Uănh jay dôl tâm lvang jêh, wa H’Vin Bya (săk way kuăl lah Amí Bó), ta xă Dray Sáp, nkuăl Krông Ana, n’gor Dak Lak, an gĭt, jay ƀư lĕ rlău 700 rkeh prăk. Rnoh prăk aơ lah ntêm nkrem âk năm bah ur sai jêng wa dŭt rlăp tâm nău săch ƀư jay, lŭ loih. Nău dơi ƀư jay rnăk wâl nsing nơm jao an Rmôt ƀư jay ƀon Tuôr B, lah ăp nuĭh bên tâm ƀon. Amí Bó lah:

“Bôk năp, gâp lah uĕh cán bộ ta nkuăl lĕ ntĭm nău kan an kon sau gâp. Kon sau gâp lĕ sĭt ta aơ ƀư jay an gâp. Gâp dŭt rhơn yor kon sau tâm ƀon lĕ ƀư an mpôl hên du mlâm jay dŭt uĕh”.

Nô Y Kun Kbuôr, kruanh rmôt Rmôt ƀư jay ƀon Tuôr B, xă Dray Sáp an gĭt, ndâk njêng bah năm 2020, aƀaơ rmôt geh 12 nuĭh, lah ăp nuĭh lĕ dơi ntĭm nti nău kan ndâk ƀư ngih wâl. Năm bah năp, ăp nô lĕ ƀư geh 7 mlâm jay mhe n’hanh âk ndơ ƀư êng an kônh wa tâm ƀon. Aƀaơ prăk geh rĭng bôk nuĭh ƀư ngăn bah 9 tât 10 rkeh prăk/khay n’hanh nuĭh kơl nklăp 6-7 rkeh prăk/khay. Ndrel đah nău geh prăk an ăp nuĭh, du năm Rmôt mbra rlak du gâl prăk geh gay rwăt tay măy mŏk rhŏ an nău kan. Nô Y Kun Kbuôr lah:

“Oh nô hăn kan âk hôm, aƀaơ hăn nti nău kan ƀư ngih wâl oh nô nsrôih hăn xây, ndơn yor hăn ngai gâp ndâk njêng rmôt gay ƀư an ƀon gay wăng sa he hun hao. Nkre dơi ƀư nău kan lŏ nkre joi geh prăk an rnăk wâl nơm”.

Nô Y Riêng Niê, nuĭh kan tâm Rmôt ƀư ngih wâl ƀon Tuôr B an gĭt, nô geh prăk nkhlăp 300 rbăn prăk du nar:

“Ƀư nău kan aơ nkre dơh ƀư, nkre geh prăk, saơ jay yor rmôt ƀư kônh wa nsing nơm saơ răm, ntô̆ n’hao”.

Rmôt ndâk ƀư ngih wâl ƀon Tuôr B lah ntrong kan dŭt mhe đah kônh wa nuĭh Êđê, dơi ndâk njêng jêh ăp jrô ntĭm nău kan an nuĭh pah kan thôn ƀon. Tĭng wa Y Phên Niê, Kruanh Hội nông dân xă Dray Sáp, n’gâng kan ƀon lan lĕ ntop kơl du đêt ndơ dŏng, măy mŏk, mbơh ntĭm ndơ ƀư.... kơl kônh wa hun hao nău kan ndâk ƀư ngih wâl, pơk trong n’hŭch ach o nâp nâl.

“Mĭn lah ntrong kan aơ lĕ jŭt n’hŭch ach o lah nâp nâl ngăn ta ntŭk mpôl hên. Bah năp đaơ an jă ăp nuĭh ndranh ta ntŭk êng sĭt rdâk ƀư ri aƀaơ mpôl hên lĕ geh rmôt kan ndrel aơ. Mpôl hên lĕ tâm rgop kơt boăt nthoi lĕ rngôch rnăk bah ƀon lan mô an hăn jă ăp ntŭk êng ma yor nuĭh ƀon lan ta ntŭk rhŏ ơư n’hanh ndâk ƀư an ƀon lan”.

Rlău ma rmôt ndâk ƀư ngih wâl ƀon Tuôr B, xă Dray Sáp, ta du đêt xă êng tâm nkuăl Krông Ana, nuĭh rnoi mpôl đêt dơi nti nău kan ndâk ƀư ngih wâl n’hanh mât uĕh săk rnglăy. Ntĭt nsa kơt wa Y Sao Mlô, ta ƀon Tơ Lơ, xă Ea Na bah du hê kơl ƀư, wa tĭng nti nău kan n’hanh jêng nuĭh ƀư tơm. Wa Y Sao nkoch: bah năp đaơ wa knŭng hăn tĭng ăp rmôt ƀư tơm, ƀư ăp ntil ndơ dơh jêng prăk geh đêt. Rnôk gĭt nău mbơh geh jrô ntĭm nti nău kan dơi ƀư ta ntŭk, wa lĕ hăn dăn râng nti. Gơih nti n’hanh tât jrô tŏng ăp, jêh rnôk lôch tốt nghiệp khay nti, wa dơi nuĭh tơm ndranh rgâl ƀư nuĭh kan tơm, đah geh prăk bah 300-350 rbăn/nar.

Hôm wa Y Xiếp Byă, ta ƀon Kruế, xă Ea Bông, bôl lĕ jêng nuĭh kan tơm, yơn yor geh nău ŭch n’hao tay kan jêng wa dăn hăn nti jrô nti ndâk ƀư ngih wâl. Tă bah jrô nti, mô knŭng gĭt mĭn bôk năp mpeh rdâk ƀư n’hanh lŭ loih ndâk ƀư ngih wâl, ma hôm dơi djăt blău mpeh đăp mpăn kloh uĕh pah kan.

Tĭng Trung tâm Giáo dục thương xuyên-Ntĭm nti nău kan nkuăl Krông Ana, n’gor Dak Lak, rĭng du năm nău ŭch nti nău kan bah nuĭh pah kan ta ntŭk nklăp 400 nuĭh. Tâm nĕ, rgum tâm ăp rmôt nău kan kơt: ndâk ƀư ngih wâl ƀon lan; tăm n’hanh tăch sêt; ka choh công nghiệp. Jêh ntĭm nti nău kan lĕ kơl nuĭh nti gĭt nâm nău way bôk năp bah tĭng nău kan ma khân pơng dăn jêng săk rnglăy nău kan dơi hao prêh, geh nău kan đăp mpăn n’hanh rnoh geh prăk hao âk.

Bah lôch uĕh bah Rmôt ndâk ƀư ngih wâl ƀon Tuôr B mbơh pơk trong hăn mhe, trong ƀư mhe tâm nău ntĭm nti nău kan, mkra nău kan ta ăp nkual thôn ƀon, nkual rnoi mpôl đêt ta Dak Lak tâm năm tât: nĕ lah hăn ndrel đah ăp nău kan ngăn, ăp nău kan khlay tâm nău rêh bah nuĭh ƀon lan.