Tĭng N’gâng kan Lao động, Thương binh ndrel xã hội, âk nkô̆ nau têh Quốc hội jao mpeh nau nchrăp Hun hao văng sa, rêh jêng năm 2024 kŏ geh kơt: Rnoh nŭih mô geh kan pah êp nkuăl têh geh tâm nâm 4%, rnoh nŭih ê geh nti kan nklăp 70%; rnoh nŭih pah kan geh bằng, săm ƀŭt kơp dơn geh 28-28,5%. Nchrăp rnoh rnăk ach o âk ding tâm dŭt năm 2024 huch rlau 1% rđil dŭt năm 2023. Yơn lah, Groi Kruanh Uỷ ban rêh jêng Lâm Văn Đoan đă, ân kơp, ntop ăp nau mbơh tât khuch bah phŭt rmô 3, bah nê nchră nkô̆ nau đăp mpăn nau tâm di:

            ‘Ân geh rgum mbơh nau khuch bah phŭt mrô 3, bah nê geh nau đă ndrel năl tay ăp nkô̆ nau ngăn geh dơi đŏng lah mô? Nau nchrăp kan ƀư ngih gŭ, nơm ân geh pă tay tơm prăk Trung ương 8000 rmen kơl an ân 100 rbăn rnăk ach o, êp ach o tâm lam dak, tơn khuch khat yor phŭt Yagi lah 257 ngih, ngăn lah ăp rnoh aơ ân geh nchrăp kơp tay”.

            Mbơh tâm rơh rƀŭn ân saơ, năm 2024, ndrel ma nau ndâk ndrel hun hao aơư ntŭk, nau kan văng sa, ntŭk pah kan geh uănh hun hao; n’hao nau nthoi nau pă kan pah, kơl an joi kan pah ndrel rơh bôk năp ƀư nau kan pă mbơh nau kan tâm lam dak, năn mbơh kơl an ƀon lan, nŭih roh kan, n’huch mông kan, pah kan ndrel n’hao nau geh bah nŭih kan, geh âk rđil năm 2023. Nau tâm boh pah kan bah ăp ntŭk geh mât, nau kan leo nŭih hăn kan bah dih geh ndâk, Ăp n’gor ƀư tĭng, năn nau kơl an, kơl nŭih geh n’hâm ma cách mạng, kơl nau rêh, Bảo hiểm xã hội, bảo hiểm roh kan pah, huchach o, mât chăm nŭih bu ranh, kon se geh nau rêh jêr jŏt...nau kan trok prăk mô dŏng prăk măt đah nŭih geh kơl an geh ƀư dăng.

            Tĭng ăp nŭih ntoh măt, N’gâng kan Lao động Thương binh ndrel Xã hội, nau kan pă tơm prăk ntuh kơl hôm mbrơi, tâm nê geh tơm prăk bah nau kan huch ach o nâp nâl năm 2024. Groi Kruanh Uỷ ban xã hội Đỗ Thị Lan, đă:

            ‘Năm 2024 tơm prăk ƀư nau kan, tơm prăk ntuh kơl bah nơm hôm dêh, trok dŏng tơm prăk khay 8 geh 47%. Tât lôch năm nchrăp geh dơi đŏng. Đă geh nau mbơh ntop tay tơm prăk bah năm 2022-2023 ntrơn jêng ƀư tâm năm 2024 ri ƀư mhâm nau ân geh dơi trok dŏng tơm prăk tâm năm 2024 đŏng lah mô?”.

            Nau mbơh nau kan ƀư nau nchrăp hun hao văng sa, rêh jêng ndrel tơm prăk Ngih dak năm 2024, nchrăp nau kan ndrel tơm prăk Ngih dak năm 2025 nau pah kan, nŭih geh n’hâm ndrel nau rêh, ntoh măt N’gâng kan Lao động-Thương binh ndrel Xã hội mbơh, đah nau rđau kan bah Đảng, nau rđau kan, đă ngăn bah Chính phủ, Thủ tướng Chính phủ, đah nau nsôih bah ăp cán bộ, công chức, nŭih pah kan lam ntŭk ndrel nau tâm rgop nsum ma ăp gưl kan, ntŭk kan, ăp nkuăl, N’gâng kan Lao động thương binh ndrel xã hội ƀư nau kan tâm ban, ueh, săk tam ăp nau kan, ntrong kan tâm ăp nau pah kan, nŭih geh n’hâm ndrel ƀon lan, năn rklaih, nkoch mbơh nau ntrŭnh, nkre ƀư nau kan ƀa ƀơ, nkre uănh khlay nau rklaih ăp nau kol, ăp nau mhe ntoh.

            Tâm nar rƀŭn, Uỷ ban rêh jêng bah Quốc hội đă Bộ Lao động-Thương binh ndrel xã hội ƀư kloh nau kol geh tât nau kan pă ntop tơm prăk kơt ăp nau kol mpeh nau mbơh. Tă bah nê đă ăp nau kan gay ma mbơh nau kơl ân tâm di, đăp mpăn nau rêh ân nŭih ƀon lan./.