Lăp Đảng ntơm rnôk 26 năm, ƀư Bí thư Chi bộ rnôk 30 năm, ntơm rnôk nê tât ƀa hin, wa K’Boer Bí thư Chi bộ Thôn B’Dor, xã Lộc An, nkuăl Bảo Lâm, n’gor Lâm Đồng tâm dăch ma ƀon lan ngăn. Wa ndrel ma ăp nŭih tâm chi bộ ndrel kônh wa nsôih ƀư ntrơn rgâl tơm tăm, mpa rong, hun hao văng sa, ndâk njêng nau rêh văn hoá.

            Tĭng wa K’Đèo, nŭih bu rnơm tâm thôn B’Dor, tât rnôk aơ, nau rêh nuih n’hâm bah kônh wa geh n’hao prêh. Ăp nau ton, nau nchrăp ndâk nau rêh mhe, ƀon lan mhe geh ƀon lan kơt tĭng ueh ndrel nsôih râng lĕ. Wa K’Đèo ân lah, nau rgâl aơ lah geh nau rgop n’hâm bah wa K’Boer-Bí thư chi bộ Thôn:

            ‘Dơi saơ nau ueh ang bah nau hun hao ƀon lan ri rhơn ngăn. Kŏ rnơm nau kơl an tă bah gưl xã, ngăn lah Bí thư Chi bộ K’Boer, nŭih mom yơn hŏ geh nau blau ueh kơt nê...ri ma hên ŭch ngăn tĭng kơt”.

            Đah ăp đảng viên tâm Chi bộ thôn, wa K’Boer kŏ lah bí thư gơih ngăn tâm âk nau kan ndrel geh nau blau mhe. Wa K’Thuỷ, du hê đảng viên tâm chi bộ mbơh, tâm ăp nar rƀŭn đảng, wa K’Boer vay jă tay cán bộ thôn, ƀon, bu ranh, nŭih bu rnơm tâm ƀon lan ndrel râng, tâm nchră mbơh nau, rklaih nau kan ndal, tă bah nê jêng geh nau dơi tâm ban prêh ndrel lăp tâm nau ngăn, geh săk tam. Ngăn lah, ân geh kơp tât nau bonh đă ƀon lan pă êng neh, rgop kơl nar kan, prăk rêh ndrel Ngih dak ƀư rlau 20km trong hăn tâm thôn, 15km trong tâm lŏ, mir:

            ‘Bí thư chi bộ K’Boer lah nŭih đảng viên leo trong lor, mra tât mâp ma ƀon lan gay ma nkoch trêng, bonh đă ƀon lan gĭt. Mro râng rgop âk nar kan gay ma ndâk, leo chi bộ hun hao tay”.

            Thôn B’Dor geh rlau 80% nŭih lah rnoi K’Ho. Bah năp nưh, êng nau tuch tăm mô lăng geh, âk nau mĭn, nau rluk mâl ơm hôm âk, nau rêh văng sa jêr. Rnôk aơ, nau mĭn ƀư nau kan bah ƀon lan geh nau rgâl ngăn, nau tuch tăm geh nau dơi, đah ăp ntil tơm chè, cà phê cao sản, tăm nsum ma ăp ntil tơm sa play kơt bơ, sầu riêng...Rnơm nê, nau geh tâm du blah neh hŏ geh rlau 150 rkeh/ha/năm, rnoh rnăk ach o ntơm 30% jur hôm tâm dâng 2%.

      Tĭng wa Trịnh Thị Vân, Groi Bí thư Đảng uỷ xã Lộc An, wa K’Boer lah Bí thư chi bộ ntoh lư tâm nau ntĭm nti ndrel ƀư tĭng nau mĭn, nau rêh, nau kan Hồ Chí Minh. Đah nau ƀư lah Bí thư Chi Bộ, wa mro nsôih ƀư tơm nau tâm rnglăp, leo trong ƀư ndrel ƀư jêh ăp nau kan geh jao:

            ‘Wa K’Boer lah đảng uỷ viên, Bí thư chi bộ thôn B’Dor, lah nŭih gơih kan, blau nau kan, janh mĭn, janh ngơi, janh kan ndrel ndơn nau kan bah nơm. Ntoh n’hao nau rđau kan, rđau đă, kônh wa ƀon lan ƀư ueh ăp nau ntrŭnh, ntrong kan bah Đảng, pháp luật bah Ngih dak ndrel ăp nau ntrŭnh bah nkuăl. Rêh ueh chroh ueh”.

            Thôn B’Dor rnôk aơ geh bơi tât 500 rnăk, rlau 2000 nŭih. Nŭih ƀon lan mro ƀư ueh nau ntrŭnh, nau kan bah Đảng, pháp luật bah Ngih dak, janh ntuh kơl hun hao tuch tăm, nsôih nsum ty ndâk njêng ƀon lan mhe. Năm 2021, thôn B’Dor geh kơp dơn lah nkual ƀon lan ntoh lư bah xã Lộc An ndrel rnôk aơ lah thôn ntoh lư đah âk nau kan ueh, nau kan săk tam bah rmôt ndrel nŭih:

            ‘Hên uănh khlay ngăn tât nau kan văng sa, mhâm ƀư ân ƀon lan nơm n’huch ach o ân âk, n’hao rnăk geh nau dơi ndrel ndrŏng âk. Nau nê ŭch ân hên dơi ndâk njêng ăp nau ntrŭnh ân tâm di đah nau dôl geh ngăn bah nkuăl”.

            Đah nau nsôih tâm nau kan ndâk njêng chính trị tâm dâng, rgop lôch n’hâm nơm ân nau hun hao văng sa bah ƀon lan, wa K’Boer ăp năm mro geh ndơn bằng khen bah Rnâng kan rđau kan Tây Nguyên mpeh nau geh nau blau tâm nau kan ndâk njêng Đảng. Wa K’Boer hôm geh Kruanh UBND n’gor Lâm Đồng pă Bằng khen yor geh âk nau blau tâm nau ntĭm nti ndrel kơt tĭng nau mĭn, nau rêh, nau kan Hồ Chí Minh lvang năm 2016-2022./.