Luật neh ntu (rgâl nkra) ntrŭnh ngăn ăp nŭih ngih dak sŏk nsĭt neh ntu gay ma hun hao văng sa, rêh jêng yor nau geh dơi bah neh dak, geh nsum ma nau mhe, mât đăp mpăn ƀon lan ƀư tơm, tâm ban, kloh rvah, năn ndrel tâm di nau ntrŭnh bah pháp luật. Ndrel nê lah ăp nhoat ƀư sŏk nsĭt, kơl an, trok tâm, ntrơn ntŭk mhe gay đăp mpăn nau dơi, geh nau râng bah nŭih ƀon lan tâm ăp rnôk, đăp mpăn nau nŭih dŏng geh neh geh bu sŏk nsĭt geh trok tâm, geh pă neh gŭ lor ma sŏk lơi. Đah nau sŏk lơi neh gay hun hao ƀư ngih, bôk nau kan rgum ngih gŭ ndrel văng sa tăch rgâl, nau kan yơn knŭng dơi lah “bôk nau kan ntuh kơl ndâk nkuăl đô thị”. Rnôk ƀư nau sŏk lơi mra đăp mpăn ăp nau ntrŭnh, nau dơi tĭng nau ntrŭnh. Nau aơ lah nhoat hăn khlay, gay đăp mpăn nau geh dơi bah nŭih ƀon lan ndrel der nau ndăn nau sŏk lơi neh. Cử tri Trần Nhung, tâm Long Biên, Hà Nôih, ân lah:

 ‘Phung hên rnê ngăn Quốc hội hŏ năn rgâl nkra, ntop tay Luật neh ntu hŏ geh ntrŭnh ndrel geh âk nau ueh, yor nau geh dơi bah ƀon lan. Dŭt n’hâm ŭch Luật neh ntu mhe geh ƀư tĭng. Lah Ngih dak ƀư dơi ăp nau kan kơl an, rna ửnăng neh dak ri hên kŏ geh nau ŭch pă đŏng. Lah nkuăl neh geh sŏk gay ma ƀư ngih kan tăch rgâl gâp kŏ ŭch đŏng, yơn ƀư nau kan tăch rgâl ri nơm kŏ tĭng rnoh tăch đŏng”.

 Luật neh ntu (rgâl nkra) geh âk điều, khoản geh ntrơn rgâl tĭng trong mât ueh ngăn ân ƀon lan. Tĭng nê, ăp nŭih mât neh ntu tâm ntŭk geh sŏk nsĭt mra geh rnoh trok tâm tâm ban ma nau tăch rgâl. Wa Hoàng văn Cường, rmôt kan bah Hà Nội, mbơh:

‘Luật neh ntu (rgâl nkra) rƀŏng tât nau gay mât nau dơi ân ƀon lan ueh lơn. Ntoh lư ngăn rnôk sŏk lơi neh ri rnoh neh geh trok tâm geh năl rnoh tâm ban, mô đê̆ ngăn ân tâm dăch ma rnoh bu tăch ndrel đê̆ ngăn ân geh tâm ban ma rnoh Ngih dak. Rnoh ngih dak lah rnoh hŏ geh mbơh ăp năm, geh ntrơn rgâl ăp năm, ndrel ân geh tăch ân tâm di rnoh. Kơt ri mra mô hôm nau lah rnoh neh trok tâm deh ir rđi rnoh tăch tâm ăp ntŭk kơt ntơm nơh”.

  Tĭng Luật mhe, nau geh neh ntu geh ntrơn rgâl geh mbơh kloh, nau tăch lah nau tâm ban ân ăp nŭih. Bah nau kan tăch rgâl, nchră rnoh, lah mpeh geh nau dơi ân ăp ntŭk ƀư kan tăch rgâl, geh nau dơi, nau dăng ndrel nau geh dŏng neh, săk tam. Nau kan mhe mra huch ngăn ăp nau tâm boh dăn-ân. Wa Lê Hoàng Châu, Kruanh rmôt kan tăch rgâl neh nkuăl ƀon têh Hồ Chí Minh, mbơh:

 ‘Phung hên rnê prêh ngăn nau kan aơ. Lah dơi geh ƀư ngăn du trong tŏng ăp, rjăp ngăn mra geh dơi nau tâm ban ŭch tâm nau rêh ndrel mât ân dơi nau geh ndrel nau jêng tâm di pháp luật. Tal bôk năp lah bah nŭih ƀon lan geh sŏk lơi neh. Tal bar lah mât dơi nau geh ndrel nau tâm di pháp luật bah nŭih ntuh kơl. Tal pe, Ngih dak ân sŏk lơi neh geh ƀư rmeh, hao mô tâm ban ndrel nau geh dơi nsum đŏng”.

 Luật neh ntu (rgâl nkra) geh nchră mra đăp mpăn nau nchrăp mbơh rnoh neh tĭng rnoh tăch rgâl, đăp mpăn nau dơi geh dŏng neh du trong tâm ban, geh dơi, kŏ kơt lah ăp ntil drăp dnơ mpeh neh ntu bah ƀon lan, ntŭk kan tăch rgâl geh mât. Tă bah nê ndaka nau dơi ân neh ntu ân hun hao neh dak./.