Mpôl hên sĭt ta nkual ƀon lan rnoi Khmer gŭ rêh ta xã Phương Thạnh, Huyền Hội, nkuăl Càng Long, ntŭk kăl e nơh tă bu ntup bom ndrak aƀaơ lĕ rgâl săk. Trong nhựa, bê tông lĕ rngôch, ăp ngih jay têh  ueh ndơn an ăp ngih ja truh sat kăl e nơh. Wa Thạch Ngọc Phương Thi, nuĭh gŭ dăch bên đah nkual neh aơ bâh ntơm jê̆ an gĭt: “Ta năp nar rklaih đăp mpăn ta aơ dŭt jêr jŏt ngăn, bol ma ê hŏ jât km yơn lah ŭch hăn ta n’gor roh tât n’gul nar mơ tât. Yơn aƀaơ, kanŭng 20 mnĭt dơm lah tât hôm n’hanh mơh rnôk ŭch hăn dơi da dê yor lah trong hăn mô dơn ueh aih ma ta măng geh ŭnh đen nchrat ang đŏng.

Ta xã Đa Lộc, nkuăl Châu Thành, ngoăy tâm âk xã dŭt jêr jŏt bâh bôk nău kan 135 bâh chính phủ ntơm nơh, aƀaơ lĕ sĭt tât nkual ƀon lan mhe. Aƀaơ nău geh râng geh du hê nuĭh bâh xã geh rlău 53 rkeh prăk/năm. Dơi geh nău geh kơt aƀaơ, du gâl lah yor bâh geh nău blău tâm nău pah kan jan sa bâh ƀon lan ta aơ geh n’hao, tâm rnôk oh kon ăp rnăk đê̆ neh pah kan geh dơn lăp kan tâm ăp công ty, xí nghiệp nău geh đăp mpăn. Ta meng ăp nău kơl an, nta nău dơh nơih gay ma hun hao wăng sa, ăp ntŭk kan chính trị, rêh jêng, hăn bôk năp lah Mặt trận Tổ quốc vay geh nsrôih mbơh tơih, rgum ăp mpôl kan tâm rnglăp lĕ mpôl rnoi. Bâh nĕ, ntŭk rêh jêng ăp mpôl rnoi ndrel nsum rêh tâm pêt, tâm kơl bâh tâm nău hun hao wăng sa rnăk vâl tât ƀư tĭng ăp nău pah kan ta ntŭk. Nău dŭt nkah ngăn lah mô di kâp tât rnôk sâm geh têh ndrŏng mơ dĭng tâm kơl ma ƀon lan tâm pêt tâm kơl bâh nău jêr jŏt. Bâh ntơm năm rklaih đăp mpăn năm 1975, Trà Vinh ntơm ndâk nsơm nău tât khuch bâh rơh tâm lơh tâm du n’hanh đăp mpăn nău pah kan jan sa. Tât aƀaơ, nău wăng sa bâh du n’gor geh hun hao tay đăp mpăn, nău rêh bâh ƀon lan mô rlu hun hao. Bâh du ntŭk geh bơi tât du n’gul rnoh nuĭh bâh rnoh ach o ta năm ntơm njêng n’gor năm 1992, aƀaơ rnoh rnăk ach o hŭch hôm 0,56%, nău geh râng geh du hê nuĭh geh rlău 63 rkeh prăk/năm. Nău geh ndơ dŏng, ntung trong mô rlu geh rdâk njêng ƀư ueh. Tât aƀaơ, lam n’gor geh 80/85 xã geh tâm di đah nău mpŏng ntrŭnh kơp dơn nkual ƀon lan mhe n’hanh geh 6 ntŭk kan gâl nkuăl geh tâm di nău mpŏng n’hanh ƀư lôch nău kan rdâk njêng nkual ƀon lan mhe. Dơi geh kơt aơ lah bâh nău leo kan bâh Đảng, ntŭk rêh jêng ăp mpôl rnoi ta Trà Vinh way geh n’hao nău way tâm rnglăp, n’hao nău way ơm têh dăng ta rơh tâm lơh tâm su, nar măng pah kan jan sa rdâk njêng nău rêh mhe. Wa Phạm Tiết Cương, groi kruanh UBMTTQ Việt Nam n’gor Trà Vinh lah na nê̆.

“Tă geh ăp rơh pah kan cách mạng, ƀon lan ăp mpôl rnoi ăp n’gâng kan, ăp ntŭk kan lĕ njêng soan kan rgum lĕ nău kan. Rĭ nău tâm rnglăp lĕ mpôl rnoi lĕ jêng nău kơt nti lĕ nău kan bâh đảng bộ n’hanh ƀon lan n’gor Trà Vinh. Ta rơh rdâk njêng neh dak, Mặt trận n’hanh ăp ntŭk kan chính trị, rêh jêng ăp gâl, an geh nsrôih tâm rgop ƀư tĭng, uănh nđôi ăp bôk nău kan, nău nchrăp kan, ƀư tĭng nău kơl kan đah nuĭh geh kan kăl e, nuĭh ach o, nuĭh dăch ach o...ntop rdâk njêng nău tâm rnglăp ta n’gor”.

Đah soan dăng tâm rnglăp tahen ƀon lan, tâm rnglăp mpôl rnoi geh n’hao, nkô̆ mpŏng kan bâh nău nchrăp lah tât năm 2030, hun hao wăng sa râng geh du nkual rnoi đê̆ ta n’gor Trà Vinh geh dŭt đê̆  lah bâh 6%/năm let lơ. Nău geh du hê nuĭh rnoi đê̆ bơi tâm ban râng geh nsum ta n’gor, n’huch rnoh rnăk ach o jŭr ba dâng 3%. Geh tât 70% rnoh xã geh âk ƀon lan rnoi đê̆ geh tâm di đah nău mpŏng nkual ƀon lan mhe n’hao prêh. Tât năm 2030 geh 40% nuĭh pah kan rnoi đê̆ geh gĭt đah ăp nău pah kan.

Gay ma dơi geh ăp nkô̆ mpŏng kan aơ, rlău ma ndăn ăp rnoh nuĭh kan, n’gor mbra ntrôl dăng ƀư lôch lĕ nău kan, rgâl mhe pah kan n’hanh n’hao an săk rnglay mât uănh ngih dak mpeh nău kan mpôl rnoi, rdâk njêng n’hanh mbơh tơih ƀư tĭng ăp nău nchrăp kan, bôk nău kan, nău kơl an ƀư tĭng trong pah kan mpôl rnoi. Wa Hà Thanh Sơn, groi kruanh Ban dân tộc n’gor Trà Vinh an gĭt.

“Tâm let năp tay mpôl hên rgum mbơh tơih gay ma kơl an ƀon lan nơm geh gĭt vât nău kan nău ƀư tơm tâm hun hao wăng sa- rêh jêng, gay ma nău rêh geh hun hao. Tal 2 lah mpôl hên geh ƀư tay đah ăp ntŭk kan, n’gâng kan an geh mât đăp mpăn tâm ăp nău kan bâh ntơm săch mbơh, uănh năl an tât uănh nđôi gay ma n’hao an săk rnglăy nău pah kan.