Khay 5/2023, Thiếu tá quân nhân chuyên nghiệp Lê Thị Minh Thuỷ hăn kan tât gôl dak Trường Sa. Jêh lôch 35 năm, kơp ntơm nar ndrâu Bŏ păng Lê Đình Thơ khĭt tâm rnôk ƀư kan mât gôl dak Trường Sa, yuh mơ geh hăn khâl ndrel mpoh kthup ân Bŏ ndrel 63 tahen nsum ma Bŏ păng. Tâm nklang dak lêng Trường Sa, yuh nkoch ân Bŏ păng djăt mpeh nau rêh, nau kan rnôk aơ ndrel ŭch geh ndơn nhoat jâng Bŏ nơm vẽ ri ăp blah hải đổ tâm dak lêng, rgop nau mât dak lêng, gôl dak bah neh dak:

            ‘Rnôk gâp geh hăn Trường Sa, ngăn ngên geh nau ueh tâm săk ngăn. Aơ lah nau ma gâp ŭch bah jŏ năm jêh. Rnôk geh ân nkao ndrel ma ăp nô, yuh tâm tàu nkah ăp nŭih khĭt kăl e, ndrel ma mbŏ gâp ndum ma 63 tahen khĭt lơ 14/3/1988, gâp mbơh ma mbŏ gâp ndrel ma ăp wa, ăp kônh lĕ khĭt, lah: Bŏ ndrel ăp wa ăp kônh djăt ma đăp mpăn, gâp ndrel ăp tahen nsum ma gâp mra lŏ ƀư nau ŭch bah bŏ ndrel ăp wa, ăp kônh ndrel mra nsôih lơn tay đŏng”.

            Bŏ yuh Minh Thuỷ, drâu tahen Lê Đình Thơ tă bah cán bộ Đoàn Đo đạc vẽ hải đồ ndrel mĭn dak lêng, khĭt rnôk yuh mhe knŭng du năm. Jêh âk khay bŏ păng khĭt, me păng kŏ khĭt đŏng. Yuh Thuỷ têh tâm nau ŭch rŏng bah U che ndrle nau kơl an bah ăp wa, ăp kônh bah ntŭk kan drâu Bŏ, me păng. Lôch nti Đại học Mỏ-Địa chất, chuyên ngành trắc địa bản đồ, yuh hăn kan tâm Đoàn Đo đọc biên vẽ hải đồ ndrel mĭn dak lêng, đah nau ŭch nthoi tĭng nau kan bah Bŏ nơm tă ƀư.

            Tâm rnôk hăn kan ta Trường Sa, êng nau ŭch geh chop khâl ntŭk drâu Bŏ păng tă pah kan, yuh Minh thuỷ hôm tât uănh n’gâng Bŏ păng tŏ neh, ăp mir dak lêng, ntŭk lŭ têh, geh saơ ăp ntil màu bah dak lêng tâm ăp ntŭk jru, dơl êng êng. Nê lah ăp nau mpơl saơ ueh ngăn ngên, khlay ngăn ngên ân nau kan biên vẽ hải đồ bah yuh ndrel ăp nŭih pah kan ma păng.

            Nau rjăp ndrel nau ŭch, nau rnơm rŏng bah nau kan hŏ lăp tâm săk yuh, tâm ăp nau vẽ, nau kan geh jao. Yuh Thuỷ nkoch, ăp rnôk ndơn rnoh mrô tă bah ăp ntŭk kan, yuh mro nsôih rgum, rklaih, biên tập ndrel ƀư rgum, tâm di ngăn, mhâm ƀư ăp hải đồ mro geh nau dơi ueh ngăn, đăp mpăn ân nŭih hăn tâm dak lêng. Tâm ăp năm rlau aơ, yuh ndrel ma ăp nŭih kan nsum hŏ nkra ntrong ƀư rnoh mrô nền địa lý ndrel nkra bản đồ địa hình tâm dak lêng rnoh 1:100.000 geh 196 blah, biên tập, mbơh ma rhiăng bah hải đồ mrô kơl an nau kan neh dak. Yuh Lê Thị Minh Thuỷ nkoch tât nau ƀư mhe tâm nau kan bản đồ:

            ‘Năm êp ngăn gay ma hên geh biên tập lah 196 blah hải đồ địa hình tâm nâm dak lêng, rơh bôk năp gay ma dŏng kơt lah phần mềm mhe Arcgis. Jêh nau kan ƀư nê ri hên geh Thủ tướng rnê prêh ngăn. Êng ăp ntil hải đồ biên tập tâm ăp phần mềm ma hên hôm ƀư tă bah jŏ ma aơ, phung hên hôm pơh luh bên tập tâm ăp phần mềm mhe, âk ngăn lah dŏng nau ngơi Anh lah âk ngăn. Ndơn geh dŏng ăp phần mềm mhe hŏ pơk luh ân nơm âk ntrong ƀư kan tâm nau kan bản đồ nâm dak lêng”.

            Êng nau blau jru, yuh Thuỷ hôm nti êng nau ngơi Anh, joi ndrel dŏng kơt ăp phần mềm mhe, kơl an nau nkra bản đồ, kơt Arcgis, Paperchat, Composer...Yuh Thuỷ kŏ lah ngoai tâm ăp nŭih leo trong lor dŏng nau kan mrô tâm nau ƀư nkra bản đồ, ndưn ăp nau mhe tâm nau kan bản đồ bah lam ntur neh. Êng mông kan bah ntŭk kan, măng yuh hôm kơt tĭng, joi uănh ăp nau mhe, ăp nau kan mĭn nkra...Nau rŏng đah ăp blah bản đồ dak lêng, gôl dak hŏ ntop tay n’hâm dăng, nau blau bah nau kan. Thiếu tá Nguyễn Văn Dũng, Kruanh rmôt kan Đội biên tập bản đồ nkoch tât yuh Lê Thị Minh Thuỷ:

            ‘Tâm nau ƀư kan bah kruanh rmôt biên tập bản đồ, đồng chí Thuỷ mro ƀư jêh nau kan, ăp nau đă, nau ƀư biên tập bản đồ, hải đồ geh rđau kan jao, đồng chí Thuỷ ƀư nau kan ueh, geh nau nâp. Nau kan geh jao ân yuh Thuỷ lah mro đăp mpăn. Thuỷ gơih kan, gơih kơt tĭng nti. Tâm nau kan bản đồ geh âk ntil, bol ma hôm mom, yơn Thủy blau nau nsôih ndrel geh nau blau ngăch lơn ma bu êng ngăn. Lah cán bộ mom, yơn Thuỷ geh rđau kan bah rmôt kan rnơm, pă ân nau kan hăn râng tâm âk nau kan khlay, kơt: bôk nau kan rgum trong dak lêng neh dak, nau kan mpeh bản đồ tâm nâm dak lêng gay kơl an bah Bộ, Cục bản đồ’.

            Gơih nsôih kan bah kơi ăp blah bản đồ gay ăp rnôk hăn tâm dak lêng bah ăp mrôt tahen geh ueh đăp mpăn, ăp nau nsôih bah Thiếu tá quân nhân chuyên nghiệp Lê Thị Minh Thuỷ geh kơp dơn đah âk săm ƀŭt rnê, bằng khen bah ăp gưl kan, Quân chủng Hải quân ndrel N’gâng kan neh dak yor geh nau blau tâm nau kan, rgop tâm nau kan ndâk njêng tahen, ƀư nâp neh dak ndrel mât neh dak./.