Mhe aơ, Kruanh Quốc hội Vương Đình Huệ hŏ khâl, mbah rhơn Tết ăp rnăk dơi kơl, nuĭh geh n’hâm suan, cán bộ, tahen, rnăk ach o, nuĭh ji khêh dak si dioxin, công nhân, nuĭh kan geh nău rêh jêr jŏt ta n’gor Gia Lai n’hanh njuăl 300 nklâm ndơ Tết an n’gor Dak Lak.

Ta Gia Lai, Kruanh Quốc hội Vương Đình Huệ rnê âk nkual hŏ nsrôih hun hao wăng sa- rêh jêng kon nuĭh, n’hao nău rêh nuih n’hâm n’hanh drăp ndơ an nuĭh ƀon lan. Lơn lah, tâm trong kan văn hóa – rêh jêng kon nuĭh geh âk nău rgâl, ntik n’hao uĕh ăp rnoh khlay văn hóa săk ntơr êng bah ăp rnoi nuĭh n’gor Gia Lai; săk blău ntĭm nti, dak si dơi n’hao prêh. Ăp bôk nău kan đăp mpăn rêh jêng kon nuĭh, jut jăng ji ngot, hŭch ach o,  nta joi nău kan dơi uănh khlay an ƀư ăp kôp; rnoh rnăk ach o hôm 8,11%. Rgum rđău đă ăp gưl, ăp n’gâng kan, ăp n’gor tĭng ƀư jăp trong kơl đăp mpăn lam rêh jêng kon nuĭh,  mât chăm an ƀon lan tâm rnôk Tết, đăp mpăn ăp rnăk, ăp nuĭh dơi rhơn năm mhe, wơt Tết. Aơ lah nău nsrôih dŭt di ma nchih nkah bah n’gor.

Kruanh Quốc hội mĭn lah đŏng, tă khuch bah nuh srê Covid-19, aƀaơ nha hôm âk rnăk dŭt jêr jŏt, công nhân nuĭh kan geh ntŭk mô geh nău kan. Ta năp nău ngăn geh dja, Đảng, ngih dak he hŏ dŭt uănh khlay tât nuĭh ƀon lan ma trong n’gluh an dŏng ăp trong kơl gay nta dŭt uĕh. Lơn lah Ban bí thư hŏ n’gluh an dŏng nău ntrŭnh mbrô 26 mpeh mât chăm Tết an nuĭh ach o.

“Rgop đêt jêng âk, nuih n’hâm “Yô̆ rŏng nuĭh tâm ban kơt yô̆ rŏng săk nơm” bah rnoi nuĭh Việt Nam dŭt di ma uănh khlay lam ntŭr neh n’hanh lah nău kan way ƀư mbro,  lơn lah tâm rnôk Tết tât năm mhe sĭt. Yor Tết lah dŭt khlay, mô geh ndơ ban Tết. ăp  kruanh rđău kan  Đảng, Ngih dak ŭch geh ndơ dŭt uĕh da dê gay an ăp nuĭh, ăp rnăk, lĕ dĭng nuĭh geh ndơ rhơn năm mhe, wơt Tết da dê. Mpôl hên rnê dŭt âk n’hanh lơn lah mpư rnê Đảng bộ n’gâng kan, lam trong kan chính trị n’gor Gia Lai bol tơm ndơ hôm jêr jŏt, lah n’gor ach o,  yơn hŏ  way mât uănh khlay mât chăm n’hanh dŭt uănh khlay pah kan dja. Mpôl  hên dăn đă, lam trong kan chính trị he hŏ uănh khlay hôm uănh khlay  tay lơn đŏng, ndrel đah mpôl doanh nghiệp ăp nuĭh lŏng nuih n’hâm kơl an ƀon lan n’hanh trong ƀư dŭt uĕh lah hun hao ƀư njêng tăch rgâl mhâm ƀư gay an kônh wa geh ndơ ma klaih rlău ach o. Mât uănh n’hao âk tay mpeh rnoh nuĭh rgop bảo hiểm xã hội, bảo hiểm y tế.

