Kêng măng dŭt năm, Y Dũng, rnoi Bunong, nsoh kho ao mhe, geh cán bộ Đồn Biên phòng mpông đah dak ba dih Thuận An sĭt ƀon Sar Pa, xã Thuận An, nkuăl Dak Mil, n’gor Dka Nông gay ndrel râng bôk nau kan Năm mhe Biên phòng duh răm nuih n’hâm ƀon lan. Y Dũng năm aơ dôl nti jrâu 6, lah kon rong tahen Biên phòng hŏ rlau 6 năm, geh cán bộ, tahen răk rong hăn nti tâm Đồn. Ntơm bah kon se mô lăng nti blau, mô lăng janh, geh nau mât chăm, ntĭm nti bah ăp mbŏ rong tahen, Y Dũng hŏ jêng kon se nti blau, janh lơn âk ngăn tâm nau ngơi. Tâm rnôk khuh n’gor lam ƀon lan vơt năm mhe drel tahen biên phòng, Y Dũng kŏ ndrel ma ăp băl tâm ban năm ma nơm pâl ăp nau kơt tâm ntrôl mâng, tâm têk rse, n’hăt ƀao:

            “Gâp geh ăp kônh tahen biên phòng kơl an, mât chăm ueh ngăn, kŏ rnơm ma nê ma gâp geh nau blau âk ngăn, gâp nsôih hăn nti ân ueh gay mô geh ƀư ăp kônh tahen biên phòng rvê rngot. Năm mhe, gâp ŭch ăp kônh tahen biên phòng geh n’hâm soan, pah kan ueh”.

            Ndrel ma cán bộ, tahen Đồn biên phòng mpông Thuận An ƀư bôk nau kan năm mhe duh răm nuih n’hâm ƀon lan, yuh H’Loen, Bí thư đoàn ƀon Bu Dak, xã Thuận An mbơh, rup gui bah tahen biên phòng ueh ngăn ma kônh wa nkuăl n’har bri. Ăp năm rlau aơ, ăp tahen mro hăn ndrel ma kônh wa tâm ƀon. Ăp nô kơl an ƀon lan pah kan jan sa, hun hao tuch tăm, ƀư ngih ân ăp rnăk, jêh ri hôm nkra ngih, n’hao ƀư ăp ntŭk ntu gung trong, trong hoch dak gay kônh wa hăn ri nơih lơn, tăm tơm si. Ntuk geh nau jêr ri ta nê geh ăp nô. Ndri ma, kônh wa vơt năm mhe ndrel tahen  grat ndrih lơn ma duh răm, tâm rnglăp:

            “Kônh wa tâm ƀon rhơn ngăn rnôk ndrel vơt têt ma ăp tahen biên phòng. Ăp nô hŏ kơl an kônh wa âk ngăn tâm nau rêh ndrel tuch tăm. Năm mhe ri gâp ĭch ăp nô tahen biên phòng geh n’hâm soan, pah kan ueh ndrel lŏ tâm rnglăp ndrel ƀon lan tâm nkuăl n’har bri”.

            Ndrel nklâm bánh chưng ma tahen biên phòng ndrel kônh wa ƀon lan gay vơt Tết, yuh H Lo Ren, nai nti mầm non Hoà Bình, ƀon Sar Pa, xã Thuận An mbơh, âk năm ma aơ, nau kan nchrăp vơt tết duh răm, rhơn m’ak ndrel tâm rnglăp aơ kŏ geh ƀư ueh ngăn:

            “Nai ntĭm nti kon se bah phung hên hŏ hăn ndrel ma tahen biên phòng tâm âk nau kan ndrel âk năm hôm. Mra dơi lah, tahen biên phòng lah ntŭk nsing ân ƀon lan tâm nkuăl n’har bri, phung hên rhơn ngăn. Năm mhe ri gâp ŭch ăp tahen biên phòng geh n’hâm soan, ƀư ueh ăp nau kan geh jao”.

            Thượng tá Nguyễn Văn Thắng, Chính trị viên Đồn biên phòng mpông đah dak ba dih Thuận An, mbơh, rmôt kan geh nau kan mât trong n’har jong 10km ndrel xã Thuận An, nkuăl Dak Mil. Cán bộ, athen tâm đồn mro năl đồn lah ngih, nkuăl n’har bri lah ƀon tơm, kônh wa ăp rnoi lah oh nô dak mham. Ăp năm rlau aơ mro ƀư ueh nau kan: “3 mât: mât ntŭk kan, mât nkual, mât ƀon lan” ndrel :4 ndrel: Ndrel sa, ndrel gŭ, ndrel kan, ndrel ngơi nau ngơi kônh wa”. Ăp nar, ăp rmôt kan ndăn nŭih bu rnơm, kruanh ƀon gay ma nkoch trêng, bonh đă, kơl an ƀon lan gĭt nau kan, ntrong n’har bri gay ma mô dơi ƀư tih yor nkuăl, rmôt mât, mbơh năn ăp nau tih nkuăl neh bah neh dak. Ngăn lah, naukan ƀon lan mât êng trong n’har bah neh geh n’gâng ntăm. Bah nê, ăp nhoat ndâk nuih n’hâm ƀon lan, mât nâp nkuăl n’har bri bah neh dak.

            Thượng tá Nguyễn Văn Thắng kŏ mbơh, gay kơl an ăp rnăk geh nau rêg jêr jŏt ndrel kônh wa rhơn vơt năm mhe, sa Tết, Đồn Biên phòng mpông Thuận An tâm rgop ma Hội chữ thập đỏ nkuăl Dak Mil ndrel UBND xã Thuận An ƀư bôk nau kan năm mhe biên phòng duh răm nuih n’hâm ƀon lan. Tâm nau kan, mra njoăl tât ƀon lan âk nklâm ndơ khlay:

            “Rmôt kan tâm rgop ma Hội chữ thập đỏ nkuăl Dak Mil ndrel UBND xã Thuận An ƀư bôk nau kan Năm mhe biên phòng duh răm nuih n’hâm ƀon lan. Bôk nau kan pă rlau 200 nklâm ndơ, 25 thẻ Bảo hiểm y tế, 46 nklâm prăk, rnoh rlau 200 rkeh. Ndrel ma nau ƀư bôk nau kan năm mhe biên phòng duh răm nuih n’hâm ƀon lan ri rmôt kan đă 2 rmôt hăn kan tât sa tết nsum ma kônh wa, ƀư ueh nau kan chính trị, nau mĭn, nsôih mât đăp mpăn nkuăl n’har bri tâm trong geh pă mât njrăng”.

            Ndrel ma ƀon lan lam dak, cán bộ, tahen ndrel ƀon lan tâm nkuăl n’har bri Xã Thuận An, nkuăl Dak Mil, n’gor Dak Nông dôl vơt năm mhe tâm rnglăp, ăp nau tâm boh tahen ƀon lan. Tahen ƀon lan nsum n’hâm gay nkual n’har bri Thuận An lah êng, n’gor Dak Nông lah nsum ntop tay nau nâp ndrel nar lơn hun hao./.