Tâm nău mbơh bôk năm 2022, Kruanh Quốc hội Vương Đình Huệ lah: Quốc hội, Ủy ban Thường Quốc hội mbra nchrăp lor tay, hăn ndrel uĕh tay đah Chính phủ, ăp ngih pah kan ngih dak gay ngăch uănh mĭn tay, ntrŭnh ăp nău mpeh dơi mkra. Ngơi hăn ndrel đah ƀư, jêh 1 năm mbơh ƀư bôk nău kan ndâk njêng pháp luật năm kan Quốc hội Khóa 15, ăp ngih pah kan bah Quốc hội, Chính phủ n’hanh ăp ngih pah kan geh tât lĕ jêh 81/137 nău kan ndâk njêng pháp luật, jêh nău mĭn njêng, kơp uănh tay mô lah mĭn njêng, ndâk njêng mhe (geh rlău 59%) nău kan bah lĕ năm kan), jêng geh pháp lý an chính phủ, n’gâng kan ƀon lan kơt dŏng ăp trong mkra ngăch, dŭt n’hâm, săk rnglăy njrăng n’gang chôt srê, mât njrăng nău rêh, săk soan bah nuĭh ƀon lan, ntop kơl doanh nghiệp, nuĭh pah kan rlet rlău jêr jŏt n’hanh đăp mpăn nău rêh jêng; ntrôl rdâk hao tay n’hanh hun hao wăng sa-rêh jêng nâp nâl jêh chôt srê Covid-19.

Nău rgum rơh rƀŭn ndal rơh bôk năp dơi uănh lah nău ntrŭnh têh khlay bah Quốc hội Việt Nam tâm 76 năm bah năp.

Lơn lah, bah meng 2 rơh rƀŭn ăp rơh, ntơm bôk năm, Quốc hội ƀư rơh rƀŭn ndal rơh bôk năp gay uănh mĭn tay, hun hao bah neh dak tâm nău “nâm ơm mhe”. Nău rgum rơh rƀŭn ndal tal bôk năp dơi uănh lah nău nsrôih têh bah Quốc hội Việt Nam tâm 76 năm bah năp, mĭn lah nău janh, nău nsrôih chính trị bah ngih pah kan têh bah ngih dak têh ngăn kơt nău nsrôih, rgâl mhe, nău ƀư yor uĕh an ƀon lan.

Rƀŭn “ndal” gay mkra nău jăch ndăn. Ngăn ngên an saơ lah Quốc hội mô ndrel đah Chính phủ geh âk nău nchroh ngăch mbra ƀư rơh nău tât geh bah neh dak. Ăp nkô̆ nău tâm nchră ta rƀŭn ndal mô knŭng di nău ŭch bah năp măt an năm 2022, năm 2023, ma hôm geh nkô̆ nău khlay an lĕ năm kan n’hanh ăp năm bah kơi tay. Lĕ rngôch ăp nău nchrăp n’hanh ƀư rơh rƀŭn ƀư kloh trong uănh ngai, jru hvi n’hanh nău lăp nchrăp bah ơm, bah ngai.

Nău saơ têh lah nău Quốc hội mbơh an Nghị quyết mrô 43/2022 nar 11/1/2022 mpeh nău kơl năm bah năp, prăk kaih đah âk nklăp 350.000 rmen prăk, tâm ban đah rlău 8% GDP gay ntop kơl ƀư bôk nău kan rdâk hao tay n’hanh hun hao wăng sa-rêh jêng, rgop hao jêng GDP năm 2022 hao 8,02%, geh âk ngăn rlău 10 năm bah năp, tâm rmôt ăp dak geh ngăch hao jêng bôk năp lam ntŭr neh.

