Tâm 2 nar, ntơm lơ 22-24/4, ta nkuăl ƀon têh Buôn Ma Thuột, n’gor Dak Lak hŏ geh bôk nau kan “Nar rgum kon se 3 ueh” gưl kan Trung ương năm 2023. Nar rgum geh đah âk nau kan khuh m’ak kơt: tâm rlong ƀư ueh ân nthưp gŭ pâl, nau kan rƀŏng trong joi kan, ăp nau pâl nsum, tâm n’ur ndrel ma nŭih nơm ŭch rŏng, pă nklâm prăk kơl an kon se nsôih nti blau ndrel “kon se 3 nau ueh”. Rlau 1.500 kon se tâm ăp ngih săm ƀŭt THPT tâm nkuăl ƀon têh Buôn Ma Thuột hŏ geh nar tâm n’ur, tâm mbơh nchră nau.

“Kon se 3 ueh” (geh nau rêh ueh, ntĭm nti ueh, săk jăn ueh) lah nau kan tơm ngăn tâm nau kan Đoàn ndrel nau kan druh ndăm rmôt nti THPT. Bah ăp nau kan aơ gay saơ, rnê ryơk ndrel pơk rêng hvi lơn tay nau kan kon se ntoh lư geh nau dơi “Kon se 3 ueh” njêng nau tơm ân nau kan kon se nti geh dŏng ăp nau kan “Sinh viên 5 ueh”, “Kon se 3 chiăr nti” tâm ăp gưl kan ntĭm nti prêh lơn. Tâm năm aơ, Trung ương Đoàn tâm rgop nsum đah ăp ntrŭnh ƀư nar rgum kon se “Kon se 3 ueh” tâm 10 n’gor, nkuăl ƀon têh tâm lam dak./.