Ăp nău tâm rgop lĕ tŏng ăp, tâm nĕ rgum ta du đê̆ nkô̆ nău kơt: nău ntrŭnh mpeh mplơ̆ sŏk neh n’hanh nău kơl mpeh trok neh, kơl an, njêng ntŭk gŭ mhe, an manh neh, rgâl nkô̆ dŏng neh, nău way kan, nău kơl mpeh tơm prăk, rnoh khlăy neh.

Jêh rlau du khay nau nchrăp Luật neh ntu (rgâl nkra) geh leo luh sŏk nau rgop bah ƀon lan, hŏ geh âk nau rgop nchră bah N’gâng kan tuch ntu- gŭ âm, bah n’gâng kan ăp nkuăl ndrel ăp ntŭk, ăp rmôt...Ăp nau rgop geh tâm ban, tâm nê rgum tâm du đê̆ nkô̆ kơt: Nau ntrŭnh mpeh sŏk lơi ndrel ndrel nau trok, kơl an, gŭ mhe, pă neh, ân manh neh, ntrơn rgâl nau dŏng neh, nau kan tơm prăk, rnoh neh.

Bah nau tâm nchră sŏk nau rgop bah N’gâng kan ntŭk ntu-gŭ âm, wa Thái Như Hiệp, Kruanh hội đồng thành viên, Giám đốc Công ty TNHH Vĩnh Hiệp, nkuăl ƀon têh Hồ Chí Minh mbơh lah: Tâm nau nchră rgâl rnôk aơ, âk nau ntrŭnh tât jao neh, ân manh neh, ntrơn nau dŏng neh, tâm nê nau jao neh, pă neh ân ntŭk kan kơl hun hao văng sa, mra geh dơi. Ngăn lah, nau bư jao neh, ân manh neh ngăn bah bah nau rvăt nau dơi dŏng neh; Nau ntrŭnh tât ăp nau jao neh, ân manh neh mô geh nchră tât rnoh dơi geh dŏng neh, rlong rvăt ƀư kan geh dơi dŏng neh. Nchrăp kan ƀư kloh nau ân manh neh trok prăk ăp năm ndrel ntrŭnh ăp nau ân manh neh trok prăk du tŏ tâm ban đah nau geh, nau dŏng neh, đăp mpăn geh prăk. Yơn lah, bah nau ntrơn rgâl ân geh ƀư rjăp mpeh nau jao neh.

Tĭng wa Thái Như Hiệp, tâm rnôk văng sa hôm jêr, ngăn lah prăk manh ri luật mô hôm nkah nau pă neh ân ƀon lan mô lah ntŭk kan mra pơk âk nau nơih gay ntŭk ƀư kan ndăn dŏng săk tam ngăn neh, nau dăng bah ăp ntil neh gay kơl hun hao văng sa:

‘Luật rnôk ntop, rgâl mhe ri Ngih dak, ăp n’gor geh neh tuch tăm tâm nrôk mât, dŏng luật neh ntu rnôk pă neh ân ntŭk kan ri ân bu nau dơi dŏng neh nê gay ma bu ndăn dŏng neh ntu tâm di luật”.

Tâm rnôk sŏk nau rgop, nŭih ƀon lan kŏ ntoh nau kơl an, tâm ban đah ăp điều tâm luật nchră, ngăn lah ăp nau ntrŭnh mpeh trok tâm, kơl an, ntrơn ntŭk, sŏk lơi neh...Kơt lah, Điều 67 bah Nau nchrăp Luật (rgâl nkra) geh nau ntrŭnh mpeh sŏk neh gay hun hao văng sa, rêh jêng yor geh dơi bah neh dak, ƀon lan. Nchŏng bah Luật rnôk aơ ri saơ nau ntrŭnh bah nau nchrăp geh nau pơk hvi lơn, n’hêl lơn. Yơn lah, gay tâm ban nau gĭt ndrel der nau ntoh ăp tâm rnôk ƀư, ân ƀư kloh nkô̆. Nŭih geh nau dơi nơm sŏk lơi. Âk nau rgop ân lah, nau kan ân geh kloh rvah, tâm nuih n’hâm tâm ban nau dơi bah Ngih dak, nŭih geh nsĭt lơi neh ndrel tơm ntuh kơl, gay ƀon lan geh neh bu sŏk ân geh ntŭk gŭ, đăp mpăn nau rêh tâm ban mô lah ueh lơn.

