Yuh Y Hương, rnoi Xơ đăng tâm n’gor Kon Tum mbơh, ăp năm êp aơ, geh Rmôt bu ur n’gor Kon Tum ƀư âk nau kan kơt: Nkoch mbơh mpeh nŭih blau kan mpeh ndâk kơl nŭih bu ur tâm rơh mhe bah nkuăl rnoi mpôl đê̆, tĭng chroh, đăp mpăn ân bu ur ndrel kon se...ri ma săk ăp nŭih bu ur nơm lĕ gĭt nau mhe mpeh ăp nau kan bah rnoi mpôl, mpôl chroh, Luật tâm ban bu ur bu klô, Luật tâm gŭ ur sai ndrel rnăk vâl:

            ‘Bah âk rơh tâm rlong ri gâp geh nchrăp âk nau gĭt tât bu ur, ăp nkô̆ nau bah Bôk nau kan bah neh dak nkuăl rnoi mpôl đê̆ gôl yôk lvang năm 2021-2020. Ăp nau gĭt mpeh tĭng chroh rƀŭn. Nau kan bonh đă rnoi mpôl bah Đảng ndrel Ngih dak. Ƀư tĭng ueh nau dơi bah bu ur, rnơm janh lơn tâm ăp nau kan mbơh ngơi, nau tâm mâp, tâm rklaih tâm ăp nau kan rêh jêng geh râng bah ntrong kan chính trị”.

            Ngăn lah ta Kon Tum năm aơ, ăp kon se rnoi mpôl đê̆ geh râng Bôk nau kan tâm nchră đah Hội đồng kon se ndrel Rnâng kan HĐND n’gor Kon Tum. Aơ lah rnôk ueh khlay gay ma kon se bah n’gor geh ntoh nau ŭch bah nơm gay Rnâng kan HĐND n’gor kŏ kơt lah ăp gưl n’gâng kan ntoh nau kơl an, mât chăm, djăt nau ngơi bah kon se. Oh Phan Phúc Phú, kon se nti jrâu 8C, ngih săm THCS-THPT Liên Việt Kon Tum, ngơi:

            ‘Gâp hŏ ôp 3 nau ôp geh tât nau kan mạng xã hội Internet, nau ndjơh bu ur kon se ndrel nau tâm lơh tâm ngih săm ƀŭt ndrel ma ngih ăch chrach bah ngih săm ƀŭt hŏ djơh khuch. Bah ăp nau ơh bah ăp kônh, ăp yơ ri gâp gĭt lah dŏng mạng xã hội Internet ri geh nau gĭt njrăng êng bah nơm. Hôm nau geh tât ndjơh bu ur kon se mô lah nau tâm lơh ri gâp gĭt lah ăp n’gâng kan kŏ geh nau njrăng đŏng. Bah nau tâm nchră aơ mơ gâp gĭt lĕ nau khlay ngăn ngên”.

            Ăp năm rlau aơ, ndrel ma ăp nau kan kơl an tâm nau rêh gay ma kơl an kon se hun hao văng sa, ăp gưl kan hội Bu ur tâm dak Lak hôm nsôih ntrŭnh ƀư ăp nau kan rgop kơl an prăk gay rvăt Bảo hiểm y tế pă ân ăp nŭih dôl mâp nau jêr. Nau kan aơ hôm kơl âk tay ân âk oh nur geh nau dơi dŏng nau kan dak si, mât chăm n’hâm soan, n’huch nau mbăk jâk rnôk mô lap geh ji kuet. Yơn yuh Đặng Thị Bình, ta Thôn 1, xã Ea Kpam, nkuăl Cư M’gar rnôk geh ndơn thẻ bảo hiểm y tế yor rmôt kan bu ur xã pă ân, saơ geh đăp mpăn tâm nuih n’hâm đŏng:

            ‘Nau rêh rnăk hên ri geh nau dôl ma mâp nau jêr, geh mpeh Rmôt bu ur xã pă ân du mlâm thẻ bảo hiểm y tế ri gâp lah ueh ngăn, geh thẻ bảo hiểm y tế gâp hăn khám kŏ mbơi oi prăk ri ma gâp đăp mpăn đŏng rnôk hăn khám nau ji, n’huch nau mbăk jâk mpeh prăk hăn khám ân săk nơm”.

            Ta Lai Châu, nkuăl rnoi mpôl đê̆ ta aơ geh âk nau vay ơm ngăn, nau vay ma nau dơi bah bu ur ri knŭng lah nŭih pah kan, nŭih deh kon. Rnơm geh ăp nau nkoch trêng tâm di, tât nau dơi bah bu ur tâm nkuăl hŏ geh âk nau rgâl đŏng ndrel nau ngơi bah bu ur kŏ geh nau tam tâm rnăk vâl. Yuh Ma Thị Chư, tâm ƀon Phìn Chải, xã Giang Ma, nkuăl Tam Đường mbơh: Yor geh sai lah nŭih pah kan tâm xã ndrel geh cán bộ vay tât tâm ƀon gay ma nkoh mbơh nau ri ma nau mĭn, nau kan, kơl an ndrel tâm pă nau kan đah ur kon kŏ geh ueh lơn:

            “Ăp nar nau kan bah gâp lah knŭng ƀư mir, ƀư lŏ, rong sur, rong kik, rong djar, chiă rpu ndrel n’gon ndrănh. Ôi lah sĭt tă pah kan, ur ê hŏ năn n’gon piăng ri sai sĭt ri kơl an ur n’gon piăng dĭng nar, saơ pe me kon sĭt hăn tă kan ri sông nsum. Nar prao, nar pơh geh rlu nau kan ri sai kŏ hăn kơl an me mbŏ, kơl ur nơm tâm nau pah kan lŏ mir, nau kan ngih vâl. Rnôk aơ, nau rêh rnăk vâl geh mbơh oi đŏng, sai kŏ mô geh dong ur ôh, ma rnăk vâl kŏ rêh ueh đŏng”.

            Đah nau lăp ƀư kan ngăn bah ăp N’gâng kan, ntŭk kan ndrel rmôt kan ăp ntil bah ăp nkuăl, bu ur ndrel kon se rnoi mpôl đê̆ nar lơn geh mât ndrel geh dơi ăp nau ueh. Bu ur, kon se rnoi mpôl đê̆ geh hăn râng ntĭm nti, mât nau dơi, nau geh jêng tâm di pháp luật./.