Jrâu nti tâm ngih săm ƀŭt Tiểu học xã Song Tử Tây, nkuăl gôl dak Trường Sa lah jrâu nti ndop, geh 6 kon se, pă jêng 2 rmôt tâm 2 jrâu nti. Âk năm ma aơ, hôm jêr, yơn rnơm geh nau kan ntĭm nti nkuăl Trường Sa hŏ ƀư tâm di nau nchrăp, 100% kon se nti Tiểu học kŏ geh kơt nau dơi đă tât ăp nau blau ndrel nau rêh. Lam nkuăl geh 3 ngih săm ƀŭt Tiểu học, nai nti geh săch lăp, đă kơl an gay n’hao nau blau ntĭm ndrel nti. Nai Nguyễn Hữu Phú, nai nti kon se ngih săm ƀŭt Tiểu học Song Tử Tây mbơh:

            ‘Nau kan jrâu nti tâm ndop geh âk jrâu nti êng êng, nti kŏ mâp nau jêr lơn rđil ma nau kan nơm nti tâm neh kơh. Tâm nkuăl gôl dak ngai ma rnăk vâl, kah gĭt ma ngih đŏng, yor lah trong dak lêng, gôl dak ta aơ nơm nsôih. Nơm ân pah kan kơl an n’hâm nơm ân neh dak. Oh nô, cán bộ, tahen, nŭih ƀon lan ta aơ kŏ geh nau kơl an âk đŏng”.

            Nau rgâl âk ngăn bah nkual gôl dak Trường Sa tâm âk nar rlau aơ lah trong hăn. Êng 3 ngih săm ƀŭtm, tâm ăp nkuăl hŏ geh 10 ngih dak si, 9 ngih chùa, 2 ngih prăp ndơ ơm, du ndrâm dak lêng, du tach ndeh mpar, 2 ƀon joi nhŭp ka...100% ngih ƀon lan geh ndâk nâp, nau mbơh nkoch nau mhe, trong hăn, trong tŏ chai, ntŭk dâng dak njŭng geh ndâk nâp.

Ngăn lah, trong pă ŭnh nar kloh tă bah n’hâm soan, điện măt nar geh ƀư nâp ƀư rgâl nau ueh, nau rêh bah ăp gôl dak, n’hao nau mât đăp mpăn neh dak. Trung tá Trần Danh Hoàng, Kruanh gôl dak Sinh Tồn, mbơh:

            ‘Trong ŭnh nar kloh geh ntuh kơl, hun hao ueh ngăn, n’huch dơi nau dŏng máy rtoh pă ŭnh, bah nau khuch tât ntŭk ntu kŏ kơt lah nau kan bah rmôt kan. Kơl an ƀon lan, cán bộ tahen tâm gôl dak đăp mpăn dơi nau khlay, mât đăp mpăn nau rêh bah ƀon lan, mra tâm lơh bah gôl dak”.

            Ăp rnăk rêh tâm gôl dak geh n’gâng kan tâm nkuăl kơl an, pơk trong ân hun hao văng sa, mât rong ndrel chăm tơm tăm, lơh joi ka tâm di ma gôl dak. Ăp rnăk rêh tâm ngih hvi 70m2 geh nkra ueh, nâp, geh jrâu năch, 2 jrâu bĭch, ngih ŭnh ndrel nsưng, tivi...Yuh Nguyễn Thị Lan, tâm Xã Song Tử Tây, n’gor Khánh Hoà, mbơh: Rnôk aơ tâm nkuăl geh ngih săm ƀŭt, ngih văn hoá, geh mât chăm n’hâm soan, nau rêh geh kơl an ân ƀon lan tâm dăch ma gal lêng, gôl dak:

            ‘Phung hên saơ nau rêh đăp mpăn, nơm nsôih n’hao nau tuch tăm, lơh joi ka êp kơh, kơl an nau rêh. Lah ueh nau kơl an, bonh đă bah ăp ntŭk kan, rmôt kan tâm neh kơh bonh đă, pă kơl an gay nau rêh hên geh ăp tŏng lơn”.

