Bah năp măt ân lah rjăp, nau ntrŭnh ƀư 3 bôk nau kan bah neh dak (mpeh nau ndâk njêng ƀon lan mhe, n’huch ach o nâp nâl ndrel hun hao văng sa, rêh jêng nkuăl rnoi mpôl đê̆ ndrel gôl yôk) tâm ăp n’gor Tây Nguyên tâm ăp năm rlau aơ hŏ leo nsĭt nau săk geh bôk năp. Trong ngih vâl geh n’hao prêh, nau rêh bah ƀon lan geh rgâl. Bu ranh Anưk, cử tri ƀon Tuơh Ktu, xã G’Lar, nkuăl Đăk Đoa, n’gor Gia Lai mbơh:

            “Nau rêh rnôk aơ rgâl âk ngăn. Lam ăp ƀon lan kŏ rgâl mhe dŭt ueh, bah năp nơh trong hăn ri dak bŏk, n’huk buh, kơt lah ndrung sur ngăn, ngih ri sat, điện mô geh. Rnôk aơ geh trong ueh, geh ngih săm ƀŭt, geh ngih dak si, điện mpoh ang lam ntŭk. Săk gâp kŏ hăn khâl tâm Dak Lak saơ rgâl ueh ngăn. Ndrel êp aơ gâp kŏ hăn nkuăl Đăk Bơt, Kon Gàn, tât Kbang saơ nau rêh rgâl ueh ngăn. Tal bar đŏng tâm nau pah kan jan sa ri ƀon lan blau dŏng máy móc, nau kan mhe. Nau rêh hơm răm tât lam ƀon lan, ăp ngih kŏ geh ndeh, n’ăp ma nkual jru ngai...dĭng lĕ nê lah rnơm geh Đảng, ngih dak”.

            Yơn lah, tâm 3 bôk nau kan bah neh dak, ri bôk nau kan hun hao văng sa rêh jêng nkuăl rnoi mpôl đê̆ gôl yôk hôm mâp âk nau jêr ngăn. Tâm rơh rƀŭn ndal tal 5 dŭt năm mhe rlau, Quốc hội ntrŭnh nau mpeh nau êng ƀư bôk nau kan bah ndeh dak. Nau ntrŭnh aơ geh 6 chương, ntrŭnh 8 ntrong kan ƀư êng gay doh rklaih ngăn ăp nau jêr, nau nkol, lŏ pơk trong nơih gay ăp nkuăl ƀư ngăch nau kan, pă tơm prăk nkô̆ nau bah neh dak tâm rơh tât. Groi Thủ tướng Chính phủ Trần Lưu Quang ân lah, aơ lah nau kan dăng ê tă geh:

            ‘Nkô̆ nau ƀư bah 8 nau kan lah pă gưl ân dăng, n’hao nau dăng mpeh tâm dâng, mêt uănh. Pă gưl ân nkual, xã geh dơi kơt tĭng uănh đŏng lah mô. Tâm nê kŏ geh đŏng nau mĭn, nau ê janh. Yor ri nơm ân săch moh nau dơi moh nau ê dơi, tơm prăk ngih dak ân geh mât ân rjăp bol ma du kăk. Ntop đŏng, aơ mô di lah ntrong kan ƀư rlong ma lah nau kan geh nau ƀư êng”.

            Ăp ntoh măt Quốc hội tâm ban nau prêh mpeh nau rlong ƀư tâm nau pă gưl ân gưl nkuăl tâm nau mât, ƀư ăp bôk nau kan bah neh dak tĭng nau ƀư: “Hội đồng nhân dân gưl nkuăl geh ntrŭnh nau rgâl nau ka, ntop tơm prăk kan, tơm prăk vay dŏng đah ăp bôk nau kan bah neh dak tâm nau nchrăp ntuh kơl nsum jong năm, nau nchrăp ntuh kơl tâm ăp năm, nau nchrăp tơm prăk ngih dak ăp năm hŏ geh ăp gưl n’gâng kan jao ân”. Wa Tạ Văn Hạ, rmôt kan bah n’gor Quảng Nam, ngơi:

            ‘Đah 8 nau kan rlong ƀư aơ ri gâp ân lah mra dơi njêng ăp nau rgâl mhe tâm nau ntrŭt dăng nau ngăch nau ƀư 3 bôk nau kan bah neh dak. Aơ lah nau ma gâp ân lah ân geh uănh mhâm ƀư rnôk săch, ô̆ mbơh lah nau rlong ri ân geh ntoh măt, geh nau dơi lah ƀon lan, nkuăl têh, nkuăl yôk...ăp nê lah ăp nau ma rnôk nơm rgum lĕ ri dơi nau ntrŭnh nê, nau kan nê ma păng ân geh tât nau rgum ân ăp dơi ăp nau kan ndrel nkuăl”.

            Ntoh măt Quốc hội ndrel ƀon lan lam dak mpŏng ŭch mpeh nau kan, nau ntrŭnh ngăn ƀư ăp bôk nau kan nkô̆ nau bah neh dak geh Quốc hội nchră mra geh âk nau rgâl, njêng nau kan ân kloh aih gay nkuăl gôl yôk dơi geh ƀư tĭng ueh nau dơi geh jêng, nau rgâl mhe hao jêng. Wa U Minh Nam, Groi Kruanh Ban Dân tộc n'gor Kon Tum mbơh:

            ‘Tâm nau nê, phung hên mra mbơh ăp nkuăl ndâk nau nchrăp kan ân ngăn, năl ntrong kan ngăn. Nkre n’hao nau dơi bah nau ƀư kan bah gưl uỷ, n’gâng kan bah nkuăl rgum ntrŭnh ƀư ăp nau kan ngăn. Lŏ ƀư ngăn ăp nau kan, ntrong kan ngăn hŏ geh Quốc hội nchră mô lah geh Chính phủ, ăp n’gâng kan trung ương ân nau ntrŭnh. Tal pe lah lŏ kơp uănh tay nau rđau kan bah Bôk nau kan neh dak ăp gưl, gay n’hao nau dơi bah ăp nŭih kan bah rnâng kan”.

            Cử tri tâm lam dak lah nsum, nkuăl Tây Nguyên lah êng ŭch, jêh rnôk nau ntrŭnh geh Quốc hội nchră, Chính phủ ndrel ntŭk n’gâng kan mra ơm ntrŭnh ăp nau ntrŭnh, nau rđau, nau ntĭm mbơh gay luật ngăch geh săk tam, hăn lăp ngăn tâm nau rêh./.