Ăp nar rlau aơ, bôk nau kan “Năm mhe biên phòng-Duh răm nuih n’hâm kônh wa ƀon lan” geh rmôt tahen biên phòng n’gor Gia Lai ƀư tâm ăp xã n’har bri bah nkuăl Ia Grai, Đức Cơ, Chư Prông bah n’gor Gia Lai. Tâm ăp nau kan, ăp tahen biên phòng ndrel ƀon lan tâm nkuăl tâm n’ur nklâm bánh chưng, tur chĭng, jroh mprơ gay ma tâm rnglăp nau rŏng tahen ƀon lan. Ndrel ma nê, ăp nŭih kơl an kŏ tât kơl ndơ mô sŏk prăk, pă ân kônh wa âk rhiăng nklâm ndơ geh phôi, mŭng, phe ndrel săm ƀŭt, ndơ dŏng nti ân kon se. Đại tá Nguyễn Văn Nghị, Groi Chính uỷ n’gâng kan rđau tahen biên phòng n’gor Gia Lai, ngơi:

            ‘Kônh wa rhơn ngăn, rnơm tâm rmôt tahen lah nsum, đah tahen biên phòng lah êng, nkre ƀư rjăp nau tâm rnglăp ƀon lan tahen, tâm pă nau jêr, nau ueh; aơ kŏ lah nau gay kônh wa nsôih ndrel tâm rgop rnglăp đah ăp ƀon, ƀư ueh nau ntrŭnh bah Đảng ndrel Ngih dak tâm nau ndâk nau rêh văn hoá tâm nkuăl”.

            Tâm ăp nar bôk năm mhe 2024, ăp nau kan khlay, khuh răm yor ăp đồn biên phòng ƀư, hŏ kơl an kônh wa geh nau rhơn, ueh. Wa Nguyễn Thị Lành-Groi Bí thư nkuăl uỷ nkuăl Ia Grai, n’gor Gia Lai, ngơi:

            ‘Ngăn lah tâm moh ntŭk geh màu ndrih bah rmôt tahen biên phòng ri ta nê geh màu ndrih bah nau rêh hơm tăm, ueh lăng bah kônh wa ƀon lan. Tahen biên phòng hŏ ntĭm nti ân kônh wa hun hao văng sa, tơm tăm, mpa rong, ndâk nau rêh văn hoá tâm nkuăl ƀon lan, ngăn lah ntĭm nti ân kônh wa nau dŏng sa têm nkrem, ƀư rgâl nau mĭn nau kan gay rklaih ach o nâp nâl”.

            Tâm xã nkuăl n’har bri Krông Na, nkuăl Buôn Đôn, n’gor Dak Lak, Tahen Biên phòng Dak Lak tâm rgop ma ăp gưl kan ƀư Bôk nau kan “Năm mhe biên phòng duh răm nuih n’hâm ƀon lan-Tết Giáp Thìn 2024”.

Ntơm bah ôi aơ, âk rhiăng kônh wa tâm xã Krông Na ndrel ăp ƀon êp nê hŏ rgum tâm ngih dak si Xã Krông Na, ntŭk kan bah UBND xã râng rgum. Kônh wa râng ăp nau kan khlay, kơt khám săm ji, pă dak si mô roh prăk, ndơn nau ôp khâl n’âm soan, rhơn năm mhe, ndơn bánh chưng, ndơ tết, prăk ân kon se nti tă bah tahen biên phòng ndrel rmôt kơl an. Ndrel nê, kônh wa geh mbơh nau ndrel ma mrôt tahen biên phòng mât nâp nkuăl n’har bri, trong n’har bri ndrel đăp mpăn nkuăl neh bah neh dak. Nô Y Quyế Êban (rnoi Bunong, tâm ƀon Trí A, xã Krông Na, nkuăl Buôn Đôn nkoch, ăp nklâm ndơ ndrel ăp nau kan bah tahen Biên phòng Dak Lak hŏ du gưl kơl nau duh răm tâm ƀon lan rnôk tết năm mhe:

            ‘Tât đah nar rgum “Năm mhe biên phòng duh răm nuih n’hâm ƀon lan” kônh wa rhơn ngăn. Mpeh rnâng kan bu ƀư ân ăp nau pâl ueh ơm, khám săm ji ndrel pă dak si mô roh prăk, ndơn bánh chưng, nklâm ndơ tết...bah nar rgum, ăp kônh wa geh tâm n’ur, kơt ntĭm nti, tâm rnglăp nuih n’hâm tahen ƀon lan, geh nau ueh âk ngăn tâm rnôk tết năm mhe tât”.

            Bôk nau kan “Năm mhe biên phòng-Duh răm nuih n’hâm kônh wa ƀon lan” lah nau kan vay ăp năm bah tahen Biên phòng n’gor, gay kơl an kônh wa tâm ăp xã nkuăl n’har bri geh sa tết duh răm, tŏng ăp, rhơn m’ak; nkre ƀư rjăp lơn nau tâm rnglăp tâm nkuăl n’har bri, tâm bonh kônh wa ăp rnoi, cán bộ, tahen nkuăl n’har br lŏ tâm rnglăp, nsum n’hâm ƀư ueh nau kan mât nkuăl n’har bri bah ƀon tơm. Bôk nau kan “Năm mhe biên phòng-Duh răm nuih n’hâm kônh wa ƀon lan rnôk tết Giáp Thìn 2024” geh Tahen Biên phòng Dak Lak ƀư ntơm lơ 13/1 tât 4/2 tâm 4 xã geh Krông Na, nkuăl Buôn Đôn, Ea Bung, Ia Rve, Ia Lốp nkuăl Ea Súp. Tâm rnôk aơ, mra geh âk rbăn nklâm ndơ khlay, đah rnoh 752 rkeh prăk pă ân ăp rnăk tâm nkuăl n’har bri bah n’gor Dak Lak. Đại tá Đỗ Quang Thấm, Rđau kan n’gâng kan tahen Biên phòng n’gor Dak Lak, mbơh:

            ‘Năm 2024 ri hên mra ƀư bôk nau kan “Năm mhe biên phòng-Duh răm nuih n’hâm kônh wa ƀon lan” tâm ăp ƀon bah xã n’har bri n’gor Dak Lak. Nau ntrŭnh bah phung hên năm aơ mra ƀư geh ân ơm, đah nkô̆ nau mô dơi geh nŭih tâm nkuăl n’har bri geh nchlơi ba kơi, mô geh Tết. Bah nê, tâm pă kơl kônh wa tâm nkuăl n’har bri bah oi nau jêr, đăp mpăn nau rêh tâm nkuăl n’har bri, ndrel ma rmôt tahen biên phòng mât nâp nâl nkual neh n’har bri bah neh dak”./.