Đah nău ŭch mô rlu rgâl mhe, năm 2023, nău kan groi nđôi bah Quốc hội hŏ dơi an ƀư ăp kôp, lam lĕ rngôch, Quốc hội hŏ dŏng lĕ rngôch ăp trong ƀư groi nđôi gưl têh bah Quốc hội dơi luật n’glêh an kơt: Mĭn uănh siƀŭt mbơh bah ăp nhih pah kan ngih dak; ôp rkhêl n’hanh ơh nău  ôp rkhêl; groi nđôi way nkô̆; sŏk phiếu nsing nơm;… jêng nău ring tam mpeh nuih n’hâm nsrôih uĕh, rgop njêng nău rgâl lam lĕ rngôch mpeh nău gĭt êng, nău dơn kan bah ăp gưl, ăp n’gâng kan n’hanh nkô̆ nău dơi groi nđôi. Nar aơ, nkah ndray 78 năm nar sơch  lăp kan lam lĕ rngôch quốc hội lor bôk năp (6/1), geh nău nchih uănh tay nău kan groi nđôi năm 2023 bah Quốc hội:

 Nău nkah lor bôk năp nău kan groi nđôi gưl têh bah Quốc hội lah rơh ôp rkhêl n’hanh ơh nău ôp rkhêl ta rơh Hop tâl 6 rnôk dơi uănh năl lah “rgâl mhe”, “mha êng”, mô dơn nê “mô hŏ tă geh” rnôk uănh mpeh nău têh hvi nău ôp, trong ƀư, đah nău khlay uănh tay rlău n’gul năm kan. Mô hôm lah rơh ôp ngăn bah rơh hop ntơm nơh, ma rơh ôp dja hŏ nkah uĕh yor “lor bôk năp” dŭt mha êng kơt Kruanh Quốc hội Vương Đình Huệ lah:

Aơ lah lor bôk năp tâm năm kan khóa XV, Thủ tướng, lĕ rngôch ăp Groi Thủ tướng Chính phủ n’hanh 21 Bộ trưởng, Kruanh n’gâng kan hŏ ơh nău ôp rkhêl bah ăp nuĭh đại biểu Quốc hội. Đah nău ôp dŭt lam hvi, geh tât 21 trong kan êng êng, 10 nghị quyết bah Quốc hôị dơi dăp rgum jêng 4 rmôt trong kan tĭng nău mĭn mhe bah Ủy ban Thường vụ Quốc hội.

Lor bôk năp tâm năm kan khóa 15, Quốc hội ƀư ôp rkhêl ăp  nuĭh kan tâm Chính phủ mpeh nău tĭng ƀư ăp nghị quyết bah Quốc hội Khóa 14 n’hanh ntơm  bah bôk năm kan Quốc hội Khóa 15 tât lĕ rơh hop tâl puăn mpeh groi nđôi way nkô̆, mpeh nău ôp  đah ăp trong kan. Nău ôp jru hvi, geh tât 4 rmôt trong kan wăng sa rgum; wăng sa n’gâng kan; nội chính, tư pháp; văn hóa, rêh jêng kon nuĭh. Rơh ôp rkhêl hôm geh tay nuĭh mhe đŏng, nê lah ăp Chủ nhiệm Ủy ban bah Quốc hội “ơh nău ôp” rblang kloh nkô̆ nău đŏng. Đại biểu n’hanh cử tri rnê âk da dê nău kan groi nđôi bah Quốc hội.

Bah năp nê, ta rơh hop tâl 5, đah 4 rmôt trong kan: nuĭh kan, tahen ơm sôt rmanh n’hanh lam rêh jêng kon nuĭh; khoa học n’hanh công nghệ; ntung trong nchuăn rdeng n’hanh rnoi mpôl đê̆ dơi sơch, âk rnoh nkah uĕh, lor bôk năp  dơi geh ta rơh ôp rkhêl đah nuih n’hâm “5T” (Dŭt nuih n’hâm – Dŭt suan rhal – dŭt nsrôih uĕh – Lĕ săk nơm – Dơn kan), nê lah: 454 tơ̆ đại biểu đăng ký râng ôp rkhêl, 112 đại biểu tĭng ƀư nău dơi ôp rkhêl n’hanh 49 tơ̆ đại biểu tâm rlăch gay ƀư kloh lơn nkô̆ nău- aơ lah ăp rnoh dŭt âk mô hŏ tă geh.

