Tâm nchră nău kan n’hanh lăp klan ndrel đah âk dak bah dih an mpôl leo kan bu ur mô dơn lah pă an oh yuh ăp nău mbơh nău mpŏng di mpeh nău nchră kan bâh Việt Nam ta rơh mhe; tâm boh kan đah ăp dak têh ta lam ntur neh n’hanh geh tât Việt Nam, trong kan mbơh nău mhe n’hanh geh dŏng ak nău kan bâh rnoh mbrô, ăp nău ntrŭnh mpeh vơt kan đah bah dih, leo ƀư rơh rƀŭn nchră, tâm nchră lam ntur neh...ma bâh ăp nău kan na nê̆ n’hao nău dơi leo kan cán bộ bu ur.

Ta n’gor Sóc Trăng, nău uănh nđôi, uănh năl gay ma n’hao nău dơi mpôl cán bộ, công chức UBND gâl xã, tâm nĕ geh cán bộ rnoi đê̆, njêng nău ueh tâm di bâh nuĭh kan n’hanh ntŭk leo kan đah nău kơl an bâh ăp ntŭk kan hành chính ngih dak rnôk mbơh nău kan ta ntŭk kan geh nău dơi, ntop ƀư rgâl rnoh mbrô rgâl mhe hành chính lah nău kan ƀư ƀa ƀơ, mbro. Bâh ăp rơh uănh nđôi, uănh năl lĕ kơl an mpôl cán bộ, công chức gâl xã, ăp oh yuh bu ur lah cán bộ xã geh uănh năl na nê̆ nău kan, bâh nĕ ƀư lôch ueh nău kan geh pă jao. Yuh Phan Thị Lầu, Công chức ntŭk kan văn phòng-thống kê, UBND phường 2, nkuăl têh Ngã Năm, n’gor Sóc Trăng an gĭt.

“Gâp saơ lĕ rngôch cán bộ, công chức aƀaơ way geh ƀư tĭng ăp nău kan ta phần mềm du mpông tâm rgop bâh nău kan trực tuyến. Jêng lah an geh cán bộ, công chức an geh gĭt na nê̆ mpeh tin học, gĭt blău tâm nău pah kan gay ma ƀư ueh jăp nău kan”.

N’hao nău dơi leo kan bâh cán bộ bu ur kơl an bu ur geh nău knơm mpơl an săk nơm, knơm lăp kan ndrel đah dak bah dih. Ta n’gor Phú Yên, âk ntŭk lĕ n’hanh dôl n’hao nău kan leo kan bu ur tâm gâl ủy , ntop rdâk njêng trong kan chính trị nâp dăng lĕ rngôch. Lah Đảng ủy viên, âk năm ƀư kruanh Hội bu ur xã Sông Hinh, nkuăl Sông Hinh, ta ntŭk geh rlău 90% ƀon lan rnoi đê̆, yuh K’So H’Vỹ way geh n’hao ueh jăp nău leo kan, mbơh tơih, rgŏ jă nuĭh ƀon lan ƀư tĭng nău ntrŭnh, trong kan bâh Đảng, nău kơl kan pháp luật bâh ngih dak n’hanh hun hao rnăk vâl, rgâl mhe nău rêh hun hao bah ach o.

 “Ntŭk kan lĕ geh ƀư ăp rơh tâm mâp rgum ƀon lan ta ăp chi hội, bâh nĕ gay ma an oh yuh bu ur gĭt na nê̆ nău ŭch hun hao wăng sa bâh oh yuh”.

Đah nău ntrŭnh ƀư ndrel nău nchrăp pă kan an cán bộ bu ur, ngăn lah ăp cán bộ mom geh nău gĭt blău n’hanh nău dơi hun hao, nkuăl Sông Hinh lĕ geh ƀư ndrel nău kan tâm pleh cán bộ đah trong kan ndrel sŏng dăng bâh Bí thư Đảng ủy xã đah nău ƀư tĭng ăp nău nchrăp tĭng Nghị quyết ngluh mbơh. Wa Trương Thị Thu Hà, Bí thư Đảng ủy xã Ealy, nkuăl Sông Hinh an gĭt.

 “Mpôl hên lĕ geh mât uănh gay ma ntĭm nti, ntĭm mbơh. Ngăn lah nău tâm pleh aơ lah du nău nkhêp gay ma hêhn geh gĭt đah ăp ntŭk kan ba dâng, geh gĭt ăp ntŭk, kơt nti bâh ăp ntŭk kan n’hanh gay ma ƀư lôch ueh an săk nơm lơn”.

Wa Nguyễn Bá Kim, groi kruanh rnâng kan leo kan n’gor Ủy Phú yên an gĭt.

 “Gâl ủy, n’gâng kan n’hanh ăp ntŭk kan rĭ lĕ geh mât uănh tât nău kan nchrăp kan. Bâh nău nchrăp kan lĕ geh ƀư bâh mpôl cán bộ bu ur, ngăn lah cán bộ bu ur rnoi đê̆ tât râng ăp jrô nti, ntĭm nti. N’hao nău dơi, nău leo kan mât uănh”.

Nău nchrăp kan ơm, ntĭm nti di trong, nănh tâm nău pă kan tĭng nău ŭch tâm rgop đah nău nsrôih hun hao bâh ăp oh yuh nơm, nău dơi bân cán bộ bu ur ta nkual gôl yôk, nkual ƀon lan rnoi đê̆ n’gor Phú Yên lĕ ngăn ngên geh n’hao n’hanh nsĭt tay săk rnglăy ta trong kan mpŏng hun hao wăng sa rêh jêng ta ntŭk. Aơ lah nău gay ma cán bộ bu ur rnoi đê̆ n’hao nău dơi mpeh nchră kan đah dah dih, lăp kan ndrel đah dak bah dih.