Ăp năm mhe aơ, bôk nău kan "Ndơl jâng oh hăn tât nhih nti” n'hanh "kon mât Pôih  n'har bri" bah tahen n'har bri n'gor Dak Lak dôl rêng lam nău tâm rŏng tât ăp nkual n'har bri. Ăp bôk nău kan dja hŏ kơl hang rhiăng kon se rlău jêr jŏt gay đăp mpăn hăn tât nhih nti.  

          Tâm trôm jay gưl 4 ta buôn Ea Rông, xã Krông Na, nkuâl Buôn Đôn, n'gor Dak Lak, oh H’Hải Niê Kdăm, kon se nti jrô 7A, Nhih nti Trung học Cơ Sở Võ Thị Sáu dêh rnhôn ôn bài, đah nău ŭch jêh aơ tay jêng nai ntĭm. Oh kon đơi bơ̆ bah rnôk 2 năm deh, rnăk mpeh săk dŭt jêr jŏt, mê̆ way kop ji mbro. saơ nău rêh jêr jŏt bah oh, năm 2019, Pôih n'har bri Sêrêpôk hŏ dơn kơl oh H’Hải ma bôk nău kan "N'hao ndơl jâng oh tât nhih nti". Ndrel đah nău ntop kơl ăp khay 500.000 prăk, cán bộ, tahen Pôih n'har bri Sêrêpôk way hăn chop khâl, rgŏ jă n'hanh ntĭm nti oh hăn nti. Gĭt nău jêr jŏt bah rnăk wâl n'hanh gĭt năl nău tâm rŏng bah ăp kônh tahen n'har bri, H'Hải way nsrôih n'hanh geh nău  dơi uĕh tâm kơt nti:

          “Ăp kônh hŏ kơl gâp dŭt âk hôm, gâp dŭt lah uĕh ăp kônh yor ăp kônh hŏ kơl jâng chuat hăn tât nhih nti. Gâp hŏ dŭt nsrôih tâm kơt nti, ăp kônh hŏ rgŏ jă nsrôih kơt nti  n'hanh ăp kônh hŏ kơl ntĭm nti ăp môn.”

          Kon đơi bơ̆ n'hanh rnăk dŭt jêr jŏt mha êng đŏng, oh Hà Duy Khánh ta thôn Đừng Nhạp, xã n'har bri Ia Lốp, nkuâl Ea Súp hŏ dơi Pôih n'har bri Ea H’leo kơl jâng chuat oh hăn nhih nti. Yuh Lò Thị Loan, me Khánh an gĭt, nău mât kơl bah tahen n'har bri hŏ nsĭt tay nău rhơn mƀak, rgŏ jă dŭt têh đah rnăk wâl:

          “Tahen n'har bri ntop kơl an mon lah 500.000 rbăn/khay, geh kơl tay ăp nklâm ndơ, siƀŭt, ndơ dŏng sa khlay, hôm hăn tât rnăk wâl ôp khâl rgŏ jă, mât uănh, ntĭm nti mon nti ren đŏng. Tâm bah ri aơ nơh ri mon geh nău rgâl gĭt lơn tâm kơt nti.”

          Trung uý Hà Văn Tân, cán bộ Rmôt rgŏ jă ƀon lan Pôih n'har bri Ea H’leo lah ngoăy tâm ăp cán bộ tĭng ƀư nău kan "Kơl jâng chuat oh hăn nti" n'hanh "Kon mât Pôih n'har bri". Nô an gĭt, ăp kon se dơi ntop kơl lĕ rngôch lah ăp kon se kon đơi, nkre jêr jŏt mpeh drăp ndơ, nkre mô geh ăp tŏng nuih n'hâm răm mƀak. Jêng, ăp nô way ntrŏng mô  dơn ntop kơl mpeh drăp ndơ ma hôm mhâm ƀư gay ring lam dơi nău tâm rŏng, kơl ăp kon se geh suan ntrôl nsan hao:

          “Oh nô cán bộ, tahen bah pôih way hăn tât chop khâl, rgŏ jă, chŏng đă ăp kon se hăn nti. Lôch tĭng ƀư bôk nău kan ri ăp kon se rgâl geh nău gĭt âk, ăp kon se geh nău nsrôih ngăn n'hanh nsan hao tâm kơt nti".

          An ƀư bôk nău  kan "N'hao jâng chuat oh hăn tât nhih nti" n'hanh trong leo ƀư "Kon mât pôih n'har bri", ntơm bah năm 2014 tât aƀaơ, Tahen n'har bri n'gor Dak Lak hŏ dơn mât bơi 250 kon se. Ndrel đah rnoh ntop kơl ăp khay lah 500.000 prăk, ăp pôih n'har bri  hôm geh âk bôk nău kan pă học bổng, ăp nklâm ndơ kơl geh rnoh khlay kơl ăp kon se đăp mpăn kơt nti. Thiếu tá Vũ Văn Dương, Chính trị viên groi kruanh Pôih n'har bri Ea H’leo an gĭt, nkoch mpeh trong an ƀư bôk nău kan:

          “Ƀư tĭng nău rđău đă bah Đảng uỷ, Bộ chỉ huy tahen n'har bri, pôih n'har bri kan nsum đah gưl uỷ, n'gâng kan ta ntŭk n'hanh ăp nhih nti tâm ban kơt rnăk wâl ăp kon se ta xã Ia Lốp gay hăn ôp uănh, sơch ăp kon se nti geh nău rêh jêr jŏt mha êng gay ntop kơl. Tât aƀaơ, pôih n'har bri hŏ kơl n'hao ndơl jâng chuat an 50 kon se. mpeh nău dơn kan n'gâng kan ta ntŭk ri way ndrel tâm ban ŭch, tĭng âk, hôm ăp nhih nti n'hanh rnăk wâl ăp kon se ri dŭt rhơn, nđơr.”

          Đah nău ndrel hăn bah ăp tahen wăn grat ư̆r, âk kon se ta n'har bri bah Dak Lak hŏ n'hanh dôl tĭng kơn hăn tât nhih nti, rlău dơi nău rêh jêr jŏt mha êng gay jêh aơ tay jêng nuĭh gĭt blău kơl uĕh an ƀon tơm, neh dak./.

Công Bắc VOV Tây Nguyên/Nuĭh rblang: Điểu Thân