Kơt nău Tổng Thư ký, Chủ nhiệm Văn phòng Quốc hội Bùi Văn Cường nkoch: Nghị quyết dơi an tâm du rơh rƀŭn dŭt n’hâm khlay, mô hŏ tă geh đah âk nău nsrôih, n’hâm soan bah kruanh Đảng, Quốc hội, Chính phủ, ăp N’gâng kan, nău kan, ƀon lan n’hanh đại biểu Quốc hội. Trong kơl nĕ pơk luh trong ƀư khlay, tâm nĕ ăp trong ƀư, sam ƀŭt dơi rgâl dơh, pă gưl têh dăng tât ăp n’gâng kan, nău kan, ƀon lan ma bah sa ơm mô hŏ tă kơt dŏng. Quốc hội hôm jao an Ủy ban Thường vụ Quốc hội ntrŭnh ăp nău pơk lor, an êng, êng đah luật tâm năm Quốc hội mô rƀŭn gay ơm hăn ndrel đah chính phủ. Nuih n’hâm n’hanh săk rnglăy bah rơh rƀŭn ndal rơh bôk năp, Quốc hội khóa 15 lĕ nta an trong hăn mhe, rnôk geh mhe.

Sŏk ndơ̆ tơm prăk âk ngăn, rlet rlău nkôp đah nchroh mbơh, sŏk dŏng, rnon nsum dơi uănh nđôi; GDP năm 2022 lĕ năm hao 8,02%, âk ngăn tâm lvang 2011-2022; nău tâm pă tâm ban đăp mpăn... Ăp nău mbơh khlay dơi mbơh ta dŭt năm nsĭt geh âk nău uĕh, n’hâm soan khlay an nău rƀŏng trong nchrăp 5 năm, lơ khlay lơn rnôk neh dak ntơm tâm năm pơk trong bah năm kan ƀư tĭng nghị quyết Đại hội rơh tal 13 bah Đảng.

Tổng Bí thư Nguyễn Phú Trọng, Kruanh dak Nguyễn Xuân Phúc, Thủ tướng Phạm Minh Chính n’hanh Kruanh Quốc hội Vương Đình Huệ râng rơh rƀŭn dŭt năm 2022

Uănh khlay lơn rnôk nău rgâl mhe ta lĕ rngôch ăp nău kan đah âk ntŭk ang nĕ lah he uănh tay rnôk năm 2022 nu nău mhe lam ntŭr neh rgâl jêr jŏt, mô hŏ tă geh, jêr jŏt lơn đah rnôk ndâk njêng trong nchrăp hun hao wăng sa-rêh jêng năm 2022. Đah nău rgâl ta lam ntŭr neh, jêr jŏt nău ntoh hao mhe; rnoh khlay pring xăng, ndơ ƀư ngih wâl hao khlay, khuch têh tât âk nău kan, âk nău hôm e nkân jŏ jong an dơi mkra; tâm rnôk nĕ, nuh srê, trôk nar, phŭt sial geh jêr jŏt, ƀư khuch âk an nkra njêng tăch rgâl n’hanh nău rêh bah nuĭh ƀon lan.

Lah ăp nău khuch mô uĕh bah lơ an saơ ăp săk rnglăy he dơi geh lah dŭt n’hâm khlay. Nău rdâk hao têh bah jâng wăng sa saơ săk rnglăy ƀĭt joet bah Chính phủ kơt ăp n’gâng kan, nău kan; nău nsrôih, dŭt n’hâm bah lĕ trong chính trị, bah nuĭh ƀon lan, rmôt doanh nghiệp. N’hanh lơn lah hăn ndrel, ntop kơl dŭt ngăch, săk rnglăy bah Quốc hội tă bah trong mkra “khlay êng, pơk lor, an êng”.

Ntŭl rlong, jêr jŏt hôm e âk, yơn nău nsing nơm ntŭk rƀŭn nchră saơ kloh, rnôk geh đại biểu Quốc hội nkoch: Lam ntŭr neh dôl uănh lah Việt Nam kơt du rup ndah hao bah răch năm jêh Covid-19 n’hanh dơi hao jêh srê. Nsing nơm an lah, đah nău tâm rnglăp, tâm ban ŭch âk bah trong chính trị, nău kơl, rƀŏng tĭng bah lam ƀon lan n’hanh ăp doanh nghiệp, đah nău rđău uĕh, na nao bah Đảng, nău nchrăp lor, hăn ndrel bah Quốc hội n’hanh nău ƀĭt joet dŭt n’hân, nsơr soan bah Chính phủ, he mbra ƀư dơi lôch uĕh ăp nău rƀŏng đêt khay tâm năm 2023, kơt nău rƀŏng jŏ năm tâm rgŏ năp./.