Kruanh Quốc hội Vương Đình Huệ nkah tay, năm 2022 neh dak he lĕ dơi geh ăp nău dơi khlăy n’hanh lĕ rngôch. Nău wăng sa têh an geh mât đăp mpăn tay, lạm phát lĕ dơi mât njrăng, rnoh ndơ dŏng râng geh lĕ năm hao 3,5% tâm rnoh mpŏng kan bâh Quốc hội, hun hao GDP geh 8,02%, rnoh dŭt âk tâm 10 năm ba năp, ăp nău uănh năl kan têh bâh n’gâng kan wăng sa geh mât đăp mpăn. Quốc hội, Ủy ban rnâng kan Quốc hội, ăp ntŭk kan bâh Qh, hội đồng nhân dân ăp gâl geh âk nău rgâl mhe, n’hao nău dơi, săk rnglăy pah kan.

“Nău Quốc hội uănh n’hêl, ntrŭnh 5 rmôt kan nău têh, khlăy n’hanh ngăch ndal ta rơh rƀŭn nchră ndal tal 2 lĕ geh ntop doh rklaih ăp nău kan jêr jŏt, kŏ văk tâm nău ngăn, nkre lah, njêng nău kan khlăy gay ma ƀư tĭng nău kan ta năm 2023 n’hanh ăp năm let năp tay”.

Kruanh Quốc hội Vương Đình Huệ đă, năm 2023, ăp gâl kan, ăp n’gâng kan, ntŭk kan, doanh nghiệp n’hanh nuĭh ƀon lan an geh mât uănh, uănh tĭng na nê̆ ăp nghị quyết, nglôch lôch bâh BCH trung ương Đảng, Nghị quyết 68/2022 bâh Quốc hội mpeh nău nchrăp hun hao wăng sa- rêh jêng năm 2023, ngăn lah, an geh rgâl mhe nău mĭn, geh trong kan mhe, nău kan mhe, nsrôih, leo kan, mĭn kan n’hanh răng dăng lơn tâm nău ntĭm đă, leo kan.

Kruanh Quốc hội nkah đă, an geh n’hao ƀư lôch nău kan hun hao, rgum doh rklaih ăp nău jêr, kơl pah kan jan sa tăch rgâl ngăch ndăn an nuĭh ƀon lan, doanh nghiệp, njêng ăp nău pah kan hun hao n’hanh nău dơi hun hao kan mhe. Uănh khlăy hun hao văn hóa tâm ban đah nău wăng sa, chính trị, rêh jêng, ngăch ndăn mĭn uănh, rdâk njêng bôk nău pah kan nkô̆ mpŏng ngih dak mpeh văn hóa gay ma nkra mhe n’hanh hun hai văn hóa kơt nău mĭn ntĭm leo bâh Tổng Bí thư Nguyễn Phú Trọng. Ƀư tĭng ueh ăp nău kơl rnă njrăng ntŭk rêh jêng, n’huch ach o nâp nâl, mât đăp mpăn ngăch kan, tâm ban ntŭk rêh jêng, mât ueh ntŭk gŭ rêh, mât kơl nău rêh, nău mĭn, nău kan bâh ƀon lan, ngăn lah ta nkual njônh ngai, nkual n’har bri, gôl dak, nkual ƀon lan rnoi đê̆.

Ta meng nĕ an geh n’hao nău dơi kan, ndâk nsơm, mât neh dak, rnă njrăng, ntrôl dăng n’hanh n’hao nău khlăy nchră nău đah dak bah dih, n’hao an săk rnglăy, nău dơi lăp kan ndrel, mât đăp mpăn ntŭk gŭ rêh, đăp mpăn tâm kơl gay ma hun hao ngăch n’hanh nâp nâl. Nĕ lah nkô̆ mpŏng hun hao.

Gay ma ƀư tĭng an tâm ban n’hanh săk rnglăy ăp nău ntrŭnh kan ta rơh rƀŭn nchră tal tal 2, QH khóa 15, kruanh QH Vương Đình Huệ ngơi.

“Chính phủ, Thủ tướng chính phủ, Ủy ban rnâng kan QH, Hội đồng dân tộc, ăp ntŭk kan bâh QH, ăp gâl kan, ăp n’gâng kan, ăp ntŭk kan tâm n’gâng kan ngih dak, ăp mpôl đại biểu Quốc hội, ăp mpôl đại biểu Qh leo mbơh ƀư ngăch ndăn, ngăch ăp luật, Nghị quyết mhe geh mbơh tơih, nkra lah mât jăp nău mĭn đah nău leo ƀư, cán bộ gay ma mât đăp mpăn tĭng di nău mĭn “ba năp ba kơi dơn ngoăy du nuih n’hâm”, “dâng lơ tâm ban” ma Tổng Bí thư Nguyễn Phú Trọng lĕ âk tơ̆ lah na nê̆. Ngăn lah, ăp đại biểu QH đah ăp trong leo kan an tâm di, nău mbơh găch, tŏng ăp ta lam dak nău geh bâh rơh rƀŭn nchră, djăt, rgum mbơh tơih nău tâm rgop n’hanh nău ŭch rŏng bâh ƀon lan, uănh nđôi na nê̆, săk rnglăy nău doh rklaih ăp nău kan, dăn đă, nduĭh lah, phong tih bâh ƀon lan”.

Nkre lah, leo kan tâm rgop kơl nchrăp ueh ăp nău dơi kơl an ƀon lan vơt năm mhe, vơt Tết Nguyên đán Quý Mão ueh răm, đăp mpăn, mpêt nkrem, njêng nău nđơr nău gơih mhe bâh ntŭk kan ba dâng n’hanh ăp rnăk vâl, nsrôih ƀư dơi Nghị quyết Đại hội 13 bâh Đảng, nău nchrăp hun hao wăng sa rêh jêng năm 2023 bâh ăp nar bôk năp, bôk khay bâh năm mhe.