Nkuăl miền Trung ndrel Tây Nguyên geh 19 n’gor, nkuăl ƀo têh. Bar nkuăl aơ geh neh ntu, văng sa, nau ơm yau, nau rêh êng êng, âk nau nơih yơk kŏ geh nau jêr, nau ntul rlong. Aơ lah ăp nau kan ân geh kơl an tâm nau ƀư bonh đă bu ur ndrel ăp nau kan đah bu ur tâm ăp nkuăl miền Trung-Tây Nguyên. Tâm nkuăl aơ, Đà Nẵng lah nkuăl dâk bôk mpeh rnoh cán bộ râng ƀư kan tâm dâng. Ăp n’gor: Nghệ An, Thừa Thiên Huế, Dak Nông geh rnoh bu ur ƀư kan gưl uỷ âk ngăn tâm n’gor, nkuăl, xã.

Kon Tum, Dak Lak ndrel Gia Lai geh rnoh cán bộ râng bư nau kan uỷ lah nŭih rnoi mpôl đê̆ âk ngăn (kơp dĭng lĕ rnoh bu ur cán bọ râng gưl uỷ). Tâm rnôk nê, Gia Lai lah nkuăl geh âk nau ang đah rnoh bu ur râng cán bộ gưl uỷ 3 gưl kŏ geh dơi ndrel rlau nau nchrăp ta nau rđau rmô 35-CT/TW bah Bộ chính trị. Rnoh bu ur ntoh măt Quốc hội ndrel ntoh măt HĐND ăp gưl bah Gia Lai rleu 30% rđil nau nchrăp, dâk tam 4 tâm nkuăl miền Trung-Tây Nguyên.

Tĭng ăp nkô̆ nau mbơh ta rơh nchră, ndrel ma nau hun hao văng sa, nau rêh ăp ding bah bu ur 19 n’gor nkuăl miền Trung-Tây Nguyên geh rgâl âk. Wa Võ Thanh An, Kruanh Ban Dân vận, Kruanh Uỷ ban MTTQ Việt Nam n’gor Quảng Nam ân lah, nau ngăn mpeh bu ur kan tâm nkual lah bu ur ƀư nau kan tâm gưl uỷ, n’gâng kan, ntoh măt Quốc hội ndrel HĐND hŏ prêh rlau bah năp nê. Nau săch ăp nŭih bu ur ƀư ntoh măt Quốc hội ndrel HĐND ăp gưl rnôk aơ mro n’hao âk rnoh nŭih ndrel nau nâp kan, geh săch mom, nau blau lý luận chính trị, nau kan tŏng dơi nau ŭch, âk lơn rđil đah năm bah năp nê:

‘Bah nau mêt uănh, MTTQ n’gor Quảng Ngãi saơ ăp nŭih geh săch ƀư ntoh măt Quốc hội ndrel HĐND ăp gưl kŏ geh ăp nau blau kan ueh, nau pah kan tĭng rmôt. Lah ntung nthoi đah Đảng, n’gâng kan đah Quốc hội, HĐND ăp gưl, đah cử tri”.

Yơn lah, êp ăp nau ang, hôm ơm ăp nau ê dơi ân geh njrăng. Rnoh mrô hun hao bu ur tâm âk nau kan hôm dêh lơn ma nau geh ngăn bah lam dak, kơ rnoh nŭih pah kan geh ntĭm nti dêh, nau săk geh mô âk ndrel rnoh rnăk ach o âk lơn, nau tâm lơh tâm rnăk vâl hôm âk nau tât jer, rnoh bu ur rnoi mpôl đê̆ lah rđau kan tơm hôm dêh lơn rđil nau geh dơi bah cán bộ bu ur. Wa Siu H’Thoan, Kruanh rmôt kan bu ur nkuăl Chư Prông, n’gor Gia Lai, ngơi:

‘Oh nur dôl uănh njrăng ngăn nau kan rnôk aơ nê lah kan pah, nau săk geh. Văng sa rnôk aơ hôm mâp âk nau jêr. Tâm nê kŏ geh tât nau gĭt blau ndrel nau mĭn kan dơi hun hao. Oh nur rnoi mpôl đê̆ âk ngăn bu ƀư kan lŏ mir, nau geh dơi dŏng đah ăp nau mhe ê geh âk, nau dơi gay hun hao đê̆ ri ma nau rklaih pă nau pah kan jan sa, njêng nau dơi geh gay oh nur dơi nsôih hun hao văng sa lah nau khlay”.

Ntoh măt Rnâng kan, wa Nguyễn Thị Minh Hương, Groi Kuanh rmôt bu ur Việt Nam ryơk, kơp dơn ăp nkô̆ nau, tâm nchră nau đă bah ăp ntoh măt ndrel nau ŭch n’hao nau dơi, nau kan bah bu ur, nchrăp luh dơi nau gay ƀư ngăn nau kan kơl an tât bu ur du ntrong săk tam, pơk ăp trong gay cán bộ bu ur geh dơi hun hao nau kan; pơk trong nơih gay cán bộ bu ur geh nau dơi gay ƀư ueh nau blau, nau kan bah nơm gay ma rgop, kơl an ân rnăk vâl ndrel nau rêh jêng:

‘Ăp nau kan kŏ hŏ geh dơi gưl uỷ, n’gâng kan kơl an, yơn hôm ơm ăp nau tâm ƀah đah nau ntrŭnh ndrel ntrŭnh ƀư nau kan ngăn. Săk gâp lah cán bộ rmôt kŏ saơ dơi nau kan bah nơm lah ân geh ngăch, blau nau kan mhe lơn tâm nau ƀư ngăcn ăp nau ntrŭnh ndrel ân geh kơl an tât ăp nŭih bu ur êng êng yor ăp rmôt nŭih êng êng ri geh nau ŭch êng bah ăp nŭih gay ƀư ngăn nau kan ân tâm di ndrel geh ăp nau kan mêt uănh đah rmôt nŭih”.

Đah 2 nau ƀư tâm nchră geh “Nau kan ƀư kan bah bu ur ndrel nau ƀư nau kan đah ăp rmôt bu ur ƀư du ntil kan” ndrel “Nau kan cán bộ bu ur ndrel ƀư ueh nau dơi bah rmôt cán bộ bu ur”, tâm nchră hŏ kơp dơn geh âk nau rgop gay ma lŏ ƀư ngăn lơn nau kan ban bu ur tâm rnôk mhe. Tâm nê ntrong kan tơm lah ntrŭt dăng hun hao văng sa, văn hoá, rêh jêng, n’hao nau rêh nuih n’hâm, drăp ndơ ân rmôt bu ur rnoi mpôl đê̆, bu ur tĭng chroh ndrel n’hao nau dơi ân rmôt cán bộ bu ur tâm rmôt tâm dâng, gay ma rgâl mhe nkô̆ nau, nau kan mêt uănh đah nau đă ngăn nkre geh nau dơi kơl an gay ƀư ueh ăp nau ntrŭnh, nau kan rnôk aơ mpeh nau kan bu ur./.