Dôl tâm yan mih, thiếu tá Nguyễn Phúc Thuận (Đồn Biên phòng Dak Lao) ntĭm kônh wa ta thôn Đắk Thô, xã Đắk Lao, nkuăl Dak Mil, n’gor Dak Nông mât chăm cà phê. Rnôk aơ, tơm cà phê geh bu tuh, ngăn lah mbring, tu chuh, kro n’ging, kro play. Thiếu tá Thuận ndrel cán bộ mbơh nau kan njrăng bru tuh ân săk tam. Ntơm rnôk geh pă ƀư nau kan rƀŭn ndrel chi bộ Thôn Đăk Thọ, nô mro nsôih kơl an kônh wa tuch tăm, mhâm ƀư ăp nhoat n’hao nau rêh bah ƀon lan tâm nkuăl n’har bri:

‘Gay đăp mpăn ân tơm ntil, mpa rong tâm di, gâp hŏ joi gĭt, tâm rgop nsum ma chi hộ nông dân xã, nkuăl mĭn ăp ntil tơm ân tâm di gay ma râng kơl mbơh nchră nau ân kônh wa dơi kơt tĭng. Leo sinh viên tâm nchră ma kônh wa nau kan ân tâm di gay kônh wa tĭng kơt. Gâp kŏ đă ăp cán bộ jur tâm nkuăl, tâm thôn gay ma râng kơl an ăp rnăk mâp jêr”.

Wa Nguyễn Khắc Chinh, Bí thư Chi bộ thôn Đăk Thọ, xã n’har bri Dak Lao, nkualư Dak Mil, n’gor Dak Nông mbơh, ntơm nar thiếu tá Nguyễn Đức Thuận geh pă ƀư rƀŭn rgum, ăp rơh rƀŭn khuh lơn. Âk nau ntrŭnh ƀư ngăn ma nau rêh, tuch tăm geh chi bộ đă ndrel ƀư săk tam. Ăp đảng viên kŏ gĭt kloh lơn mpeh nau kan, nau leo trong bah nơm, nsôih hun hao văng sa, janh rgâl tơm tăm, mpa rong, tăm tơm cà phê. Thôn hôm âk rnăk jêr, Thiếu tá Thuận ndrel chi bộ thôn hŏ bonh đă, rgop nkra 4 ngih kơl an. Tĭng wa Nguyễn Khắc Chinh, ntơm ăp nau kan bah Thiếu tá Thuận, kônh wa tâm nkuăl n’har bri lơn ma rnơm ăp tahen biên phòng:

‘Đồng chí Thuận lah du cán bộ mom, gơih lă kan, gơih ngăn tâm âk nau kan. Nkah đă chi bộ kŏ kưt lah kônh wa tâm thôn tuch tăm, ƀư tĭng nau ntrŭnh mât n’har bri. Dŭt n’hâm geh nau khlay ndrel geh nau ŭch ngăn”.

Nsôih “pe mât dăch, puăn ndrel” gay “mih jŏ mbĕ neh”, ăp đnagr viên biên phòng geh leo rƀŭn ndrel ăp chi bộ thôn, ƀon tâm nkuăl n’har bri Dak Nông kơl an kônh wa rgâl nau mĭn, nau kan, n’hao nau rêh. Wa H’Xuân, Groi Bí thư nkuăl Dak Mil, n’gor Dak Nông, mbơh:

‘Đah rmôt tahen biên phòng lam nkuăl ri kŏ ndâk âk nau kan, bôk nau kan geh tâm pă nkoch ak ngăn. Ăp nau kan nê geh trêng, ndrel ƀon lan tâm nkuăl rnê prêh. Rgop nau tâm nau ndâk ƀon tơm Dak Mil, ngăn lah ƀư ueh ăp nau ntrŭnh bah Đảng mpeh hun hao văng sa rêh jêng ndrel ndâk rnă njrăng, neh dak tâm nkuăl”.

Đah nau nsôih, kơl an bah ăp tahen grat ndrih, văng sa, rêh jêng bah kônh wa tâm n’har bri Dak Nông ăp nhoat geh n’hao. Kŏ tă bah nê, kônh wa kŏ dơi n’hao nau mât neh ntu, n’har bri bah neh dak.

