Gay ƀư rjăp lơn tay nau tâm boh tâm kơl đah bar dak Việt nam-Campuchia, mhe rlau aơ, rmôt nau dak si bah N’gâng kan rđau tahen n’gor tâm rgop nsum đah Ngih dak si Đa khoa n’gor Kiên Giang hŏ tât khám ndrel pă dak si mô roh prăk, pă nklâm ndơ ân kônh wa tâm xã Snay Anhchit, nkuăl ChumKiri, n’gor Kampot, dak Campuchia.  Ntŭk tă lah ntŭk tâm lơh bah tahen hăn kơl an Việt Nam rnôk hăn kơl an ân Campuchia lơh phung Pôl Pốt.

            Tâm xã Snay Anhchit, nkuăl Chumkiri, n’gor Kampot, dak Campuchia, kônh wa ƀon lan rêh nsing tâm nau kan tuch tăm`, ngai đah n’gor ri ma nau rêh ndrăp ndơ ndrel nau mât chăm n’hâm soan mô tŏng ndrel mâp âk nau jêr. Wa Chnol saơ tahen Việt Nam tât khám, pă dak si mô roh prăk ri rhơn ngăn: “Gâp âk ngăn nau ji, yơn mô geh dơi hăn săm, rnôk tăng lah geh nai dak si bah N’gâng kan rđau kan tahen n’gor Kiên Giang tât khám săm ji ndrel pă dak si, pă ndơ ân kônh wa ta aơ ri gâp rhơn ngăn. Dăn lah ueh”.

            Bah nau ƀư kan, rmôt kan mâp đŏng nau jêr, yor mih, trong hăn, tâm tâm săng nau ngơi, bah năp nau jêr bah kônh wa dak băl, ăp nŭih mro tâm kơl tâm rklaih nau jêr gay ƀư ueh nau kan. Nau nkoch bah nai dak si Trần Thu Quỳnh, ngih dak si Đa khoa n’gor Kiên Giang:

            ‘Săk gâp saơ rvê ngăn, yor rơh bôk năp hăn khám nau ji ân dak băl. Bol ma hôm jêr tâm nau kan hăn trong, dak si kŏ kơt lah ndơ dŏng, yơn bah aơ saơ nau rêh, dak si bah kônh wa hôm jêr rlau, săk gâp lah nai dak si ndrel ma ăp nŭih oh nô đŏng kŏ nsôih n’hâm nơm gay ma kơl an dak si ân kônh wa ta aơ, kŏ kơt lah rgop nau bah oi nau jâk ân ngih dak si bah nkuăl aơ”.

            Thiếu tá Hoàng Trọng Thiên, Kruanh ngih dak si tahen Biên phòng n’gor Kiên Giang, ngơi:

            “Lah nsum ri nau nchrăp mpeh ndơ dŏng ê geh đăp mpăn, yơn rnôk hăn kan ri oh nô nsôih ndrel rnôk hăn geh nau kơl an âk ngăn bah rmôt băl kŏ kơt lah ƀon lan tâm nkuăl rmôt gŭ kan, rơh hăn khám săm ji geh nau ueh đŏng”.

            Ta aơ, rmôt nai dak si bah N’gâng kan rđau tahen n’gor Kiên Giang hŏ khám ndrel pă rlau 300 nklâm dak si mô roh prặk ân cán bộ ndrel ƀon lan ta aơ, du nklâm ndơ geh rnoh 100 rbăn. Nkre lah, tâm ăp ntŭk khám, pă dak si, mrôt kan kŏ pă 60 nklâm ndơ ân ăp rnăk vâl geh nau jêr, du nklâm ndơ geh rnoh 500 rbăn. Nau kan ƀư aơ hŏ lơi an âk nau ueh ngăn đah n’gâng kan tâm nkuăl ndrel kônh wa ƀon lan bar dak mpeh rup gui tahen Việt Nam tâm rơh đăp mpăn. Wa Siu Kết, tâm nkuăl Chumkiri, n’gor Kam Pot, ngơi: “Gâp rhơn ngăn geh nai dak si tât pă nklâm ndơ ndrel khám nau ji, pă dak si mô roh prăk, mô geh nau ma dơi ntit ôh, lah ba kơi lŏ geh ri kơl an hên đŏng, yor tâm rnôk aơ, ƀon lan hên mâp nau jêr ngăn, bol ma ndơ mô âk yơn lah hên dơi geh tâm rnôk aơ”.

            Ntơm năm 2015 tât rnôk aơ, N’gâng kan rđau tahen n’gor Kiên Giang hŏ ƀư 6 rmôt hăn khám ndrel pă rlau 3.500 nklâm dak si ân ƀon lan âk xã, nkuăl hôm geh nau jêr tâm Campuchia, đah rnoh prăk rlau 400 rkeh. Ăp rnôk tât ôp, pă dak si, nklâm ndơ nê lah ăp nau kơl an mât nâp nau tâm boh đah tahen ndrel ƀon lan bar dak. Đại tá Tếp Âm, Groi rđau tahen nkuăl Campot, ngơi: “Geh nau pă đă kan bah n’gâng kan ba lơ ân gâp tâm rgop nsum ma rmôt nau dak si bah n’gor Kiên Giang tât khám, pă dak si ndrel pă nklâm ndơ. Bah nau kan tâm rgop kơl an đah rmôt kan bah n’gor, Rmôt kan K92, rmôt kan hŏ tât khám pă dak si tâm xã Snay Anh Chít. Gâp rhơn ngăn ndrel lah ueh rmôt nai dak si bah n’gor Kiên Giang âk ngăn”.

            Nau ƀư leo nai dak si tât khám ndrel pă dak si ân kônh wa xã Snay Anh Chít lah nau khlay bah rmôt tahen n’gor Kiên Giang, rgop nau ndrel n’gâng kan, nkuăl bah lam dak mât chăm nau rêh ân ƀon lan. Bah nê, kŏ pơk trong gay rmôt K92 rnôk aơ dôl rgum joi nting tahen khĭt bah Việt Nam rnôk hăn kơl an tâm neh dak Campuchia kăl e dôl ƀư ueh nau kan geh jao, leo đồng chí, tahen nơm sĭt neh me. Aơ lah rtnôk ma nau tâm rnglăp bah rmôt kan mra nâp ndrel n’hao lơn nau tâm boh kơl an đah 2n’gor Kiên Giang ndrel Kampot lah êng, đah Ngih dak ndrel ƀon lan Việt Nam-Campuchia lah nsum. Đại tá Cao Minh Tâm, groi Chính uỷ N’gâng kan rđau tahen n’gor Kiên Giang, mbơh:

            “Nau ƀư pă dak si ndrel pă nklâm ndơ ân ƀon lan tâm n’gor Kampot bah N’gâng kan rđau kan n’gor đah Ngih dak si đa khoa n’gor Kiên Giang đah nkô̆ nau pơk trong nơih ngăn gay ma mât chăm tât nau rêh nuih n’hâm bah ƀon lan tâm n’gor Kapot lah nsum ndrel nkuăl Chumkiri lah êng gay ma ƀư jăp lơn tay nau tâm rnglăp tâm boh đah bar rnoi mpôl Việt Nam ndrel Campuchia kŏ kơt lah đạ n’gor Kiên Giang ndrel n’gor Kam Pot”./.

            Thu Hoà/VOV4