Tĭng nau ntrŭnh bah Luật Bảo hiểm xã hội rnôk aơ, ăp nŭih rgop prăk Bảo hiểm xã hội rlau 35 năm đah nŭih bu klô ndrel rlau 30 năm đah bu ur ri rnôk rlu ranh, êng prăk rlu ranh ăp khay khân păng geh kơl an du tŏ rnôk rlu ranh ân rnôk rgop Bảo hiểm xã hội ma rlet rlau năm tâm ban đah rnoh prăk rlu ranh âk ngăn lah 75%. Ngăn lah, rnoh kơl an du tŏ lah: Du tăm rlet rlau, mra geh kơp tâm ban 0,5 prăk khay ăp khay. Wa Nguyễn Duy Cường, Groi Kruanh Vụ Bảo hiểm, Bộ Lao động Thương binh ndrel Xã hội mbơh:

 ‘Đah nau ntrŭnh rnôk aơ, ri nau ngăn bah du đê̆ ntŭk kan, rmôt kan tăch rgâl, rnôk nŭih pah kan tât năm rlu ranh jêh ndrel bu geh năm rgop Bảo hiểm xã hội geh âk tâm ban 75% ri ngăn lah mra nsrŭng, gay ma ƀư nau rklaih prăk ân rlu ranh đah ntŭk kan Bảo hiểm xã hội. Jêh nê, bu mơ lŏ râng, yor khân păng râng âk ngăn lah 75% jêh ndrel tŏng nau dơi gay ma rlu ranh. Ndri ma, lah jêh rlu rang nê mơ lŏ râng ƀư tay nau kan. Kơt lah, đah nau ntrŭnh rnôk aơ ri nau ntrŭnh Bảo hiểm xã hội mô geh nau ntrŭnh tât kan jă tay đah nŭih nê pah kan gay ma râng, gay rgop Bảo hiểm xã hội”.

            Mpeh nau n’huch nau dơi rnoh năm rgop Bảo hiểm xã hội đê̆ ngăn geh kơl an prăk khay rlu ranh ntơm 20 năm hôm 15 năm dôl ndơn geh nau kơl uănh bah ƀon lan. Wa Nguyễn Duy Cường mbơh, nau ntrŭnh aơ gay njêng ân nŭih râng la (ntơm 45-47 năm mơ geh râng) mô lah nŭih râng mro tât rnôk rlu ranh hôm geh têm tŏng 20 năm rgop Boả hiểm xã hội kŏ geh kơl sa prăk khay ăp khay. Kơt ri, ăp nŭih aơ bah năp nơh mô geh prăk rlu ranh, rnôk aơ geh kơl prăk rlu ranh ăp khay, rnoh prăk khay mra geh Ngih dak ntrơn rgâl ndrel nkre tâm rnôk râng sa prăk khay mra geh tơm prăk Bảo hiểm xã hội rvăt ân Bảo hiểm y tế.

Gay bonh đă nŭih kan lŏ rgop Bảo hiểm xã hội jêh rnôk rlu ranh, gay nkre kơl an rnoh prăk khay rlu ranh, n’hao nau dơi ân nŭih kan, nkre mât ân ueh lơn ân nŭih pah kan tâm rnôk pah kan, Nau nchrăp Luật Bảo hiểm xã hội (rgâl nkra) leo luh nau đă, đah 2 nau kan, geh ntrơn rgâl, ntop tay nau ntrŭnh mpeh pă prăk du tŏ jêh rnôk rlu ranh gay ma bonh đă nŭih kan lŏ rgop Bảo hiểm xã hội jêh rnôk rlu ranh. Nua kan 1 ntrŭnh: Rnoh kơl an du tŏ jêh rnôk rlu ranh kơp tŏng rnoh năm rgop bảo hiễm xã hội âk lơn rnoh năm tâm ban đah rnoh prăk rlu ranh 75%, ăp năm rgop bảo hiểm xã hội ri geh kơp tâm ban 0,5 tŏ rđil nau geh prăk khay ƀư nau rgop bảo hiểm xã hội.

Nau kan bar ntrŭnh: Rnoh kơl an rnôk rlu ranh kơp tĭng năm rgop Bảo hiểm xã hội âk lơn rnoh năm tâm ban đah rnoh prăk rlu ranh 75%, ăp năm rgop Bảo hiểm xã hội ri geh kơp tâm ban 0,5 tŏ bah nau geh prăk khay nsing tâm nau rgop Bảo hiểm xã hội. Đah nŭih kan tŏng nau dơi sa prăk khay rlu ranh ri tĭng nau ntrŭnh Điều 71 ndrel Điều 72 bah Luật aơ ma lŏ rgop prăk Bảo hiểm xã hội ri ăp năm rgop Bảo hiểm xã hội jêh rlu ranh âk lơn rnoh năm tâm ban, đah rnoh geh săk rlu ranh 75% ri geh kơp tâm ban 2 tŏ bah rnoh geh prăk khay nsing tâm nau rgop Bảo hiểm xã hội, Wa Nguyễn Duy Cường, Groi Kruanh Vụ Bảo hiểm xã hội, Bộ Lao động, Thương binh ndrel Xã hội mbơh:

‘Tâm nau nchrăp Luật Bảo hiểm xã hội (rgâl nkra) ri dôl đă nau rgop nau đă bah 2 nau kan. Tâm nê, ntop tay nau kan ntrŭnh đŏng lah: Đah ăp nŭih pah kan lŏ pah kan jêh rnôk rlu ranh, ri năm rgop Bảo hiểm xã hội jêh rnôk rlu ranh ma rlet rlau năm rgop tâm ban đah rnoh geh sa âk ngăn 75% nê, ri du năm rgop rlau nê lah kơp 2 khay prăk khay rgâl ma 0,5 prăk khay kơt nau ntrŭnh rnôk aơ. Đah nau ntrŭnh aơ, ŭch mra bonh đă ăp nŭih kan lŏ râng rgop Bảo hiểm xã hội jêh rlu ranh. Nau kan ma nŭih kan lŏ rgop Bảo hiểm xã hội jêh rnôk rlu ranh ri: Tal bôk năp mra đăp` mpăn ueh lơn nau dơi bah nŭih râng, jêh aơ ăp rnoh prăk khay rlu ranh mra geh âk lơn, tal 2 lah tâm rnôk pah kan ba kơi năm rlu ranh, yor nŭih kan hôm râng ri bu mra geh dơi ăp nau dơi êng, ăp nau kơl, kơt lah ăp nau geh tât ji kuet geh đăp mpăn ueh lơn./.