Geh du nău ngăn aơ, rnôk bôk nău kan ndâk njêng thôn ƀon mhe dơi jêh ri ntung trong ta ăp xă nkual prêh bah Khánh Hòa lĕ dơi geh bê tông da dê, têh hvi, kloh uĕh. Trong uĕh, yơn nău wât hăn trong bah kônh wa ta nkual aơ lŏ mô tâm di, lĕ rngôch hôm e nău mĭn thơ tha rnôk ƀĭt ndeh, ngăn lah druh ndăm, kơt: Mô ndô môp n’gang bôk, ncho hăn ngăch, rdêng âk ir nuĭh dơi an... Ta nkual yôk, dŭt âk ăp nuĭh ƀĭt ndeh măy lah druh ndăm, jêng lah ăp nuĭh gĭt mpeh luật ntung trong, gĭt nău ntrŭnh lah rnôk ncho ta ndeh măy lah an ndô môp n’gang bôk, yơn gĭt lah du nău hôm e ƀư tĭng đŏng tĭng ăp nuĭh. Yuh Cao Thị Dân ta xă Cầu Bà, nkuăl nkual yôk Khánh Vĩnh, n’gor Khánh Hòa an gĭt:

Geh nuĭh hăn ndô môp n’gang bôk, geh nuĭh mô ndô môp n’gang bôk yor jay êp.

Ta nkual yôk, âk kon se knŭng mhe 12, 13 năm deh lĕ ƀĭt ndeh măy ê nkra êng. Bah jêt lĕ ndrĭ jêng tât druh ndăm mô hŏ nti mpeh luật ntung trong, mô hŏ geh sam ƀŭt ƀĭt ndeh yơn geh ndeh lah ncho. N’hêl na nê̆ ntoh lư ta nkual yôk lah ndeh ê nkra êng, rnoh đăp mpăn bah ndeh aơ lah mô âk yơn aơ lah ndeh hăn nsong bah âk druh ndăm. Geh âk druh ndăm mhe luh ntŭk răm ngêt ndrănh bia lĕ ƀĭt tay ndeh hăn trong. Wa Triệu Mạnh Hải, nkuăl Khánh Vĩnh, n’gor Khánh Hòa an gĭt:

Ƀon lan ta aơ nti đêt, 2 tay lah nti nsơm mô tât lôch tât dŭt rnôk ncho ndeh lah nchoăt lêng lang. Ngih pah kan dơi kan rmal mư gĭt nơm ƀư tih yơn nău lĕ rlău hôm.

Cảnh sát ntung trong ƀa ƀơ ƀư ntŭk kâp njrăng uănh nđôi, rmal tih yơn ăp ntŭk kâp njrăng dŭt âk ta ăp trong me têh. Yor nê, ăp trong tâm xă, tâm thôn ăp nău tih bah âk druh ndăm mô hŏ dơi rmal. Ăp rơh nkoch trêng, nkah ntĭnh mô hŏ rgâl nău wât tĭng luật ntung trong bah nuĭh ƀon lan nkual yôk. Ngoăy tâm âk jêr jŏt đah trong kan đăp mpăn ntung trong ta nkual yôk prêh lah rmôt cảnh sát ntung trong bah ăp ntŭk hôm e đêt tâm rnôk ƀon lan hvi. Ngoăy tâm âk trong ƀư bah Khánh Hòa đah nău wât tĭng luật ntung trong an kônh wa nkual rnoi mpôl đêt, nkual yôk lah mât uĕh ƀư tơm bah ăp bu ranh ƀon, kranh thôn, nuĭh nsing nơm ta ntŭk, bah nĕ pơk hvi, ntrŭt nsôr khân pơng jêng nuĭh dŭt n’hâm tâm trong kan nkoch trêng, mbơh tơih wât đăp mpăn rnôk hăn trong an nuĭh ƀon lan. Wa Nguyễn Ngọc Hoa, Manh ƀư Kruanh UBND xă Khánh Trung, nkuăl Khánh Vĩnh, n’gor Khánh Hòa an gĭt:

Mpôl hên săch du hê ntoh măt nuĭh nsing nơm tâm ntŭk gŭ rêh kơt ƀon lan ăp rnoi mpôl đêt gay tâm rgop mpeh âk ntil ntĭm nti, đê̆ đŏng jao an công an kuăl ôp, ntêt nkri, nkah ntĭnh ăp nuĭh way tih mpeh nău đăp mpăn ntung trong.

Ăp nar, ta âk trong nkual yôk hôm e âk druh ndăm hăn trong ta ăp ndeh ê nkra êng, mô ndô môp n’gang bôk đah âk ntil hăn trong ƀư nuĭh uănh saơ ndrăt săk. Jrô cảnh sát ntung trong Công an n’gor Khánh Hòa lĕ ndâk ƀư ntrong kan Ƀon lan rgŏ jă blău mpeh “Nkoch trêng, mbơh tơih ntĭm nti Pháp luật mpeh đăp mpăn ntung trong an ƀon lan nkual yôk Khánh Vĩnh lvang 2021-2025”. Tă bah nĕ lĕ ƀư nkoch trêng âk nar an bơi 1 rbăn nuĭh ntoh măt ăp ban ngành, nsum mpôl, ăp rmôt kan chính trị rêh jêng, bu ranh ƀon; ƀon lan rnoi mpôl đêt ta 3 xă Liên Sang, xă Cầu Bà, xă Sơn Thái (ta nkuăl Khánh Vĩnh) n’hanh Ngih sam ƀŭt Trung cấp nghề dân tộc Nội trú nkuăl Khánh Vĩnh... An 70 mlâm môp n’gang bôk, phăt sam ƀŭt nkoch trêng mpeh đăp mpăn ntung trong; ton mpeh nău tĭng đăp mpăn ntung trong an ăp oh kon hŏk; ndâk njêng n’hanh nglăp 2 bảng nkoch trêng đăp mpăn ntung trong đah nkô̆ “Cảnh sát ntung trong yor đăp mpăn ta ăp trong hăn” ta trong Quốc lộ 27 ta 2 xă Cầu Bà n’hanh xă Sơn Thái. Bôl trong kan đăp mpăn ntung trong đăp mpăn ntung trong ta nkual prêh, nkual yôk bah Khánh Hòa mô hŏ săk rnglăy kơt nău ŭch, yơn lah đah nău lăp dŭt n’hâm kơt aƀaơ, mbra tâm năm tât, trong kan đăp mpăn ntung trong ta nkual prêh mbra geh âk nău rgâl uĕh, rgop tâm nău n’hŭch rmanh prah tâm tom ndeh ta lam n’gor.