơh rƀŭn tal 8”.

            Êp nê, Kruanh Quốc hội kŏ đă ăp Uỷ ban bah Quốc hội tâm grop nsum mêt uănh Chính phủ tâm nau ntrŭnh ƀư ăp luật, nau ntrŭnh hŏ geh Quốc hội nchră tâm ăp rơh rƀŭn, nau kan mêt uănh ân geh nau nchrăp ƀư tă bah ơm gay der nau tâm rkăng tâm ăp nkuăl, lŏ ƀư ăp nau kan tĭng ntrong kan Bôk nau kan ƀư nkah gĭt 80 năm Nar săch kan bôk năp bah Quốc hội Việt Nam, nau nkhôm báo chí Diên Hồng tal 3, kơp uănh nau rgâl mhe nau kan, nau ƀư tĭng trong nar lơn ma khoa học, ngăn, blau ngăn, săk tam; ngăn lah ntrŭnh ƀư ueh nau kan pă prăk khay mhe ntơm khay 7 năm 2024, n’hao nau kan mât nâp chính trị ntŭk kan./.