Ôi 12/3, Rmôt kan ntop kơl rnăk wâl tahen khĭt Việt Nam ƀư mâp măt báo chí Xuân Giáp Thìn 2024, Trung tướng Hoàng Khánh Hưng, Kruanh Rmôt kan ntop kơl rnăk wâl tahen khĭt Việt Nam an gĭt: Rmôt kan lĕ dơi nău ndrel soan tâm trong kan nkah gĭt tahen bah Tổng công ty trong ndeh treng Việt Nam mpeh nău ƀư mô sŏk prăk rdêng nting tahen khĭt n’hanh an dơm an rnăk wâl tahen khĭt hăn bah Nam luh Bắc. Aơ lah nău ƀư geh nkô̆ jru hvi, mpơl nuih n’hâm “Ngêt dak kah gĭt tu dak” bah rnoi nuĭh Việt Nam. Tâm năm 2024, Rmôt Ntop kơl rnăk wâl tahen khĭt Việt Nam ƀư uĕh tay ăp nău ƀư nkah gĭt ăp tahen janh dăng khĭt kơt:

Năl săk nting tahen khĭt mbơh săk, joi, kuih nting tahen khĭt; an jay tâm kơl, ndrôm sam ƀŭt ntêm nkrem, an prăk kơl hăn nti an nuĭh rnăk wâl tahen khĭt... Lơn lah, tâm năm aơ, Rmôt kan tâm rgop đah tổng công ty Trong ndeh treng Việt Nam ƀư rdêng nting tahen n’hanh an dơm rnăk wâl tahen khĭt hăn ndrel bah Nam luh Bắc n’hanh nta ăp nău nơih ngăn an nuĭh rnăk tahen khĭt tâm nău ƀư ndơ̆ nting tahen khĭt sĭt ƀon tơm đah trong ndeh treng.