Bâh nĕ, ntop n’hao nău gĭt vât nsĭt tay săk rnglăy tâm âk năm ba năp. Bâh nĕ, ntop n’hao nău gĭt vât nsĭt tay săk rnglăy tâm nău ƀư tĭng pháp luật, ƀư tĭng ƀon lan ƀư tơm. Bâh nĕ ma rnoh ƀư tih mpeh pháp luật hŭch âk, kơl nuĭh ƀon lan đăp mpăn pah kan jan sa, hun hao wăng sa rêh jêng ta ntŭk.

Lĕ jêng nău way, ta bôk mông ôi n’hanh dŭt mông kêng măng, “ Nău ntoh ngơi bâh loa n’har bri” bâh pôih tahen n’har bri Huổi Luông, bâh n’gâng kan leo kan tahen n’har bri n’gor Lai Châu n’gloh ntoh ngai lam du nkual n’har bri. Nău kan aơ lĕ tă geh n’hao săk rnglăy âk ngăn rnôk geh nuh srê Covid-19 ntưp rêng dŭt âk n’hanh geh mât pơk tât aƀaơ. Kanŭng đah du mblâm loa, du mblâm ÚB ơm geh nkô̆ nău mbơh tơih n’hanh bôk ndeh máy lah cán bộ tahen n’har bri mbra dơi hăn tât lĕ rngôch ăp ntŭk geh nuĭh ƀon lan dôl gŭ rêh n’hanh pah kan gay ma mbơh tơih.

Đại úy Phan Thành Nam, groi chính trị viên, pôih tahen n’har bri Huổi Luông an gĭt: Ta ntŭk dŭt âk ăp ƀon lan rnoi Dao, Hà Nhì gŭ rêh. Ăp nkô̆ nău mbơh tơih lĕ geh cán bộ tơih geh cán bộ tahen n’har bri nchih rgum đah nău ngơi yuan mbơh rblang tay đah nău mpôl rnoi đê̆, tâm di đah nău gĭt vât bâh ƀon lan. Yor nĕ, ăp nuĭh dơi gĭt vât n’hanh geh gĭt ăp nkô̆ nău n’hanh dŭt rhơn nđơr rnôk geh nteh tăng loa n’har bri pơk.

"Đah nkô̆ nău răk, trong kan răk mbơh tơih mpeh luật n’har bri Việt Nam ta ntŭk, mpôl hên lĕ geh rdâk njêng nău kan gay ma mbơh tơih, leo ƀư bar pơh du tơ̆ ta ăp ƀon ta ntŭk. Trong kan aơ dŭt săk rnglăy ngăn, yor lah mbơh tơih ăp nkô̆ nău tơm khlăy, tâm di đah ƀon lan. Tâm let năp tay, mpôl hên mbra tâm rgop đah n’gâng kan ta ntŭk, ƀư tĭng răng dăng lơn tay ăp trong kan mbơh tơih”.

Yor nău wăng sa jêr jŏt, jêng mô di lah ta rnăk vâl gŭ dăch n’har bri dơi geh prăk rvăt tivi, mô lah máy tính geh internet gay ma gĭt nău mhe. Rlău ma nĕ, trong kan ma loa ntoh ngơi mbra dơi ndơ̆ mbơh nău mhe n’gloh ăp ntŭk, ăp ƀon jêng ƀon lan gŭ ta jay dơm, mô lah pah kan ta mir dơi geh djăt đŏng. Jŏ nkre, nău gĭt nău mhe bâh loa mbơh ngơi kơt lah lĕ jêng nău bên mô dơi mô geh đah ƀon lan n’har bri.

Nô Trần Chỉnh Hoàng, bản A Sa Phìn, xã Huổi Luông, nkuăl Phong Thổ an gĭt: Tâm nar prao n’hanh nar pơh ăp pơh, loa ntoh ngơi ta bản lĕ pơk tay nău mbơh mpeh nău ntrŭnh bâh Đảng, nău kơl pháp luật bâh ngih dak, Tâm breh 2 pơh du tơ̆ lah nkô̆ nău mbơh tơih geh tât Luật mât njrăng n’har bri Việt Nam, ăp nău kơl an geh tât n’har bri, mât trong n’har bri...Nkô̆ nău mbơh tơih gleh, dơh vât jêng lah ăp nuĭh gĭt da dê nău mbơh tơih.

