Tĭng Ủy ban ntung trong gưl neh dak, rĭng ăp nar, tâm tom ndeh lơh 24 nuĭh khĭt n’hanh 60 nuĭh rmanh. Lơn  lah, ăp năm tâm  tom ndeh lơh roh huach 2,5% lĕ rngôch nsĭt geh rĭng bôk nuĭh lam dak,  tâm rnôk hun hao wăng sa rêh jêng kon nuĭh bah lam dak ăp năm mhe aơ dơn geh nklăp 6%. Yor kơt nê̆, pah kan nkoch trêng, đăm gĭt pháp luật đăp mpăn  hăn ntung trong lah nău dŭt khlay mha êng, Ndrel đah nê lah nkre rsong hăn, treng nđôi nău tih hăn ntung trong. Aơ lah bar trong nkra dơi n’gâng kan ăp gưl, ăp mpôl kan dơi kan lam dak uănh khlay tĭng ƀư tâm âk năm aơ. 

Gay rgop n’hao nău  gĭt êng rnôk râng hăn ntung trong, ăp nuĭh ƀon  lan ân tĭng ƀư jăp ăp nău ŭch đă bah kơi aơ: Ngoăy lah: Lor rnôk hăn ntung trong ân uănh năl nâp uĕh ndeh rklư. Bar lah: Ân geh ăp tŏng siƀŭt ndeh tĭng di nău way rnôk râng hăn ntung trong. Pe lah: ân ndô môk bảo hiểm nâp uĕh: Lah mô đah môk bảo hiểm mô nâp uĕh. Puăn lah: Hăn di mbor trong, gâl trong, mpor tor trong,…tĭng quy định, way tĭng jăp di luật đăp  mpăn hăn ntung trong. Prăm lah: Đăp mpăn hăn di rnoh ngăch. N’hao nuih n’hâm gĭt rong êng trong, teng kiău, teng ma…di quy định. Tiăr nti nuih n’hâm ât nkân, nsrŭng kâp rnôk geh ŭnh đă nsrŭng hăn mô lah kol trong hăn. Ân gĭt kơl nuĭh geh mâp rmanh hăn ntung trong. Prao lah: Nkra uănh na nê̆ way ăp khay ndeh rklư. Pơh lah: Tiăr nti nău rêh văn hoá tâm rnôk hăn ntung trong n’hanh tĭng ƀư jăp nău way “Puăn mô, pe geh” ma Ủy Ban đăp mpăn hăn ntung trong  neh dak  hŏ kuăl jă lam ƀon lan tĭng ƀư rnôk râng hăn ntung trong.

“Puăn mô” lah: Mô ngêt ndrănh bia, nchuăt ngăch mblel, rhot đèn đỏ, ncho ndeh mô ăp siƀŭt quy định; mô rŭn in meng trong, nklang trong, mât njrăng soih aih an hăn ntung trong; mô geh nău way djơh janh tâm mbơh ngơi đah ăp nuĭh ndrel râng hăn ntung trong rnôk geh tâm peng tâm tom ndeh; mô an geh prah tâm tom rnôk râng hăn ntung trong.

“Pe geh” lah: geh gĭt wât ăp tŏng pháp luật mpeh hăn ntung trong;  geh nău gĭt mât njrăng êng đah săk nơm n’hanh nsum mpôl lam ƀon lan; geh nău mbơh ngơi văn hoá, tâm kơl nsum rnôk geh nău tât rmoh rmanh hăn ntung trong.

Wa Nguyễn Trọng Thái, Chánh Văn phòng ơm Ủy ban đăp  mpăn hăn ntung trong gưl neh dak lah:

Bôk năp lah ân ƀư ăp tŏng rêng siƀŭt quy phạm pháp luật mpeh đăp mpăn hăn ntung trong gay đăp mpăn dơi n’hao tam mât bôk kan ngih dak tâm ban kơt nta trong dơh gay  nuĭh râng hăn ntung trong tĭng jăp. Tâl bar, n’hao dăng pah kan nkoch trêng, đăm gĭt ăp quy định bah pháp luật tât nuĭh râng hăn ntung trong lah êng tâm ban kơt nuĭh ƀon lan lah nsum, lơn lah ăp nkual jru nkual ngai tât ƀon lan rnoi mpôl đê̆.

Ntĭm nti nău gĭt êng râng hăn ntung trong ntơm bah ăp rnăk wâl. U che, me bơ̆ ân tĭng ƀư jăp nău ntĭm nti, nkah kon său n’hanh nuĭh tâm rnăk wâl he gĭt mât njrăng êng rnôk râng hăn ntung trong. Lơn lah bu kuâng ranh ân ntĭt leo lor, geh nău gĭt êng hăn ntung trong đăp mpăn gay kon său kơt tĭng. Rnăk wâl lah tơm ntŭk ntĭm nti lor bôk năp đah ăp nuĭh. Nkre, nkoch trêng, ntĭm nti nău gĭt êng râng hăn ntung trong bah nuĭh ƀon lan ntŭk he gŭ, nhih pah kan, nhih nti, ntŭk  pah kan bah nuĭh kan, ăp mpôl kan nsum mpôl lam chính trị - rêh jêng kon nuĭh, bah nê khân păng dơi djăt, dơi gĭt wât n’hanh ndrel tâm nkoch nsum, rhuăt luh nău tă ơm gĭt kan, ntơm bah nê geh nău rgâl tâm nău mĭn, rgâl gĭt êng mpeh nău râng hăn ntung trong bah ăp nuĭh. Oh Nông Thủy Nương, nti jrô 11A5 Nhih nti Phổ thông Dân tộc Nội trú n’gor Cao Bằng nkoch:

Ăp nău tih kơt hăn ndrop ndreh wah jâng điện mô lah ndeh honda ma mô ndô môk bảo hiểm. Lah du trong hăn dŭt klach rvê mô dơn mpơl ta nău hăn djơh ma hôm lah mpơl nău mĭn djơh bah he đŏng. Jêng, tĭng gâp, he ân ntlơi ngăch dĭl nău way bên rsong hăn tih dja. He ân nkoch trêng n’hanh n’hao nău gĭt êng tĭng jăp luật đăp mpăn hăn ntung trong.

Gay geh  nău gĭt êng tĭng jăp luật hăn ntung trong geh nău tam, rlău ma pah kan nkoch trêng, ndrel đah nê lah ăp trong ƀư rmal hăn nkre. Lôch nê njêng mbrơi nău gĭt tĭng jăp êng pháp luật rnôk râng hăn ntung trong bah ăp nuĭh. Nkre, n’hao nău gĭt dơn êng bah rmôt cán bộ cảnh sát giao thông, thanh tra giao thông, ăp nhih pah kan, đơn vị, ăp nuĭh geh nău gĭt dơn êng nău kan geh tât.