Nô Phạm Phi Long, khu phố 3, Phường Tân Thuận Đông, Quận 7, Nkuăl ƀon têh Hồ Chí Minh ân lah: Aơ lah nau jêr geh âk nau phong. Ndri ma, ân geh nau ntrŭnh ân ăp nŭih ngăn n’hêl gay ma rklaih ăp nau kan ân tâm ban đah ngih dak, tơm ntuh kơl ndrel nŭih dŏng neh. Nkre lah, kơl an ăp nkuăl geh nau nchrăp rdâng lơn tâm nau ntuh kơl tơm prăk, n’hao nau nâp nau rgum, nau nchrăp dŏng tâm rơh tât:

‘Nau kan ntrơn rgâl ân geh nau rpŏng jŏ jong, geh nau mbơh gay ma der nau tâm rkeh, tâm nkol ƀư jêng nau phong lah, nchŭt dôih jŏ jong. Bah nê ƀư ueh nau dơi bah neh ntu ân hun hao văng sa rêh jêng ndrel ăp ntŭk kan rgop nau dơi dŏng neh, ntrơn rgâl tay neh ntu...”

Bah nau rklaih âk nau tih, Luật sư Huỳnh Hữu Nam, Đoàn Luật sư n’gor Đồng Nai mbơh: Ân geh ntop, ƀư jêh ăp nau đăp mpăn mbơh kloh tât nau rgum, nau dŏng, neh ntu, rnoh tăch rgâl đah ăp nau ƀư ngih, khu đô thị, ntŭk tăch rgâl. Kŏ kơt lah rgâl mhe, n’hao nau mêt uănh, rklaih nau tih, rklaih nau in, nau phong geh tât neh. Nŭih ƀon lan uănh ngăn rnôk ƀư jêh Nau nchrăp Luật neh ntu (rgâl nkra) lah nau dơi bah nŭih ƀon lan tâm nau dŏng neh, top, ƀư jêh ăp nau ƀư nau dơi bah nŭih dŏng neh tâm ăp nkuăl rgum, nau kan bah UBND gưl n’gor tâm rnôk kơp, rklaih ndrel mbơh kloh nau jăng, sŏk neh, ntrơn rgâl nau dŏng neh đah neh geh kơp dơn tâm nau nchrăp dŏng neh. 

Tĭng Luật sư Huỳnh Hữu Nam âk nau geh tâm nkuăl lơh khuch âk ngăn ân ƀon lan, n’gâng kan. Luật sư Huỳnh Hưũ Nam, ntoh nau:

‘Kônh wa knŭng blau ndŏ thuế mô geh ƀư nau kan tuch tăm ăp năm tŏng. Yơn lah, rnôk Ngih dak nsĭt neh, pơk săm ƀŭt ri mô saơ geh neh. Nchâp rnoh neh ân ƀon lan tĭng neh tuch tăm lah mô tâm di. Nau khlay lah mô uănh nau ndaka ntŭk gŭ mhe ân nŭih ƀon lan. Kŏ đă Ngih dak ân kơl an ntrơn rgâl ƀư ân kônh wa đăp mpăn nau rêh jêng”.

Âk nau rgop bah nau nchrăp Luật neh ntu (rgâl nkra) ân geh lŏ ƀư jêh nau kan mpeh tơm prăk ndrel neh ntu ân geh đăp mpăn ân tâm ban nau dơi bah Ngih dak, nŭih dŏng neh ndrel tơm ntuh kơl; geh nau kan tâm di, săk tam nau geh tă bah nau dŏng neh, prăk manh neh đah Trung ương ndrel n’gor. Luật kŏ ân ntrŭnh rnoh soay prêh lơn đah nŭih dŏng âk rnoh neh, âk ngih, rvăt têm neh, mbrơi dŏng neh, ndrel lơi dơm neh...Wa Phan Minh Thành, Giám đốc Sở Tài nguyên- Môi trường n’gor Long An ân lah, nau dŏng neh ân geh ƀư jêh mpeh rnoh neh đah ăp n’gor, nkuăl:

‘Rnoh neh aơ mra lah nau nsing gay ma kơp ăp rnoh neh n’ăp ma nau kan geh tât nau kan tơm prăk mpeh neh, kŏ kơt lah nau tăch dŏng bah nŭih dŏng neh. Hôm nsing tâm âk ntŭk, yơn ngăn lah jao ân HĐND n’gor ntrŭnh rnoh mrô rgâl gay ma ân tâm di đah nkuăl”.

Âk mpưm nŭih ƀon lan ŭch nau nchrăp Luật neh ntu (rgâl nkra) rnôk jêh, nchră ndrel ntrŭnh ƀư ân geh tâm ban mpeh rnoh, mrô tă bah Trung ương tât nkuăl. Nkre lŏ ntrŭt dăng nau pă gưl, pă nau kan hăn nsum ma nau mêt uănh nau dơi gay ma ƀư ân geh săk tam, rgop nau ân hun hao văng sa, rêh jêng./.