Yôk prêh ndrel ma bri duh nar hô mô geh ƀư nau n’huch nau kan tâm ‘mir mận tahen-ƀon lan’ bah nô Tếnh Ngọc Thái, xã Chiềng Tương, nkuăl Yên Châu, n’gor Sơn La. Aơ lah moh săk ma nô Thái kŏ kơt lah kônh wa nkah tât mir mận geh cán bộ, tahen Đồn Biên phòng Chiềng Tương kơl an:

            ‘Bah năp nơh gâp tăm mbo, neh chrăng ma mbo mô geh âk. Jêh nê geh cán bộ đồn Biên phòng Chiềng Tương kơl an tăm tơm mận, tât rnôk aơ hŏ geh pĕ 3 yan hôm. Tăm mân geh âk, rnoh khlay lơn rlau ma mbo, rnăk hên geh prăk gay ma pơk hvi nau kan, nkra ngih. Năm e rnăk hên geh 150 rkeh, năm aơ mận geh âk lơn yor tăm rlŏ yan tăch geh 20 rkeh hôm”.

Ăp yan play njŭng tâm mir ntơm rnôk geh tahen Biên phòng Chiềng Tương ntrŭnh ƀư nau kan kơl an kônh wa ntrơn rgâl tơm tăm tâm neh ntơm tăm mận gay ma rgâl neh tăm mbo. Mô êng săch ntil ndrel tăm, ăp tahen hôm kơl an kônh wa âk yan đŏng. Đại uý Vì Văn Lun, Kruanh Đội bonh đă ƀon lan, Tahen Biên phòng Chiềng Tương mbơh:

            ‘Phung hên hŏ tât ăp ngih, tât hăn uănh mir, pă kon ntil ân kônh wa, tăm ndrel ma mbơh kônh wa mât chăm tăm tơm. Gâp saơ rhơn ngăn yor kônh wa hun hao văng sa, nau rêh đăp mpăn”.

            Ăp cán bộ tahen kŏ kơt lah mbŏ, nô “kơl an” ân âk kon se nti bah 2 xã n’har bri Chiềng Tương ndrel Lóng Phiêng, nkuăl Yên Châu, Sơn La. Ngih ach o, geh 3 nŭih kon, tâm nê kon mpŭt nô Vì Văn Tuyền, xã Lóng Phiêng, nkuăl Yên Châu rven, nau rêh, văng sa âk nau jêr lơn. Rnôk trong hăn nti bah ăp kon ntôn lah mô jêng, kon bu ur nô Vì Văn Tuyền geh cán bộ, tahen Đồn Biên phòng Chiềng Tương kơl an tĭng nau kan “N’hao nhoat jâng oh hăn nti”. Nô Vì Văn Tuyền nkoch:

            ‘Rnăk hên jêr jŏt ngăn, lap lah geh đồn biên phòng kơl an kon gâp, kơl rnăk hên geh prăk nchrăp du gưl prăk nti ân kon, păng rvăt ndơ ngêt sa, ndơ dŏng...gay kon gâp geh hăn nti, geh sa hơm, nsoh răm”.

            Rlau 7 năm ma aơ, bôk nau kan “Kơl an nhoat jâng oh hăn nti” geh cán bộ, đồn Biên phòng Chiềng Tương ƀư ueh. Ăp khay, cán bộ, tahen rgop prăk khay ndrel joi nŭih kơl an ân 7 kon se, đah rnoh 500 rbăn/khay, ân tât rnôk kon se nti lôch jrâu 12. Êng nê, hôm kuăl jă ăp tahen ƀư nau kan taen kơl an kon se hăn nti, kơl 14 kon se đah rnoh prăk 1,2 rkeh/khay. Wa Phạm Thị Dinh, Groi Hiệu trưởng Ngih săm ƀŭt Lóng Phiêng A, nkuăl Yên Châu mbơh, nau kan geh nau khlay kơl an ngih săm ƀŭt jă kon se hăn nti, bonh đă nuih n’hâm nti bah kon se nkual ngai:

            ‘Ngih săm ƀŭt hên geh 8 kon se geh kơl an. Ntơm rnôk ăp cán bộ biên phòng kơl an ăp rnăk vâl geh nau nơih lơn ân kon hăn nrti, ăp oh kon se kŏ geh nau nsôih lơn, gơih lơn đŏng. Âk kon se geh nai nti ueh, blau, geh rnê lah ƀư jêh nau kan bah ăp năm, geh hiệu trưởng pă săm ƀŭt rnê đŏng”.

            “Đồn lah ngih, n’har bri lah ƀon tơm, kônh wa ăp rnoi lah oh nô du dak mbam” nau ƀư nê lah nau nsôih gay ăp cán bộ, tahen Biên phòng Chiềng Tương kơl an rlet nau jêr gay ƀư jêh nau kan, mât trong n’har, n’gâng, nkre mro tâm dăch ma ƀon lan, tâm dăch ƀon lan, gĭt ƀon lan, kơl an ƀon lan.

            Tĭng thiếu tá Nguyễn Công Lưu, chính trị viên đồn Biên phòng Chiềng Tương, du nau kan geh nau khlay geh ntrŭnh ƀư kŏ geh nsum ma nau ƀư nau rđau mrô 05 bah Bộ chính trị mpeh nau “Ntrŭt dăng nau ntĭm nti ndrel pah kan tĭng nau mĭn, nau rêh ndrel nau kan Hồ Chí Minh”:

            ‘Đảng uỷ, Rnâng kan rđau kan bah đồn hŏ ntrŭnh ƀư nau nkân njrăng nau kan, ndâk nau kan ntĭm nti ndrel ƀư tĭng nau Wa tâm di, săk tam tâm nkuăl 2 xã Lóng Phiêng, Chiềng Tương. Hên ndâk nau kan geh nsum ma nau ƀư ăp nar, ăp pơh, nsôih ƀư jêh nau kan mât đăp mpăn nkual n’har bri”.

            Ăp nau kan, nau ƀư n’hêl, ngăn, geh nau khlay kŏ leo tât nau rnơm ân kônh wa ăp rnoi bah nkuăl n’har bri đah ăp tahen grat ndrih, lah nau bonh đă bah tahen biên phòng ƀư jêh nau kan, mât đăp mpăn nau dơi, đăp mpăn nkual n’har bri, rgop n’hâm ndâk nkuăl nâp nâl ăp ntil./.