Năm 2023 đah nuih n’hâm kan ngăn, nau nsôih prêh, Quốc hội ƀư jêh âk nau kan têh, aơ lah rơh bôk năp tâm 78 năm ƀư kan Quốc hội Việt Nam hŏ ƀư rƀŭn âk ngăn tâm du năm, đah 5 rơh. Nau kan mêt uănh geh n’hao ndrel rgâl mhe, nar lơn ngăch, blau ndrel tâm dăch ma nau ngăn. Quốc hội hŏ ăn ntrŭnh âk nau khlay bah neh dak. Tâm rơh rƀŭn ntoh măt ăp rmôt kan Quốc hội mbơh nau Quốc hội rơh bôk năp ƀư rƀŭn lôch jêh du năm kan. Wa Lý Thị Lan, Groi Kruanh rmôt kan ntoh măt Quốc hội n’gor Hà Giang, ân lah:

“Ndrel ma nau rgala mhe, n’hao nâp nau kan bah ntŭk kan ƀon lan đă, rmôt kan ntoh măt Quốc hội tâm ăp nkuăl rhơn yor aơ lah rơh bôk năp tâm năm kan bah rmôt kan ntoh măt Quốc hội. Gâp kŏ ân lah, aơ lah nau dơi ndrel lŏ lah mhe gay ntoh nau kơl an bah Quốc hội, uỷ ban Rnâng kan Quốc hội đah nau kan bah rmôt kan ntoh măt Quốc hội gay geh nau dơi rgop, ƀư jêh lơn nau đă, nau kan ndrel n’hao nau nâp nau kan bah rmôt kan ntoh măt Quốc hội, ntoh măt Quốc hội tâm n’gor”.

Rgop nau tâm nau ntrŭnh ƀư nau kan năm 2024, Tổng thư ký, tơm Jrâu kan Quốc hội Bùi Văn Cường đă rmôt kan Quốc hội ăp n’gor, nkuăl ƀon têh:

“Lŏ tâm rgop ngăn gay ma kơl tâm nchră mbơh ân Uỷ ban Rnâng kan Quốc hội rđau, ƀư ueh nau kan bah Hội đồng dân tộc, ăp uỷ ban bah Quốc hội tâm nau kan, nau uănh, đăp mpăn der nau geh ƀư tâm ndrih bah ăp rmôt kan mêt uănh bah ăp ntŭk kan, rmôt kan. Đah ma nkuăl geh âk Rmôt hăn kan rlet nau ntrŭnh, đă rmôt kan ntoh măt Quốc hội mbơh tât Tổng Thư ký Quốc hội mpeh rnoh rmôt hăn kan, nkô̆ nau kan, nŭih, nar pah kan ngăn tâm nkuăl gay geh nau mbơh Uỷ ban Rnâng kan Quốc hội năn rgâl ân tâm di”.

Ntoh nau tâm nar rƀŭn lôch, Kruanh Quốc hội Vương Đình Huệ rnê năm 2023 lah năm rnoh kan bah Quốc hội âk. Ăp rmôt kan ntoh măt Quốc hội ndrel nŭih pah kan kŏ ƀư ueh nuih n’hâm blau kan, uănh kan tam ndrel ƀư kan năn, ƀư ueh nuih n’hâm kan, tâm nau ndâk pháp luật, ƀư nau khlay bah neh dak ndrel uănh, mâp cử tri, mâp ƀon lan, uănh, bonh đă rklaih săm ƀŭt phong dôih, mbơh đă bah ƀon lan.

Tâm rơh tât, Kruanh Quốc hội Vương Đình Huệ đă, ăp rmôt kan ntoh măt Quốc hội, nŭih kan ntoh măt Quốc hội ƀư tĭng ăp nau tă dơi geh, lŏ pơk hvi, n’hao lơn tay rnoh ƀư nau kan, n’hao lơn nau nâp nau kan bah rmôt kan ntoh măt Quốc hội. Ngăn lah, lŏ ntrŭnh ƀư ueh nau kan, nau dơi khlay bah rmôt kan ntoh măt Quốc hội tâm nau ƀư kan ndrel tâm nau kan bah Quốc hội Việt Nam lah nsum. Tâm nê, nau kan tơm mrô ngoai bah rmôt kan ntoh măt Quốc hội âh ntŭk kan gay ntoh măt Quốc hội mâp ƀon lan:

‘Nau dơi, nau kan lah ƀư vơt ƀon lan, tâm rgop, mât đăp mpăn nau dơi gay ntoh măt Quốc hội mâp cử tri. Aơ lah nau kan bôk năp ndrel khlay ngăn, ri ma tâm rnôk ê dơi geh nkra luh nau ntrŭnh mpeh nau mâp cử tri ri tâm rnôk kơt nau ntrŭnh aơ, đă ăp đồng chí lŏ tâm rgop ngăn đah Mặt trận Tổ quốc, tâm nâm nau rđau bah gưl uỷ gay lŏ rgâl mhe jru dăch lơn nau kan mâp ƀon lan, mâp cử tri. Tâm luật rnôk aơ mhe ntrŭnh ntoh măt Quốc hội lŏ mâp ma cử tri tĭng bôk nau kan bah rmôt kan ntoh măt Quốc hội yơn ê geh nau ntrŭnh lah ntoh măt Quốc hội mâp ma cử tri êng, tĭng nau dơi bah ntoh măt ri ê geh nau ntrŭnh mbơh ngăn nau aơ. Ngăn lah jêh aơ mĭn njêng ƀư jêh nau ntrŭnh mpeh mâp cử tri ân geh ƀư ân kloh dơi nau nau hôm khuah aơ”.

Kruanh Quốc hội Vương Đình Huệ nkah, rmôt kan ntoh măt Quốc hội râng tâm rgop nsum ma Hội đồng Dân tộc ndrel ăp Uỷ ban bah Quốc hội mêt uănh tâm n’gor, uănh n’ôi, bonh đă nau ƀư rklaih nau đă, nau phong dôih, nau lah mbơh bah cử tri, công dân, đă ăp ntŭk kan mbơh nau mpeh nau kan aơ, nkre ân geh nkah nau kan bah rmôt kan ntoh măt Quốc hội./.