Ôi 10/9, Trung ương Đoàn TNCS Hồ Chí Minh, Hội đồng Đội Trung ương tâm rgop đah Ủy ban Văn hóa, Ntĭm nti bah Quốc hội, Văn phòng Quốc hội ƀư rơh rƀŭn nchră rlong ƀư “Quốc hội kon se” rơh tal 1. Kơt du rơh rƀŭn ta ăp rơh rƀŭn bah Quốc hội, ăp “Đại biểu Quốc hội kon se” ndrel đah ăp “Nuĭh Chính phủ kon se”: lĕ geh rơh tâm nchră, ôp n’hanh rblang trong kan mât uănh, njrăng n’gang an kon se mpeh: Njrăng n’gang rmanh sôt săk, lơh mbram kon se; Mât njrăng kon se uĕh lăng, mĭn ƀư mhe tâm ntŭk ntô mạng.

Ntoh ngơi ta rơh rƀŭn rlong ƀư Quốc hội kon se rơh tal 1, Kruanh Quốc hội Vương Đình Huệ mĭn lah, Đảng, Ngih dak n’hanh lĕ kon nuĭh an uănh mĭn, mât uănh dŭt uĕh an kon se. Gay ƀư tĭng uĕh lơn tay trong kan mât njrăng, uănh mât, ntĭm nti kon se, Kruanh Quốc hội đă ăp gưl ủy Đảng, n’gâng kan ƀon lan mât uănh jru lơn nău ntrŭnh, trong hăn bah Đảng, nău kơl bah pháp luật bah ngih dak mpeh trong kan mât njrăng, uănh mât, ntĭm nti kon se. Trong nău kơl, pháp luật mpeh njrăng n’gang, mât uănh, ntĭm nti kon se, mpeh njrăng n’gang lơh mbram, rmanh sôt săk kon se lĕ dơi an bơi tŏng ăp, tâm ban, lĕ nsĭt tay âk săk rnglăy uĕh tâm nău ngăn.