Đah nău nchrăp âk mpưm mpeh rgum prăp nău lư, mô kă rnam, ăp đại biểu hŏ ôp rkhêl tât dŭt nău dơn kan mât uănh ngih dak bah ăp nuĭh mât bôk kan n’hanh ăp nhih pah kan dơi kan ma ăp ti n’hơr dăn tâm rlăch nău. Tĭng ăp đại biểu Trần Thị Vân, mpôl Bắc Ninh nău âk đại biểu pet nút tâm rlăch nău mpơl nuih n’hâm dơn kan groi nđôi tât dŭt n’hanh an saơ nău geh bah nuĭh ƀon lan, nău geh bah neh dak hŏ ndơ̆ luh bôk năp lĕ rngôch.

Mông nar ta hội trường dŭt khuh n’gôr, mô dơn âk ăp đại biểu ôp rkhêl ma lôch ôp rkhêl rnôk Bộ trưởng ơh ri hôm geh ăp đại biểu ŭch tâm rlăch nău âk lơn đŏng.

Đah nău groi nđôi way nkô̆, du way nkô̆ groi nđôi bah Quốc hội dơi tĭng ƀư n’gul năm kan, "uănh lor nău tih", ndrel đah rnôk an ƀư, mât bôk kan. Lor bôk năp, du nkô̆ way groi nđôi rgum lĕ 3 bôk nău kan gưl neh dak khlay bah neh dak kơt Groi kruanh Quốc hội, Kruanh mpôl groi nđôi Trần Quang Phương lah rjăp:

Aơ lah lor bôk năp Quốc hội groi nđôi rgum lĕ 3 bôk nău kan gưl neh dak n’hanh dơi ƀư ta n’gul năm kan. Nău nê mbra mpơl kloh trong rƀŏng bah ơm, bah ngai bah Quốc hội gay ndrel hăn Chính phủ.

Đah nuih n’hâm nchrăp lor, “groi nđôi” ân “grêt dăch”, sŏng dăng, mô der, ngăch năl ăp jêr jŏt, kŏ kol, Quốc hội ndrel hăn tay đah Chính phủ gay joi luh ăp trong nkra tâm di lơn, lơn lah rnôk mông nar tĭng ƀư pe bôk nău kan gưl neh dak lvang năm 2021- 2025 hôm bar năm đŏng lah tât rnoh. Groi nđôi đah nuih n’hâm rloh rlău lah rdâk njêng n’hanh lơh chôt, tâm nê rdâk njêng nha hôm lah tơm khlay gay ăp nău kan nar lơn ma uĕh lơn, aơ lah nău ma Kruanh Quốc hội Vương Đình Huệ hŏ lah rjăp tâm âk rơh hop n’hanh đah năm 2023, Kruanh Quốc hội lah rjăp, groi nđôi way nkô̆ lah du ntŭk chrat ang tâm nău kan Quốc hội:

Groi nđôi lah rêng kan dŭt khlay, n’gâng tơm gay rgâl mhe tay, ma trong groi nđôi dja gay he saơ lam trong kan pháp luật mhâm ƀư, ăp nkô̆ nău jŏ jong, jăch ndăn gay droh rklaih. Groi nđôi bah năm aơ uănh khlay tâm groi nđôi nău kan, jêng lah groi nđôi ăp ntil nău dôl geh. Kơt groi nđôi grêt dêh 3 bôk nău kan gưl neh dak lah du nău ntĭt. Yor geh rơh groi nđôi dja jêng rơh hop ndal tât dja mơ geh Nghị quyết mpeh nău n’gluh an dŏng 1 đêt trong kơl gay ntrôl ngăch tĭng ƀư 3 bôk nău kan gưl neh dak dja hao, ri groi nđôi mơ geh nău tam, geh nkô̆ hôr khlay, krêp dêh đah nău rêh. Groi nđôi nta trong dơh an hun hao lah ta ntŭk nê.

Đah nuih n’hâm “nsĭt n’hâm n’hôr nău rêh tâm ntŭk tâm nchră”, mât nău ton Quốc hội way djăt nău lah bah ngăn ngăn, nău mpŏng ŭch bah ƀon lan, năm 2023, lor bôk năp, Quốc hội tâm nchră ta Hội trường mpeh siƀŭt mbơh lôch jêh geh groi nđôi nău nkra ăp nău dăn đă bah cử tri njuăl tât rơh hop tâl 4 n’hanh rơh hop tâl 5, Quốc hội khóa XV. Nău dja an saơ na nê̆ an nuih n’hâm rgâl mhe, dơn kan, nău uănh khlay nău rgop bah cử tri, uănh khlay tât nău lôch jêh nkra nău dăn đă bah cử tri bah nhih pah kan ntơh măt dŭt têh bah ƀon lan; njêng nău nsing nơm dŭt têh rnôk groi nđôi hŏ lăp tâm nău rêh bah ƀon lan, nău rvê bah ƀon lan, mĭn rvê ăp nău rvê bah nuĭh ƀon lan./.