Năm 2023 mhe rlau Chi bộ ƀon Chứ, xã Ya Ly, nkuăl Sa Thầy nglăp tay 2 đảng viên mhe rnoi Jrai lah A Nói ndrel Phạm Quang Anh. Bí thư chi bộ nkre Kruanh ƀon Chứ A Thoải mbơh, Chi bộ kŏ đă 3 nŭih blau bah rnoi Jrai, geh: Y Chư, A Hlưm ndrel A Num hăn nti nau blau mpeh Đảng. Lĕ 3 nŭih aơ kŏ lah nŭih ntoh lư tâm nau hun hao văng sa kŏ kơt lah leo trong ndâk njêng ƀon lan mhe. Tĭng bí thư Chi bộ A Thoải, ŭch ƀon lan djăt, tĭng ndrel ƀư tĭng ri ăp đảng viên lah nŭih leo trong lor tâm nau pah kan jan sa bah ƀon:

            ‘Năm mhe rlau Chi bộ phung hên hŏ rnglăp geh 2 đảng viên mhe, dŭt năm du hê đŏng. Phung hên đă 3 nŭih hăn nti đối tượng Đảng. Tâm năm mra rlet nkô̆ nau 5 nŭih. Rnơm nau kơl an, rđau rjăp, bonh đă năn ri mơ geh dơi kơt nau aơ. Rnôk aơ, phung hên dôl lŏ ntrŭnh nau ndâk njêng ƀon lan mhe, ân geh blau ngăch, nkoch trêng tâm du, tâm rnglăp, ngăch blau. Ndâk njêng ƀon lan mhe ân leo nau geh tam ngăn. Ngih dak hŏ kơl an nơm ân nsôih hao, mô dơi kâp rnơm tâm Ngih dak, săk nơm ân leo trong lor. Jêh aơ, kon sau nơm geh dơi, trong hŏ geh, nau rêh ăp ntil, nau nê nơm dôl rƀŏng tât”.

            Đảng bộ xã Ya Ly, nkual Sa Thầy rnôk aơ geh 9 chi bộ tâm 81 đảng viên, tâm nê geh 34 đảng viên lah rnoi mpôl đê̆. Ntơm bôk năp kan tât rnôk aơ, ăp Chi bộ tâm Đảng bộ xã Ya Ly hŏ rnglăp geh 22 đảng viên mhe. Êng năm 2024 Chi bộ bah 3 ƀon, Chứ, Tum, Chờ nklăp nglăp 5-7 nŭih đảng viên mhe rnoi mpôl đê̆.

            Bí thư Đảng uỷ xã Ya Ly, Phan Chí Thiện, mbơh: Bah nau rƀŭn, ăp rơh nchră nau kan bah ƀon lan, gưl uỷ, chi bộ ndrel ăp nŭih đảng viên kŏ geh nau joi, saơ nŭih mhe, nŭih blau bah ƀon lan. Gay chi bộ dăng, tâm rnglăp âk nŭih tâm rnôk rnglăp đảng viên mhe ân geh săch nŭih geh bu rnơm tâm nau rêh ndrel pah kan jan sa. Nkre kơl an, ntĭm mbơh, bonh đă nŭih mom, geh nau blau. Bí thư Đảng uỷ xã Ya Ly, wa Phan Chí Thiện lah rjăp, rnơm nau ndâk Chi bộ, Đảng bộ nâp, ƀư ueh nau dơi, nau kan bah ăp đảng viên ngăn lah tâm 3 ƀon rnoi mpôl đê̆, tât dŭt năm 2023 xã Ya Ly, nkuăl Sa Thầy hŏ ƀư jêh 19/19 nkô̆ nau ndâk njêng ƀon lan mhe:

            “Bah ăp nŭih đảng viên tâm rnâng kan, đảng viên tâm Chi bộ nkre ƀư Kruanh ƀon, đảng viên tâm ăp thôn ƀon kơl âk ngăn ân Đảng uỷ xã tâm nau ntrŭnh ƀư nau ntrŭnh, ntrong kan bah Đảng, pháp luật bah Ngih dak. Ngăn lah kơt năm mhe nơh, phung hên ƀư ƀon lan mhe, bonh đă kônh wa pă êng neh, nkra trong, kơl an nar kan, nkra kloh ueh ntŭk ntu ndrih-kloh-uen bah ƀon lan ƀư nau kan đảng viên ăp Chi bộ lah nau khlay”.

            Năm 2023 Đảng bộ nkuăl Sa Thầy, n’gor Kon Tum rnglăp geh 97 đảng viên mhe, geh 102% nau nchrăp n’hao rnoh đảng viên lam Đảng bộ hao 2.033 đảng viên. Tât rnôk aơ, lĕ 64 thôn bon tâm nkuăl ƀư jêh nau kan săch Bí thư Chi bôk nkra ƀư Kruanh ƀon mô lah Kruanh Ban nau kan mặt trận thôn. Wa Y Sâm, Groi Bí thư Rnâng kan nkuăl uỷ, Kruanh HĐND nkuăl Sa Thầy mbơh, gay nŭih mom tâm ăp thôn ƀon geh nau blau, nau dơi ŭch geh lăp tâm Đảng, nkuăl Sa Thầy uănh khlay nau ndâk njêng Chi bộ nâp geh nsum ma nau hun hao văng sa, rêh jêng ƀon lan hun hao:

            “Phung hên kơl an nau hun hao đảng viên tâm nkuăl ƀon lan ndrel ngăn lah nau hun hao đảng viên rnoi mpôl đê̆. Phung hên ntrŭt dăng nau kan hun hao văng sa rnăk vâl nkual rnoi mpôl đê̆ lah nsum nau ntrơn rgâl tơm tăm, mpa rong gay ƀon lan rnơm đah nau kan rđau đă bah Đảng. Bah nau ƀư nau kan n’hêl bah rơh mom ân saơ Đảng, n’gâng kan kơl an tât hun hao văng sa rnăk vâl kŏ kơt lah ndâk njêng rmôt cán bộ mom. Tă bah nê nơm ndâk njêng rmôt tơm, ntĭm nti, mbơh đă ân rơh mom gay ma geh rnglăp tâm Đảng”.

            Ntơm bah nau ndâk njêng Chi bộ nâp nâl geh nsum ma nau kan văng sa, rêh jêng ƀon lan hun hao, nchră nau bah Nkual uỷ Sa Thầy saơ nkô̆, nau kan bah ăp chi bộ bah ăp thôn ƀon geh nau rgâl mhe, hăn lăp tâm nau ngăn, rjăp lơn. Lah nkuăl n’har bri bah n’gor Kon Tum đah nau dơi mpeh văng sa, rêh jêng âk nau jêr jŏt, yơn tât dŭt năm 2023 nkuăl Sa Thầy hŏ geh 4 xã geh tŏng naud ơi ƀon lan mhe, nau geh dơi du hê bôk nŭih hŏ geh bơi tât 52 rkeh prăk. Lam nkuăl geh 54/64 thôn, ƀon geh kơp dơn lah “Thôn, ƀon văn hoá”./.