Ta rơh lễ ăp nuĭh ntuh kơl lĕ pă prăk kơl rdâk njêng 1.200 mblâm ngih an rnăk ach o, jêr jŏt mpeh ngih jay gŭ ta n’gor Sóc Trăng, ăp mblâm ngih jay geh kơl an 50 rkeh prăk ƀư jay n’hanh ntưm chor.

N’gâng kan công an lĕ pă an cục an ninh wăng sa ndrel công an n’gor Sóc Trăng leo ƀư, tâm rgop na nê̆ đah n’gâng kan ta ntŭk ƀư lôch 1.200 ngih jay ta năp nar 2/9/2023. Di rơh kahgĭt 78 năm nar Quốc khánh 2/9 mbra nglôch lôch, pă jay an ăp rnăk ƀon lan jêr jŏt ta ntŭk. 5 năm ba năp, n’gor Sóc Trăng lĕ rgŏ jă n’hanh ƀư geh 5.200 ngih jay an nuĭh geh kan kăl e, rnăk ach o mô geh ngih jay gŭ. Yơn lah, lam n’gor hôm nha geh rlău 15 rbăn rnăk ach o, rlău 26 rbăn rnăk dăch ach o, ngăn lah, geh bơi tât 7 rbăn rnăk geh nău rêh jêr jŏt mô geh ngih jay gŭ.