Lơn ma êp Tết năm mhe Quý Mão 2023, ăp n’gâng kan bah Dak Lak lơn ma ƀư ngăch nau nchrăp ân Lễ hội cà phê Buôn Ma Thuột tal 8. Đah rmôt kan cà phê Buôn Ma Thuột, tơm bah ăp nau nchrăp lah nau rlong mpli cà phê kah Việt Nam, mra geh ƀư rơh bôk năp. Tĭng wa Lê Đức Huy, Groi Kruanh rmôt kan cà phê Buôn ma Thuột, păng rnơm ngăn tâm rnôk nau tâm rlong êp tât mra geh bư dơi yor rmôt kan geh nau blau ơm ndrel nau rnơm bah ăp rơh tâm rlong cà phê kah, rlong vâr cà phê geh ƀư ntơm năm 2018 tât rnôk aơ. Wa Huy lah, ăp nau tâm rlong nkre lah nau pâl bah ăp nŭih ŭch cà phê kah Việt Nam, bonh nau ntuh kơl ân nau kah ngăn, ndơn bôk ăp nau tât mhe rnôk tây Nguyên ƀư nau ntrŭnh mrô 23 bah Bộ chính trị:

            “Êp nŭih ƀon lan ri ân geh nŭih ƀư kan ân blau, blau ngăn, gay ma n’hao nau dơi cà phê rnglay bah Việt Nam jêng cà phê kĭn êng ta Việt Nam. Dăch tât mra hôm geh nau blau lơn đŏng lah geh ăp nau kan kơl an rnôk ntuh kơl ta Buôn Ma Thuột. Ri đah ăp ntŭk pâl kơt aơ, nau ŭch ri nơm mra geh ăp nŭih vâr kĭn cà phê blau ngăn. Ăp nŭih nê mra janh ntuh kơl tâm nau kan vâr kĭn, ê nkra mpeh cà phê jru ngăn ta Việt Nam ndrel ta Dak Lak ndrel Buôn Ma Thuột”.

            Lah Tổng giám đốc, Bí thư Chi bộ du rmôt kan tăch rgâl, râng tâm lam ăp ntŭk kan ê nkra cà phê jru-play sa, wa Nguyễn Xuân Lợi-Công ty Cổ phần ntuh kơl ndrel Hun hao An Thái, n’gor Dak Lak lơn ma uănh kơl an âk tât nau ntrŭnh 23. Păng lah, nkô̆ nau hun hao cà phê ndrih, ueh tâm ban ân Tây Nguyên ma nau ntrŭnh mbơh lah nau tâm di, ndrel An Thái nơm kŏ dôl hun hao tĭng trong aơ, đah Ngih máy nkra cà phê 40 rbăn tấn/năm; lam ntŭk ndŏk cà phê jêh nkra kŏ geh dŏng gay ma nkra phân.

Yơn lah, gay geh dơi nau văng sa ndrih tâm ban ân lam Tây Nguyên, ri ŭch geh âk ngăn gay ma dơi tâm ban, wa Lợi ân lah, ân geh nau leo tâm ban nuih n’hâm bah n’gâng kan, ƀon lan ndrel ntŭk kan:

            ‘Aơ lah nau ueh. Mpeh ăp rmôt kan tăch rgâl ri nơm ân geh mĭn nau ntrŭnh nê moh nau geh ngăn, moh nau geh tâm rnôk gleh năm, moh nau geh tâm jŏ năm ndrel tâm ban đah nau ntrŭnh nê mpeh ntŭk kan tăch rgâl bah nơm nơm ân geh nau dơi gay ma kơt tĭng dơi nkre ri săk bah ăp ntŭk kan tăch rgâl ân gĭt kloh ăp nau nơih, nau jêr ndrel nau nkhêp rnôk ma ăp ntŭk kan tăch rgâl bah Tây Nguyên dŏng nau ntrŭnh 23 aơ. Ân geh tât nau dơi mât Ngih dak njêng luh nau kan ân tâm di, kloh aih gay ma kơl an ăp ntŭk tăch rgâl n’huch nau văk kol”.