" Ƀon lan tâm ƀon hên lĕ geh gĭt vât mpeh nău khlăy bâh nău mât trong n’har bri n’hanh nău khlăy bâh trong n’har bri ngih dak. Ƀon lan tâm ƀon hăn nsong ta ntŭk n’gâng ntăm n’har bri, trong n’har bri rĭ an geh mbơh tơih đah tahen n’har bri, gay ma ăp nuĭh uănh njrăng n’hanh bâh nĕ ƀon lan geh gĭt vât lơn mpeh trong n’har bri, n’gâng ntăm n’har bri”.

Ndrel đah ăp rơh mbơh tơih ăp ntŭk, mbơh tơih ta loa ntoh ngơi ta xã, poiih tahen n’har bri Huổi Luông lĕ đă cán bộ, tahen tâm ntŭk kan tât ăp ntŭk rnăk vâl gay ma mbơh tơih na nê̆. Bâh nĕ, kơl an ƀon lan n’hao nău mât njrăng đah ăp nău mplư rlăm, nău kan bâh ăp mpôl rlăng n’hanh ăp nuĭh tih. Yuh Lò Thị Trưởng, nuĭh ƀon lan ta bản Hồ Thầu, xã Huổi Luông, nkuăl Phong Thổ nkoch.

"Tâm rnôk ba năp nơh gâp lĕ geh tahen n’har bri mbơh tơih mpeh trong n’har bri, n’gâng ntăm n’har bri. Gâp lĕ gĭt vât an lah, n’har bri lah dŭt khlăy mô dởiŭn in. Lah du hê nuĭh ƀon lan ta n’har bri, gâp way geh gĭt an lah an geh ndrel đah tahen n’har bri mât nâp nău ƀư tơm, rnă njrăng bâh lam ngih dak”.

Tĭng nău mbơh bâh Đại tá Lê Công Thành, groi Chính ủy n’gâng kan leo kan tahen n’har bri Việt Nam rlău ma geh mbơh tơih đah trong kan trực tuyến tât 115 ntŭk tâm mâp ta n’gor, lĕ geh bơi tât 2.500 cán bộ lah nuĭh kan mbơh tơih, mbơh tơih kan pháp luật bâh gâl n’gor tât gâl xã tât râng mbơh tơih sŏng dăng. Nău mbơh tơih geh tâm rgop ƀa ƀơ đah Hội đồng mbơh tơih  ntĭm nti pháp luật bâh ăp nkuăl ta 22 xã n’har bri.

"Bâh nău kan leo ƀư mbơh tơih, mbơh tơih na nê̆ mpeh Luật n’har bri Việt Nam, nău gĭt vât bâh ƀon lan ta nkual n’har bri lĕ geh n’hao na nê̆. Đah ăp nău kan dŭt na nê̆, săk rnglăy, n’hanh geh âk ding ăp trong kan mbơh tơih rĭ mpôl hên lĕ geh mbơh tơih na nê̆ tât ƀon lan. N’hanh bôk năp ăp nuĭh ta nkual n’har bri lĕ geh gĭt vât na nê̆ mpeh Luật n’har bri Việt Nam. Bâh nĕ an lah nău Qh ntrŭnh Luật n’har bri Việt Nam dŭt khlăy ngăn tâm nău kan mât uănh nău ƀư tơm nkual neh, rnă njrăng n’har bri neh dak aƀaơ”.

Đah ăp trong kan, nău mbơh tơih mĭn kan mhe, săk rnglăy, ƀon lan ăp mpôl rnoi ta ntŭk lĕ gĭt vât na nê̆ lơn mpeh nău khlăy, nău tơm bâh nău mât rbăy, mât ueh trong n’har bri, n’gâng ntăm n’har bri ngih dak. Nuĭh ƀon lan ta n’har bri Lai Châu đăp mpăn nău pah kan jan sa, ăp năm n’huch rnoh rnăk ach o rlău 5%, nău tih ntŭk rêh jêng rlău 10%. Bâh nĕ, ăp nuĭh lĕ, dôl nsrôih ndrel đah ăp gâl ủy, n’gâng kan ta ntŭk ƀư tĭng ueh nău kan rdâk njêng, hun hao nkual n’har bri, mât đăp mpăn rnă njrăng chính trị, đăp mpăn ueh lăng ta nkual n’har bri.