Ăp nar ma aơ, ndrel ma ăp nkuăl êng bah Tây Nguyên, nkuăl n’har bri Thuận Hạnh, nkuăl Dak Song, n’gor Dak Nông dôl klih cà phê. Ntŭk nkuăl ngai, nŭih klih cà phê dôl rgum âk, yơn mô geh nau tât khuch. Yuh Nguyễn Thị Trang, tâm Thôn Thuận Bắc, xã Thuận Hạnh, nkuăl Dak Song mbơh:

            ‘Rnôk tât yan klih cà phê, tiêu ri ŭch nŭih kan ri ma hên mbơh ntŭk gŭ đah công an xã mô lah đồn biên phòng. Ndrel lah geh nŭih mô năl lăp tât gŭ ri hên mbơh ma đồn biên phòng êp nê ngăn”.

            Njok trong jong bơi tât 20 km tâm xã Thuận Hạnh geh âk ngăn mir bah nŭih ƀon lan tăm tă bah jŏ. Nô Y Quyết, rnoi Bunong, tâm ƀon Sapa, Xã Thuận An, nkuăl Dak Mil tăm cà phê tâm n’har bri Thuận Hạnh, nkoch, ăp nŭih ƀon lan rnôk hăn mir ri kŏ ndrel ma tahen Biên phòng nsum ty mât trong n’har bri, n’gâng ntăm:

            ‘Rnăk hên geh mir ta aơ, ndrel geh n’gâng ntăm nkre tâm mir ro. Lah nơm saơ bu êng lăp tâm nkuăl n’har bri ri mbơh nkre ân tahen biên phòng bu gĭt. Tahen Biên phòng hăn mêt uănh ƀa ƀơ ri phung hên kŏ đăp mpăn ƀư mir ta aơ”.

            Hôm nô Nguyễn Văn Tuynh ri nkoch, đah nau tâm dăch dơh bah tahen biên phòng, ƀư ueh nau nkoch trêng, bonh đă, kônh wa tâm nkuăl n’har bri mro gĭt nau mât đăp mpăn rnă njrăng, mât nkuăl n’har bri bah neh dak:

            ‘Ta aơ nkuăl tâm kâng n’har đah dak ba dih, ri nơm mra mbơh nkre ân nŭih mât njrăng lah nơm saơ ăp nau tât, kơt lah geh nŭih êng lăp, ri nơm mbơh nkre ân đồn ro. Lah nsum nau tâm boh đah tahen biên phòng ndrel ma ƀon lan ta aơ ueh ngăn”.

            Nkuăl n’har bri Thuận Hạnh geh 13 rnoi oh nô gŭ rêh. Gay ndâk nuih n’hâm ƀon lan lơn ma nâp, Đồn Biên phòng Dak Song hŏ kơl tâm nchră nau ndrel n’gâng kan tâm nkuăl ndâk ndrel ƀư nâp 9 rmôt kan mêt njrăng êng bah nkual n’har bri, n’gâng ntăm ndrel 11 rmôt mât đăp mpăn bah thôn. Rnơm nau nsum n’hâm bah ƀon lan, ma ăp năm êp aơ, tâm nkuăl Thuận Hạnh mô geh nŭih luh, lăp tih dôih tâm nkuăl n’har bri ôh.

            Tĭng Trung tá Lương Đình Hùng, chính trị viên Đồn Biên phòng Dak Song, n’gor Dak Nông, năl nau mât nkuăl n’har bri mô êng lah nau kan bah cán bộ tahen Biên phòng ma hôm lah nau kan bah lam ƀon lan, ân nsing tâm n’hâm dăng bah ƀon lan. Tâm rgop ma ƀon lan, rmôt kan ƀa ƀơ kơl an nau kan tâm nau rêh jêng “ndrel sa ndrel gŭ ndrel kan” ndrel kơl an đah ƀon lan tâm nkuăl n’har bri. Nkre lah, ƀư ueh nau kơl tâm nchră nau, ndrel đah gưl uỷ, n’gâng kan bah nkuăl ntrŭt dăng nau kan lam ƀon lan râng nau mât nkuăl n’har bri, n’gâng ntăm, ngăn lah đah ăp rnăk rêh mô lah geh neh tăm tâm êp nkuăl n’har bri:

            ‘Hên năl lah, êng ăp nau kan bah biên phòng ri nơm hôm geh nsing ngăn tâm ƀon lan, ƀon lan lah tơm ngăn tâm nau mât nkuăl n’har bri, tahen biên phòng lah rmôt tơm gay ma ƀư nau aơ. Ăp năm ri rmôt kan tâm rgop nsum ma n’gâng kan xã ƀư âk nau kan văn hoá njroh mprơ thể thao, ndrel lôch du năm ƀư nau kan lam ƀon lan mât đăp mpăn nkual n’har bri, gay ndrel ma ƀon lan ƀư ueh nau kan mât nau ƀư tơm đăp mpăn tâm nkual n’har bri tâm nkuăl”.

            Rđau kan Đồn Biên phòng Dak Song nkoch tay: Lam ƀon lan mât nkuăl n’har bri, đăp mpăn nkuăl n’har bri tâm rnôk mhe ân geh nsing nsum ma nau kan tâm rlong rŏng dak ndrel ndâk njêng ƀon lan mhe, ntrŭt dăng nau hun hao văng sa, n’hao nau rêh ân nŭih ƀon lan. Rơh tât rmôt kan hên mra lŏ tâm rgop ngăn đah ăp gưl uỷ, n’gâng kan bah nkuăl, ăp rmôt kan, ntŭk kan gay ma nkoch trêng, bonh đă, kơl an ƀon lan hun hao văng sa, rêh jêng, jut n’huch ach o, ji ngot, rgop nau ndâk njêng nkuăl n’har bri nâp nâl./.