            Nkuăl gôl dak Trường Sa, n’gor Khánh Hoà rnôk aơ geh ndâk 4 âu tàu: Song tử Tây, Đá Tây, Trường Sa ndrel Sinh Tồn đah ăp nau kơl an joi nhŭp ka. 5 năm ma aơ, Đồn Biên phòng Trường Sa ndơn bơi tât 390 ndơ dŏng, đah 6000 nŭih hăn kan tât ntŭk gŭ nde bah tàu tâm ăp gôl dak, rlau 440 nŭigh geh pă mbơh nau kơl an tâm dak lêng. Wa Nguyễn Đức Toàn, nŭih joi nhŭp ka tâm Trường Sa mbơh, ăp âu tàu geh ndâk tâm ban, pă ăp nau kan kơl an tâm dak lêng, kơl an ƀon lan hăn tâm dak lêng jong nar, n’huch nau dŏng prăk tâm ăp rnôk hăn:

            ‘Tàu gâp păng vay khĭt êng máy, ngai ma gôl dak ngăn, yơn lah bah năp măt nơm kuăl ân bu kơl an, kơl leo ntuh nơm tât kơh. Neh kơh geh nau mbơh hăn tât gôl dak, tă bah nê đă bu, duk mpan bah gôl dak tât têk nơm lăp tât kơh gay ma rklaih. Ăp nŭih lah geh kơt nê ri âk ngăn”.

            Lŏ ntrŭnh ndâk ntrong kan chính trị ndrle ƀư nau kơl an tâm ăp xã, nkual têh tâm nkuăl Trường Sa lah ngoai tâm ăp nau đă gay ma hun hao ăp ntil n’gor Khánh Hoà. Ntrŭnh nau mrô 09/2022 bah Bộ chính trị mpeh nau ndâk, hun hao n’gor Khánh Hoà tât năm 2030, rƀŏng tât năm 2045, nkuăl gôl dak Trường Sa rgum ntuh kơl nkra ntŭk dŏng nar, trih dak njŭng, tâm rgop ma ăp nau kan kơl an joi nhŭp ka. Bah nê, njêng nau kơl an ƀon lan sŏk geh âk ka, hun hao văng sa, nkre rgum rmôt nŭih hăn joi nhŭp ka ngai kơh bah ăp nkuăl gôl dak Miền Trung tât đah Trường Sa.

N’gor Khánh Hoà tâm rgop nsum đah N’gâng kan tuch tăm ndrel hun hao ƀon lan ndrel ăp ntŭk kan ƀư dŏng ndrel kơt tĭng ăp nau kơl an ƀon lan têh ndrel ƀư nau joi nhŭp ka tâm ƀon bah ăp xã gôl dak. Wa Lê Đình Hải, Kruanh UBND nkuăl Trường Sa n’gor Khánh Hoà mbơh, nkuăl Trường Sa sŏk nau ndâk njêng chính trị ƀư tơm gay ma n’hao nau rêh, nkre luh n’hâm ndâk văng sa, văn hoá, rêh jêng, đăp mpăn nau rêh, njrăng nau tât khuch, kơl an nau mâp rmanh:

            ‘Tahen ndrel ƀon lan nkuăl Trường Sa năl nau chiăr nti nau mĭn nsôih, mât nâp nau rnơm ndrel ma lam dak hăn nsum kơl an nkuăl dak lêng têh. Tâm di đah nau rnơm bah Đảng ndrel ƀon lan lam dak. Ngăn lah, tahen ndrel ƀon lan nkuăl Trường Sa nsôih ntrŭnh ndrel ƀư nau ntrŭnh mrô 09 bah Bộ chính trị, tâm nê, rgum nau tâm rgop nsum ân rjăp gay ma hun hao văng sa, rêh jêng ndrel neh dak ndrel đăp mpăn, rnă njrăng. Ntrŭt dăng nau ndâk ndrel hun hao nkuăl Trường Sa jêng ntŭk kan văng sa, văn hoá, rêh jêng tâm dak lêng bah lam dak, lah n’gâng tơm ƀư mât nâp dak lêng, nkuăl gôl dak bah neh dak”./.