Njok trong n’har jong bơi tât 20km tâm xã Thuận Hạnh, nkuăl Dak Mil, n’gor Dak Nông geh âk mir bah ƀon lan ƀư tă bah jŏ. Nô Y Quyết, rnoi Bunong, tâm ƀon Sarpa, xã Thuận An, nkuăl Dak Mil, ƀư cà phê tâm nkual n’har bri Thuận Hạnh, nkoch, ăp rnôk hăn ƀư mir ri kŏ ndrel ma vcán bộ biên phòng nsum ty mât trong n’har bri, n’gâng n’har:

‘Rnăk gâp geh mir ta aơ, ndrel geh n’gâng tâm mir nkre ri. Ăp rnôk hăn kan ri gâp kŏ muih pih êp n’gâng. Ndrel lah saơ nŭih mô mơng lăp tâm nkuăl n’har bri ri hên kŏ mra mbơh ân tahen biên phòng mbơh. Tahen Biên phòng gă mêt uănh ƀa ƀơ ri hên kŏ đăp mpăn ƀư mir ta aơ đŏng”.

Hôm nô Nguyễn Văn Tuynh tâm xã Thuận Hạnh, nkuăl Dak Mil nkoch, đah nau tâm dăch bah tahen biên phòng, ƀư ueh nau kan nkoch trêng, bonh đă, kônh wa ta nkuăl n’har bri mro ƀư nau kan mât đăp mpăn, mât đăp mpăn nkuăl n’har bri tâm nkuăl neh bah neh dak:

‘Ta aơ lah nkuăl trong n’har bri, ri ma rnôk nơm saơ ăp nau mô ueh, mô tâm di, kơt lah geh nŭih mô năl, ri nơm mra mbơh nkre ân tahen mô lah đồn. Lah nsum nau tâm boh đah Đồn biên phòng đah ƀon lan ta aơ ri ueh ngăn”.

Tĭng Trung tá Lương Đình Hùng, Chính trị viên Đồn Biên phòng Dak Song, n’gor Dak Nông, năl lah mât nâp nkual n’har bri mô knŭng lah nau kan bah cán bộ tahen Biên phòng ma hôm lah nau kan bah ƀon lan, ân geh nsing tâm n’hâm bah ƀon lan đŏng. Tâm dăch đah ƀon lan, rmôt kan vay ƀa ƀơ mât chăm kơl an ân nau rêh, “ndrel gŭ, ndrel sa” ndrel gĭt nau ma ƀon lan tâm nkual n’har bri. Nkre lah, ƀư ueh nau kan kơl tâm mbơh nchrăk, ndrel đah gưl uỷ, n’gâng kan tâm nkuăl ƀư ueh nau kan lam ƀon lan mât đăp mpăn trong n’har bri, n’gâng n’har, ngăn lah đah ăp rnăk vâl rêh mô lah geh neh mir tâm êp n’har bri:

‘Năl lah êng nau kan biên phòng ri rmôt kan hên ân geh nsing tâm ƀon lan, ƀon lan lah tơm tâm nau kan mât nkuăl n’har bri, tahen biên phòng lah rmôt kan tơm ƀư nau kan. Ăp năm ri rmôt kan tâm rgop nsum đah n’gâng kan xã ƀư âk nau kan văn háo njroh mprơ thể dục thể thao, ndrel lôch du năm ƀư nau kan lam ƀon lan mât đăp mpăn nkuăl n’har bri, gay ndrel ma ƀon lan ƀư ueh nau kan mât đăp mpăn nkual n’har bri tâm nkuăl”.

Ăp năm rlau aơ, tahen Biên phòng Dak Nông hŏ mbơh 57 đảng viên mpeh nau rƀŭn tâm 55 chi bộ, thôn, pă nau kan 146 đảng viên ƀư nau kan bah ăp rmôt bah ăp rnăk vâl tâm nkual n’har bri. Ăp đảng viên hŏ ƀư ueh nau nau kan kơl tâm mbơh nchră, kơl an gưl uỷ, n’gâng kan tâm dâng n’hao nau rđau kan, ƀư ueh ăp nau kan hun hao văng sa, rêh jêng, đăp mpăn neh dak, rnă njrăng. Đah ăp nau kan ƀư ueh ngăn ndrel săk tam hŏ rgop nau n’hao nau rêh bah kônh wa ăp rnoi, bun dăp nau tâm rnglăp lam ƀon lan tâm nkuăl n’har bri. Êp ma ƀon lan, n’hao tay n’hâm dăng tâm ƀon lan lah nau dơi gay tahen biên phòng Dak Nông ndâk nuih n’hâm biên phòng lam ƀon lan, mât đăp mpăn nkual n’har bri ndrel nar lơn hun hao./.