Song Hoành lah 1 tâm ăp thôn bah xã Lưu Vĩnh Sơn, nkuăl Thạch Hà, n’gor Hà Tĩnh tât rnôk aơ ê ƀư dơi nau rgum neh ntu. Nau kan ƀư jao neh tuch tăm tĭng bôk nŭih tâm ƀon lan (geh ueh, geh mhik, geh ngai, geh dăch) ƀư nau neh lŏ mô jŏ mô nâp. Bol ma ăp nhoat rklaih nau trong rgum neh, pă lŏ, ndâk ƀư lŏ ndrĭch têh, yơn tât nrôk aơ, nau pă nkah, mô nâp hôm ơm. Bah năp nau aơ, wa Ngô Văn Ngụ, Bí thư Chi bộ Thôn Song Hoành ntoh nau rhơn rnôk Luật neh ntu 2024 geh nau tam ntơm lơ 1/8, tâm nê rgum ntrŭnh mpeh rgum neh lŏ gay tâm di ma nau dơi hun hao tuch tăm prêh, nau kan têh:

‘Nau geh bah Thôn Song Hoành lŏ mô tâm ban, geh nkuăl prêh, geh nkuăl lŏ dêh ngăn, neh ri mô geh tâm kơt. Ndri ma, nau ntrơn rgâl, nsŭn rgum lŏ têh ân jêng du mok têh lah nau kan jêr. Yor păng geh tât nau rêh ƀon lan. Ma nau khlay lah ntrơn nkra neh lŏ nkre lah nau tŏng dơi nau ŭch bah nau kan tuch tăm mhe lŏ nkre ân tâm di đah nuih n’hâm ƀon lan đŏng”.

Hà Tĩnh kŏ lah ngoai tâm ăp n’gor geh âk xã geh rnglăp nsum ngăn tâm lvang năm 20192-2023, jêh dăp rgum hôm 12 xã rmeh, ƀư mpŭng âk. Tâm nê, geh ân ngih xã geh ndâk âk rmen prăk. Nŭih ƀon lan ta aơ ŭch Luật neh ntu (rgâl nkra) lăp ngăn tâm nau rêh ndrek rklaih nâp ăp ntŭk ngih xã hôm rmeh aơ. Wa Nguyễn Xuân Linh, Kruanh UBND xã Bùi La Nhân, nkuăl Đức Thọ, rvê:

Bah năp nê, ta rơh rƀŭn tal 7, Quốc hội gưl 15 mhe rlau, rơh bôk năp kơp ntơm sa ơm, Quốc hội ntrŭnh nau ơm ntrŭt dănh nau ƀư tĭng nau ntrŭnh bah pháp luật, rgâl rnôk ân geh nau tam bah Luật neh ntu lơ 1/8/2024, ơm lơn 5 khay rđil nau ntrŭnh. Kơt ri, ntơm bôk khay 8 aơ, ăp nŭih geh nau ŭch, săm ƀŭt dŏng neh lĕ khuch, ntŭk neh mô tâm di rđil nau ngăn...mra geh pă săm ƀŭt dơi dŏng neh tĭng Luật neh ntu năm 2024. Nau ngăn, săm ƀŭt dơi dŏng neh mra geh pă ân neh mô geh săm ƀŭt bah năp lơ 1/7/2024, lah đăp mpăn dŏng neh jŏ jong, mô geh tâm pit, mô tih Luật neh ntu. Luật sư Phạm Thanh Tuấn, rmôt Luật sư Nkuăl ƀon têh Hà Nội, ân lah:

‘Tâm Luật mhe hŏ ntoch jong lơ 1/7/2014. Nau ntrŭnh aơ mra njêng nau dơi ân ăp nŭih ƀon lan dŏng neh đăp mpăn jŏ jong tâm rnôk 10 năm khân păng geh nau dơi pă săm ƀŭt kơp dơn nau dơi dŏnh neh. Tĭng hên, aơ lah du nau kan rgâl geh nau khlay. Yor ăp nŭih hôm geh nau kol mpeh nau ăp săm ƀŭt kơp dơn dơi dŏng neh ngăn lah geh tât ăp nŭih dŏng neh yơn mô geh neh ntu, yơn hŏ dŏng neh ntu. Aơ lah rnôk gay khân păng geh pă săm ƀŭt nau dơi dŏng neh”.

Ndrel ma nê, ăp nau ntrŭnh êng mpeh ntu ntu kŏ geh ƀư ntơm lơ 1/8 kơt mpeh nau trok tâm, kơl an ntŭk gŭ mhe ân ƀon lan: lah dŏng ntrơn ntŭk gŭ mhe ân geh nau tŏng dơi bah nkuăl neh ndrel lah ntrơn ntŭk tâm ƀon lan ri ân geh nau dơi bah ƀon lan mhe, đăp mpăn tŏng ntŭk gŭ nau kan, văn hoá, rêh jêng. Ăp nau ntrŭnh sŏk lơi neh yor nau geh dơi bah neh dak nsum; neh ntu ân nŭih rnoi mpôl đê̆, nau rgum sŏk lơi neh tăm bri; nau ntrŭnh rnoh neh, tơm prăk neh ntu; nau nchrăp, nau dơi dŏng neh... mra geh rklaih gay ƀư ân ueh lơn tơm neh ntu.

Nau ơm ‘leo luật tâm nau rêh’ mra geh nau khlay. Yơn nau khlay lơn nê lah ăp nau ntrŭnh bah luật geh dơi ƀư ân săk tam, der nau ƀư mpŭng lir ân ƀon lan, rklaih nau ô̆ng neh mpŭng lir, ndâk nau dơi geh jêng, ƀư tĭng ăp nau dơi prêh ngăn bah neh ntu./.