Tâm ngih rƀŭn rgum bah ƀon T’Leh, xã Dleiya, nkuăl Krông Năng, n’gor Dak Lak, ma rhiăng kon se jê̆ ndrel me mbŏ kon se dôl uănh bu njroh lân. Âk kon se rhơn, nchuăt tĭng, kơt, pah têp, nhŭp ty mô lah kdŏ tĭng phung njroh lân. Tâm ntŭk aơ ăp nar vay rngât, ma nar aơ jêng khuh m’ak. Oh Y Gian Mlô, ƀon T’Leh mbơh, aơ lah rơh bôk năp kon se geh uănh kdŏ lân tâm ƀon:

            ‘Aơ lah rơh gâp năp gâp geh uănh bu kdŏ lân tâm rnôk Trung thu, gâp m’ak ngăn. Lah ueh ăp kônh, yơ leo Trung thu ân ma hên”.

            Ndrel hăn uănh lân, ăp kon se hôm geh pâl ăp nau pâl ueh ndrel ma geh ndơn nklâm ndơ đŏng. Nkre geh ndơn nklâm ndơ ndrel ndeh vah jâng mhe, oh H’Sơra Niê nkoch:

            “Nar aơ pâl Trung thu geh nau ueh m’ak ngăn, yor gâp geh ndơn ndeh vah jâng, hôm geh uănh njroh lân, jêh nê ăp kônh, yơ kreh sŏk. Aơ lah rơh bôk năp gâp geh nau rhơn kơt aơ. Gâp lah ueh ăp kônh, yơ”.

            Mô êng kon se jê̆, âk bu têh kŏ rgum tâm ngih rƀŭn rgum bah ƀon gay ma ndrel râng nau rhơn Trung thu bah kon se. Leo 3 nŭih kon nơm tât ndơn ndơ ndrel rhơn trung thu, yuh H’An Niê, tâm ƀon T’leh mbơh:

            ‘Ngih hên geh 4 nŭih kon, yor nau reh kŏ ach o ri ma mô mâp geh prăk rvăt ndơ mô lah ân kon nơm hăn pâl Trung thu. Nar aơ geh ntŭk bu hăn kơl an tât ngăn tâm ƀon gay ma ƀư Trung thu ân ăp kon se, gâp rhơn ngăn yơh”.

            Ƀon T’Leh geh 177 rnăk, đah bơi tât 300 oh. Rlau 90% tâm rnoh nê lah rnoi Rđe. Wa Y Nghê Mlô, Kruanh ƀon T’Leh mbơh, ăp năm, rơh tết năm mhe, tết Trung thu n’gâng kan ndrel rmôt kan hăn kơl an tât khâl, pă nklâm ndơ ân kon se, ân ƀon lan. Năm aơ bôk nau kan ƀư ueh lơn ri ma kônh wa, ngăn lah ăp kon se rhơn ngăn:

            “Nau rêh bah kônh wa ta aơ jêr jŏt ngăn ri ma me mbŏ mô dơi ân kon se geh nau rêh tŏng ăp ôh. Lap lah geh ntŭk bu hăn kơl an tât pă nklâm ndơ ndrel ƀư ăp nau pâl ueh ân kon se. Nua aơ hên rhơn ngăn đah rmôt mât kan bah thôn ndrel ngăn lah đah ăp kon se jê̆”.

            Bôk nau kan “Trung thu ân oh” yor rmôt kan Theo chiều thiện tâm ta nkuăl ƀon têh Buôn Ma Thuột, n’gor Dak Lak ƀư. Ta aơ, êng nau pâl m’ak Trung thu, rmôt kan hŏ ƀư kreh sŏk ân kon se jê̆, pă bơi tât 300 nklâm ndơ geh mì tôm, bánh kẹo, bánh trung thu, ndơ dŏng nti ndrel săm ƀŭt nchih. Ndrel nê, rmôt kan hôm pă 6 bôk ndeh vah jâng ân kon se geh nau rêh jêr jŏt, nti blau. Rnoh ndơ rlau 60 rkeh. Wa Nguyễn Thị Nga, Kruanh rmôt kan mbơh:

            ‘Lah tât năm tât yan Trung thu ri hên tâm rmôt kan “Theo chiều thiện tâm” leo ăp nklâm ndơ khlay tât ma kon se nkuăl jru, nkual ngai dôl geh nau khuch. Tâm yan trung thu năm aơ, phung hên mra ƀư tay 3 ntŭk đŏng tâm nkuăl jru, ngai đah kon se ach o”.

            Ndrel ma Tết Trung thu ơm tâm ƀon T’Leh, kon se tâm ăp ƀon lan jru ngai ndrel kon se mô geh nau tŏng tâm n’gor, kŏ geh ăp nau m’ak đŏng, yor ntŭk kơl an kon se, rmôt kơl kon se rven rvo ndrel kon se rêh kon đơi, Đoàn n’gor Dak Lak, ntŭk kơl an bah neh dak ƀư ân. Ăp nklâm ndơ hŏ geh leo tât ty tâm nau rhơn bah ăp kon se, leo tât yan trung thu geh âk nau rhơn mâk./.