Năm mhe hŏ sĭt tât, Tết hŏ tât goh tĭng mpông. Đah ăp rnăk mpeh săk ach o ta n’gor Kon Tum ri Tết Nguyên đán way ơm rnoi nuĭh năm aơ dŭt răm mƀak. Ndrel đah nău mât chăm gay mô an du rnăk mô tŏng geh Tết bah ăp gưl n’gâng kan, nsum mpôl ta ntŭk, âk rnăk ach o tâm n’gor hôm geh nău rhơn mha êng đŏng rnôk dơi wơt Tết tâm ăp jay mhe têh hvi bah bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang lvang năm 2021 – 2030 bah Chính phủ. Năm mhe, nău rhơn mhe dôl kơl ăp rnăk ach o nsing nơm tay nsan hao tâm pah kan jan sa gay geh nău rêh hơm răm lơn.  

    Êng đah bri srŏ nđik bah dih, tâm trôm jay mhe  bah ur sai yuh nô A Hâm, Y Lược ta ƀon Vi Chring, xã Hiếu, nkuâl Kon Plông, n’gor Kon Tum dôl dŭt răm mƀak đah nău mbah rhơn năm mhe. Yuh Y Lược an gĭt, ur sai yuh nô mhe “du” bah jay ơm “rhong bah năp, mpơl bah kơi” way mô tŏng geh n’hŭt răm an rnăk tâm ăp nar mih phŭ srŏ nđik lăp jay mhe năn an wơt Tết. Rnăk mpeh săk ach o, sa mô ăp nđăp mô tŏng, ma aƀaơ nău wơl geh bah bar hê ur sai yuh mpeh du mbâm jay mhe têh hvi aƀaơ hŏ jêng ngăn ngăn, ƀư bar hê ur sai luh nău rhơn răm dŭt n’hâm:

     “Jay tơm hên hŏ sat ôm lĕ. Aƀaơ ngih dak hŏ ntop kơl kơt aơ ri gâp dŭt rhơn. Gâp mbra nsrôih gay nsan hao klaih rlău jêr jŏt bah kơi aơ tay mbra geh rlău năm ơm bah năp nơh”.

    Tâm ban kơt ur sai yuh nô A Hâm, Y Lược, geh 6 rnăk ach  o êng ƀa ƀă ta xã Hiếu ndrel 29 rnăk ach o ta ăp xã: Đăk Ring, Đăk Nên, Ngọc Tem, Măng Cành, Măng Bút bah nkuâl Kon Plông geh nsum nău rhơn wơt Tết tâm ăp jay mhe têh hvi, nâp uĕh. Yuh Y Hố, ngoăy tâm ăp rnăk ach o dơi Ngih dak ntop kơl ƀư jay nkoch, tă bah I sai kop ji, hôm rêh tâm jay ơm truh sat jêng bah âk năm aơ rnăk wa way rngot rnôk ăp tơ̆ năm mhe sĭt, Tết tât. Ndrĭ yơn Tết năm aơ ri hŏ dŭt êng ngăn:

“Jay ơm truh sat, rnôk mih ri mbĕ lĕ. Jay ach o jêng mô hŏ ƀư du tơ̆ sa Tết đêt. Jay mhe ri saơ răm mƀak lơn. Geh jay mhe ri ƀư sa Tết saơ rhơn mƀah lơn. Tết năm aơ ri nklâm bánh chưng, rvăt bánh kẹo rhơn geh jay mhe”.

Đah rnoh ntop kơl bah tơm prăk ngân sách Trung ương 40 rkeh prăk, ngân sách n’gor 1 rkeh prăk an ăp mblâm jay, gay đăp mpăn ăp mblâm jay geh ăp rnoh di: “jâng jay nâp- rpaih, mpir nâp- chor nâp”, n’gâng kan, nsum mpôl ăp nkuâl hŏ geh âk trong ƀư ngăn ngăn ntop kơl ăp rnăk ƀon lan, kơt: kơl rnăk mpeh nar luh kan; kơl lŭ loih choih xi măng; rvăt ndơ dŏng kan tâm rnăk ƀon lan. Dơi n’gâng kan ta ntŭk, nsum mpôl mât uănh khlay lĕ rngôch ăp rnăk ƀon lan nsing nơm manh tay 40 rkeh prăk thuk dơh tĭng Nghị định 28 bah Chính phủ gay jay bah rnăk wâl têh hvi, nâp uĕh lơn. Wa A Thảo, Groi kruanh UBND xã Hiếu, nkuâl Kon Plông an gĭt, yor kơt nê̆ ăp mblâm jay mhe bah rnăk ach o Tết dja ntop geh tay nău răm mƀak nău rŏng bah rnăk wâl n’hanh nsum mpôl ƀon lan:

“Ngih dak ntop kơl, kônh wa manh tay. Rnăk wâl geh oh nô ndrel rdâk njêng lôch nê hôm ntop kơl nar luh kan gay ntop kơl rnăk ach o đŏng. Tâm nê lơn lah geh Đoàn druh ndăm kơl rdeng lŭ loih, ndrel kơl an rnăk wâl gay kônh wa geh du mblâm jay răm mƀak”.

Năm 2023 mhe aơ n’gor Kon Tum hŏ n’gluh an manh geh 35 rmen prăk ntop kơl rnăk ach o, dăch kêng ach o rdâk njêng mhe n’hanh nkra uĕh tay jay ơm gŭ. Tâm nê 174 rnăk mô hŏ geh jay gŭ mô nâp uĕh ta 3 nkuâl: Kon Plông, Ia H’Drai, Tu Mơ Rông geh jay mhe wơt Tết đah du mblâm jay nâp uĕh ntơm bah 20 năm let lơ. Wa U Minh Nam, Groi kruanh Ban Dân tộc n’gor Kon Tum, an gĭt tâm  năm aơ n’hanh năm  2025 n’gor Kon Tum n’gluh rnoh tât ntop kơl 350 rnăk ach o,  dăch kêng ach o ƀư jay gŭ. Gay nău rhơn ơm tât đah ăp rnăk jêr jŏt ân geh ndơ kơl, ntơm bah ăp nar bôk năp bah năm mhe 2024, Ban Dân tộc n’gor Kon Tum hŏ an tĭng ƀư nău  kan dja:   

“Ăp đơn vị, n’gâng kan ta ntŭk hŏ rgum an tĭng ƀư uănh năl tay lam lĕ rngôch, năl nău ŭch geh nău kơl, săk nuĭh kơl gay rdâk njêng tay trong nchrăp tĭng ƀư tâm năm 2024- 2025. Nsrôih gay ƀư lôch jêh n’hanh tât rlău nău ŭch geh kơl ƀư jay an rnăk ach o, ƀon lan rnoi mpôl đê̆ n’hanh rnăk ach o nuĭh Yăn gŭ  rêh ta xã, thôn dŭt jêr  jŏt tĭng di nău way”.

Ntơm  bah nău mât uănh khlay bah Đảng, Ngih dak, ăp n’gâng kan ta ntŭk ndrel nău tâm rŏng bah oh nô, rnoi deh keh na, Tết dja ăp rnăk ach o ta n’gor Kon Tum geh tay âk nău rhơn. Ăp mblâm jay mhe têh uĕh răm mƀak tâm ban kơt ntop tay suan ntrôl  n’hanh kơl nuĭh ƀon lan nâp jâng nsing rlău mpông mpêr mông nar lăp tâm năm mhe Giáp Thìn 2024 đah nău nsing nơm rlău dơi jêr jŏt tâm pah kan jan sa gay geh nău rêh nar lơn ma hơm răm./.