Ta rơh rƀŭn tal 4, Quốc hội dŏng âk nar gay ma tâm nchră ndrel nau tă geh ƀư bah nau kan hun hao văng sa, rêh jêng, tơm prăk ngih dak. Ntoh nau tâm nar rƀŭn, Kruanh Quốc hội Vương Đình Huệ rhơn, rnê prêh ăp nau tă geh khlay, ăp ntil hŏ geh dơi mpeh hun hao văng sa, rêh jêng, đăp mpăn neh dak, rnă njrăng, kơl an ƀon lan, mât chăm nŭih geh n’hâm. Tĭng uănh rơh rƀŭn bah ăp ntŭk nkoch mbơh nau, wa K’Tân (rnoi K’ho) tâm xã Đạ Đờn, nkuăl Lâm Hà, n’gor Lâm Đồng, mbơh:

‘Mhe aơ kônh wa nkuăl Lâm Hà uănh Quốc hội rƀŭn tal 4, Quốc hội gưl 15. Âk nkô̆ nau ŭch bah kônh wa geh Quốc hội tâm nchră, kơl an. Bah nê mra kơl an nŭih ƀon lan rnoi mpôl đê̆ hun hao văng sa, nau kơl an mpeh prăk khay ân cán bộ nŭih pah kan nŭih rnoi mpôl đê̆ ueh ngăn. Quốc hội rƀŭn rơh aơ nchră âk nkô̆ tâm di ma nuih n’hâm ƀon lan, ƀon lan rhơn ngăn ndrel ŭch mhâm ƀư gay kơl an âk lơn ân nŭih rnoi mpôl đê̆ tâm nau ntĭm nti, pơk jrâu nti nau tăm cà phê, tiu, điều, tơm mắc ca, rong sur, rpu, ndrôk”...

Lôch rơh rƀŭn dŭt năm 2022, Quốc hội đă Uỷ ban Rnâng kan Quốc hội, Chính phủ, Thủ tướng Chính phủ, Hội đồng Dân tộc, ăp uỷ ban bah Quốc hội, ăp gưl, ăp ntŭk kan ndakl ƀư ăp nau ntrŭnh geh Quốc hội nchră. Ăp ntoh măt Quốc hội ơm mâp cử tri gay ma mbơh nau geh bah rơh rƀŭn, mât nau tâm boh rjăp, djăt, nkoch mbơh tâm di ndrel nau ŭch bah ƀon lan. Ăp gưl, ntŭk kan nsôih ƀư ân geh săk tam nau kơl an, mât chăm nau rêh, nuih n’hâm ndoh ndơ ân ƀon lan, nchrăp ueh ăp nau tŏng dơi kơl an ƀon lan vơt năm mhe 2023 ndrel Tết năm mhe Quý Mão. Tâm nar rƀŭn mâp cử tri jêh rơh rƀŭn tal 4, Quốc hội gưl 15, wa Pang Ting Brăng (rnoi K’ho) tâm Tổ dân phố 1, nkuăl têh Lạc Dương, nkuăl Lạc Dương, n’gor Lâm Đồng ân lah, ăp rơh rƀŭn bah Quốc hội nchră nau kơl an ri ma kônh wa kơt tĭng uăn. Bah ăp rơh rƀŭn mâp, kônh wa nkoch mbơh, geh ăp ntoh măt Quốc hội nchră. Ăp nau ntrŭnh nê lăp tâm nau rêh. Wa Pang Tinh Brăng, ngơi:

‘Rnôk aơ Ngih dak mro kơl an hăn ndrel ma nŭih ƀon lan, mro geh nau kơl an ƀon lan. Ngăn lah tâm ăp nkuăl hŏ pơk âk jrâu nti nau kan tuch tăm, gay ƀon lan blau kơt tĭng ăp nau kan mhe tâm nau tuch tăm, mât rong. Yơn nŭih ƀon lan gơih râng ăp jrâu ntĭm nti nê ndrel kơt tĭng nau tâm pah kan jan sa, tuch tăm, mât rong. Yơn lah nŭih ƀon lan lah gơih kơt tĭng ăp jrâu ntĭm nti nau pah kan jan sa, ri ngăn lah nơm kŏ mra geh nau blau ndrel nau geh jêng mra âk lơn đŏng. Lơn ma nar nơm lơn ma ƀư ueh lơn, nau ueh kah, âk ri mra tăch luh mra nơih tam lơn”.

 Jêh rơh rƀŭn tal 4, Quốc hội gưl XV, dŭt khay 11/2022 mhe rlau, Uỷ ban Rnâng kan Quốc hội hŏ rƀŭn rơh rƀŭn tal 17, yor ri nchră mbơh nau ân ntop tơm prăk hun hao tơm prăk Trung ương lvang năm 2021-2025 ân 3 Bôk nau kan bah neh dak. Tâm nê, bôk nau kan bah neh dak hun hao văng sa, rêh jêng nkual rnoi mpôl đê̆ ndrel gôl yôk lah bơi tât 2.500 rmen; Bôk nau kan nkô̆ nau bah neh dak n’huch ach o nâp nâl lah 2000 rmen; Bôk nau kan bah neh dak ndâk njêng ƀon lan mhe lah 3000 rmen. Aơ lah ăp nau kan geh kơl an, âk mpưm cử tri Tây Nguyên kơl an. Wa K’Khet Atô, Groi Kruanh rnâng kan Ban Dân tộc n’gor Dak Nông lah rjăp:

  ‘Mpeh bôk nau kan bah neh dak tal 3 aơ lah bôk nau kan têh. Rnôk aơ tâm Dak Nông ƀư tĭng di nau ntrŭnh bah Quốc hội ndrel Chính phủ nchrăp luh, phung hên kŏ ƀư rjăp. Aơ lah ngoai tâm ăp bôk nau kan geh ƀon lan kâp rnơm, yor aơ lah nau kan tâm di nuih n’hâm bah Đảng bah ƀon lan. Rnôk aơ hŏ geh 10 bôk nau kan geh Thủ tướng ân ƀư. Kơt lah Sở Văn hoá, Thể thao ndrel pâl n’aih geh du nau kan ntĭm nti ân ƀon lan ăp ƀuôn, ƀon hun hao pâl n’aih nsum mpôl, mât ăp nau ueh ơm bah nkuăl nơm”.

Gay dơi ƀư 3 bôk nau kan aơ, n’gor Dak Nông nchrăp ntop rlau 1000 rmen prăk ƀư ăp nkô̆ nau: Ndâk njêng ƀon lan mhe; hun hao văng sa, rêh jêng nkuăl rnoi mpôl đê̆ ndrel gôl yôk ndrel n’huch ach o nâp nâl.

Đah ăp nau kơl an tâm di bah Quốc hội, Chính phủ, ăp n’gor Tây Nguyên ŭch năm 2023 ndrel ăp năm ba kơi tay geh nau dơi hun hao rjăp dăng, gay Tây Nguyên rlet nsôih hao ndrel ma lam dak./.