            Năm 2023, năm bôk năp ăp n’gor Tây Nguyên ntrŭnh ƀư nau ntrŭnh mrô 23 bah Bộ Chính trị, geh ndŏ luh tâm nau kan văng sa geh nau nơih, rnôk nau hun hao văng sa bah ăp n’gor geh ntơm 7,6 tât rlau 12%, prêh lơn rđil đah rnoh 7 tât 7,5% ma nau ntrŭnh mrô 23 nchrăp tâm lvang tât năm 2030. Yơn lah, ăp n’gor Tây Nguyên kŏ ntoh âk nau ê dơi. Nkre ma n’gor Lâm Đồng, n’gor geh hun hao rlau 12%, prêh ngăn Tây Nguyên, ri ăp nau mô dơi hôm ơm, ngăn lah tâm nau rđau ndrel rgâl nau kan hành chính. Tĭng wa Trần Đức Quận, Bí thư n’gor uỷ, Kruanh HĐND n’gor Lâm Đồng, ăp nau ê dơi bah n’gor geh mât tâm âk năm. Lah mô ơm rklaih, Lâm Đồng jêr ngăn ƀư n’ho ăp nau kan têh hŏ geh ntoh tâm nau ntrŭnh 23:

            ‘Nchrăp mra hôm âk nau kan jêr, ntul rlong kŏ kơt lah ăp nau nkol, nau ê dơi tâm ăp nau kan, ăp ntŭk kan, ngăn lah nau ê dơi tâm nau rđau, đă, ƀư kan bah du đê̆ ntŭk kan, nkuăl hŏ têk leo âk năm. Nau khuch mô đêt tât nau ƀư nau kan hun hao văng sa, rêh jêng bah n’gor kŏ kơt lah nau kan tuch tăm, tăch rgâl ndrel nau rêh ƀon lan. Nê lah nau nkol, nau mô dơi ma nơm ân geh uănh ndơn, nchră ăp ntrong ân ueh, ăp ntil ndrel rhuăt luh ăp nau tă dơi gay ma lŏ ƀư nau kan tâm năm 2023”.

            Gay dơi ƀư nau ntrŭh mrô 23 bah Bộ chính trị, hun hao Tây Nguyên ngăch ndrel nâp nâl, tâm ban lam nau kan tuch tăm, tăm bri, ŭnh nar, pâl n’aih, công nghiệp, Chính phủ hŏ ntrŭnh nau ntuh kơl 9 nau kan gung trong têh. Ndrel ma ăp nau kan hŏ geh ân ƀư tă bah ơm, Tây Nguyên geh 11 nau kan gung trong nthoi nkuăl ndrel âk nkuăl, rnoh prăk ntuh kơl nklăp 180 rbăn rmen. Aơ lah nau kan khlay, lah rnôk ân Tây Nguyên geh dơi, kŏ kơt lah ntul rlong têh, yor dôl geh âk nau kan ntuh kơl ân Tây Nguyên mô geh tơm prăk, mbrơi nau nkra mô lah mô geh săk tam. Ndri ma, tĭng wa Lê Đình Trung, Bí thư n’gor uỷ Dak Lak, gay nau ntrŭnh 23 ngăn ngên jêng nau nsôih hun hao ân rơh mhe, n’gor ton n’hao nau kan, đăp mpăn nau tâm rgop ƀư ueh n’ho đah ăp n’gâng kan, nkuăl:

            ‘N’gor Dak Lak ton lan ntoh nau prêh lơn tay tâm nuih n’hâm kan, njêng nau tâm ban tâm nau ntrŭnh ƀư, kơp năl uănh kloh nau kan bah ăp ntŭk kan, rmôt kan tâm nau ƀư. Nchrăp nau kan ân rjăp lơn tâm nau ntrŭnh ƀư ăp nau kan bah n’gor. N’gor mra ntrŭnh ân rjăp, njêng nau tâm ban prêh ngăn tâm ăp gưl ăp ntŭk kan mpeh nau đă ndal tâm nau ntrŭnh tâm boh nau tâm rnglăp nkuăl, njêng ntŭk tâm ban ueh rklaih ăp nau kol, n’hao nau dơi ntul rlong, ƀư ueh ngăn nau dơi nau dăng”.

            Năm mhe 2023 tât đah Tây Nguyên ndrel ma nau ntrŭnh mrô 23, du nau ntrŭnh pă ân nau dơi têh ngăn, yơn kŏ ndŏ luh ân Tây Nguyên âk nau kan têh ndrel jêr. Gay ƀư jêh ăp nau kan têh nê, ŭch ân geh tât ăp nau kan rjăp ngăn bah ăp gưl uỷ, ntŭk kan đảng-n’gâng kan bah ăp n’gor Tây Nguyên ndrel nau nsum ty nsum n’hâm bah ăp ƀon lan ndrel ntŭk kan tăch rgâl. N’hao nau kan, năn dơi doh rklaih ăp nau nkol, đah nau dăng geh bah nơm ndrel nau ntuh kơl têh ngăn bah Chính phủ, Tây Nguyên geh nau dơi ndâk njêng nkuăl ƀư jêng hun hao bah lam dak, tâm di đah nkô̆ nau ma nau ntrŭnh nchrăp luh./.