N’gor Lâm Đồng dôl nsrôih tât năm 2030 mbra ƀư tay mhe bơi 3.000 mblâm jay gŭ thuk prăk an nuĭh geh wăng sa đêt. Tĭng ƀư bôk nău kan ƀư jay gŭ tât năm 2030, n’gor Lâm Đồng n’gluh tât rdâk njêng bơi 3.000 mblâm jay gŭ thuk prăk an nuĭh geh wăng sa đêt, công nhân nuĭh kan ăp nkual công nghiệp.

Tâm nê, ntơm bah aơ tât năm 2025 mbra geh bơi 2.100 mblâm jay dơi ƀư lôch jêh, bơi 900 mblâm jay hôm ƀa ƀă mbra tĭng ƀư tay bah kơi. Tât rnôk dja, Lâm Đồng mhe geh 1 tơm nuĭh ntuh kơl ƀư jay thuk prăk an công nhân n’hanh nuĭh kan ta Nkual công nghiệp Phú Hội, nkuâl Đức Trọng. Tĭng wa Nguyễn Anh Tuấn, Groi giám đốc Sở Xây dựng n’gor Lâm Đồng, ndrel đah jêr jŏt tâm wăch rgum ntuh kơl, wăk kol dŭt têh aƀaơ tâm trong tĭng ƀư ăp trong nchrăp ƀư jay thuk prăk lah tơm neh soih.