Nkhêp geh rnôk dja, Kruanh Quốc hội Vương Đình Huệ n’hanh mpôl pah kan hŏ kơl an 400 nklâm ndơ an ăp rnăk dơi kơl, nuĭh geh n’hâm suan, cán bộ, tahen, rnăk ach o, nuĭh ji khêh dak si dioxin, công nhân, nuĭh kan geh nău rêh jêr jŏt ta n’gor; rgum tơm ndơ kơl ƀư an 200 mblâm jay tâm rnglăp, rnoh khlay 10 rmen prăk an Mặt trận Tổ quốc n’gor Gia Lai. Tâm rnôk hăn khâl n’hanh pah kan ta Gia Lai, Kruanh Quốc hội Vương Đình Huệ hŏ uănh saơ Ngân hàng TMCP Công thương Việt Nam (Vietinbank) ndơ̆ kơl 10 rmen prăk an n’gor Gia Lai gay ntop kơl rdâk njêng  nhih pah kan Công an xã n’har bri đŏng.

Nkhêp geh hăn pah kan ta nkual Tây Nguyên đŏng, Kruanh Quốc hội Vương Đình Huệ hŏ nsing an wa Bùi Văn Cường, Tổng thư ký, Chủ nhiệm Văn phòng Quốc hội, njuăl 300 nklâm ndơ Tết an n’gor Dak Lak. Tĭng nău ntrŭnh bah Ban Bí thư Trung ương Đảng n’hanh tĭng ƀư nău tâm pă kan bah Bộ Chính trị, Kruanh Quốc hội hŏ khâl pă nklâm ndơ  n’hanh mbah rhơn Tết ta 3 n’gor lah: Bạc Liêu, Gia Lai, Yên Bái. Yơn lah, đah nău tâm rŏng bah he, Kruanh Quốc hội hŏ rgŏ jă tay ăp nklâm ndơ gay kơl an  ăp rnăk dơi kơl, ƀon lan geh nău rêh jêr jŏt ta du đêt n’gor. Êng n’gor Dak Lak, Kruanh Quốc hội njuăl 300 nklâm ndơ (ăp nklâm ndơ rnoh khlay 1 rkeh 300 rbăn prăk) nơm geh kruanh rđău kan n’gor ndơ̆ an tât ƀon lan nkhêp geh năm mhe Giáp Thìn bơi tât. Kruanh Quốc hội Vương Đình Huệ njuăl nău mbah rhơn dŭt uĕh lăng tât Đảng bộ, n’gâng kan, ƀon lan ăp rnoi mpôl đê̆ ta n’gor Dak Lak nkhêp geh bôk năm mhe. Wa Bùi Văn Cường an gĭt:

“Wa Vương Đình Huệ, Uỷ viên Bộ Chính trị, Kruanh Quốc hội jao an gâp n’hanh njuăl nău mbah rhơn dŭt uĕh lăng tât đảng bộ, n’gâng kan ƀon lan n’gor Dak Lak. Mbah rhơn năm mhe n’hâm suan ngăch lăng, rhơn răm n’hanh geh nău dơi. Dăn an n’gor chuat hao tay wăng sa-  rêh jêng kon nuĭh, đăp mpăn nâp njrăng n’gang neh dak – rnă njrăng, rdâk njêng đảng rdâk njêng lam trong kan chính trị geh âk nău dơi”

Tĭng wa Nguyễn Đình Trung, Uỷ viên trung ương Đảng, Bí thư tỉnh uỷ Dak Lak: Tết năm aơ, n’gor Dak  Lak hŏ rgum geh rlău 80 rmen prăk gay ƀư mât chăm Tết an rnăk dơi kơl, nuĭh ƀon lan geh nău rêh jêr jŏt. Tâm ăp nar rlău aơ,  ăp mpôl hăn pah kan bah n’gor hŏ hăn tât ăp nkual jru, nkual ngai gay ndơ̆ ndơ Tết đah nău ŭch rŏng mô an geh du hê ndul êng bah kơi ji ngot, mô an geh du hê nuĭh mô geh tết./.