Giàng Pằng lah thôn dŭt jêr jŏt, tă nklang xă Sùng Đô, nkuăl Văn Chấn nklăp 30 km. Gŭ ta yôk prêh, mô geh điện dŏng, mô geh sóng điện thoại, trong hăn jêr jŏt, jêng nuĭh ƀon lan ta aơ đêt dơi gĭt đah nu nău mhe tă bah dih, ngăn lah ăp nu nău geh tât nău kơl n’hanh pháp luật. Yor rĭ, cán bộ xă hăn jŭr thôn ƀa ƀơ, tât ăp rnăk ƀon lan nkoch trêng ăp nău ntrŭnh, nău kơl bah Đảng, pháp luật bah Ngih dak, nkre mĭn joi gĭt ăp nău ŭch ngăn bah kônh wa, ngăch dăn đă đah gưl bah lơ gay geh âk nău kơl tâm di, kơl kônh wa rgâl nău rêh.

          Dŭt năm 2022 mhe rlău, ta ntŭk nău kơl bah Bôk nău kan rƀŏng tĭng hun hao wăng sa-rêh jêng nkual rnoi mpôl đêt n’hanh nkual yôk, kônh wa ta thôn Giàng Pằng lĕ dơi ntop kơl téc dak dŏng, măy lŏ mir gay rhŏ nkra njêng. Nô Giàng A Trư, nuĭh thôn Giàng Pằng, xă Sùng Đô rhơn nkoch:

“Aƀaơ téc dak tŏng dŏng an rnăk wâl hôm, mô tŏng dak kơt bah năp đaơ tay. Bah năp đaơ mô geh téc gay n’gâr dak ri mô tŏng dak yan phang aơ, dak dŏng an rnăk wâl hăn sŏk ta dak diăng”.

Wa Giàng A Lứ, Groi Kruanh UBND xă Sùng Đô, nkuăl Văn Chấn an gĭt tay:

“Ăp bôk nău kan rƀŏng tĭng lam dak dŭt săk rnglăy, rlău ma téc dak hôm ntop kơl đah măy nkra njêng lŏ mir, kơl an ăp rnăk ach o mô geh ndơ, tâm rnôk nkra njêng mbra dơh lơn”.

Nkoch trêng, rgŏ jă ƀon lan nkual prêh n’hŭch nău gŭ ur sŏk sai ơm n’hanh gŭ ur sa tâm êp dak mham lah ngoăy tâm âk nkô̆ nău dơi n’gâng kan ƀon lan ăp ntŭk ta nkual prêh Yên Bái dŭt uănh tât. Wa Sùng Thị Xía, Groi Kruanh UBND xă Suối Bu, nkuăl Văn Chấn, n’gor Yên Bái an gĭt, aơ lah nău kan mô dơh yor nău wât bah nuĭh ƀon lan mpeh pháp luật mô hŏ tŏng ăp:

“Lah knŭng nkoch trêng pa nô, áp phíc yôk ta trong ri dŭt jêr, jêng rnôk nchrăp trong nkoch trêng, mpôl hên an geh đah ndơ ƀư na nê̆ gay nkoch trêng. Rnôk nkoch trêng lah dŏng nău ngơi yuăn nuĭh ƀon lan bu mô wât jêng mbra nkoch trêng đah nău ngơi rnoi mpôl đêt”.

Yuh Lầu Thị Mỷ, ta thôn Bu Cao, xă Suối Bu an gĭt, oh yuh bah hên năm aơ mhe 14 năm. Nău rêh rnăk wâl jêr jŏt, bơ̆ roh ơm, mê̆ lŏ kop, ji mro, kơt âk bu ur nuĭh Mông êng, oh ŭch sŏk sai ơm. Dơi gĭt nău rêh bah rnăk wâl, ăp nuĭh kan, nkoch trêng bah xă Suối Bu lĕ geh măt dâl gay rblang mbơh ntĭm:

“Jêh rnôk djăt cán bộ jŭr tât ta jay nkoch trêng mpeh nău khuch bah gŭ ur sŏk sai ơm, đê̆ đŏng rmal prăk, rnăk wâl gâp lĕ ntrŭt nsôr oh bu ur hên plơ̆ tay hăn, ton mô an oh bu ur gŭ sai bah năp 18 năm deh”.

Ƀư tĭng Bôk nău kan rƀŏng tĭng lam dak hun hao wăng sa, rêh jêng nkual rnoi mpôl đêt n’hanh nkual yôk lvang 2021-2025, n’gor Yên Bái aƀaơ geh 10 nău nchrăp ƀư, 14 nău nchrăp ƀư jêt n’hanh 36 nkô̆ nău tĭng gưl dôl dơi ƀư  đah dĭng lĕ prăk bơi 1.200 rmen prăk. Rlău ma ntuh kơl hang rhiăng ndơ ndâk ƀư ntung trong, ăp nău nchrăp ƀư lĕ ntop kơl măy mŏk, kon ntil, ntĭm nti nău kan, mkra pă nău kan, rgop ntrôl dăng hun hao wăng sa, n’hŭch ach o ngăch, nâp nâl an nkual rnoi mpôl đêt. Yuh Mùa Thị Máy ta bản Háng Sung, xă Mồ Dề, nkuăl Mù Cang Chải an gĭt: Ăp nău nchrăp dôl ƀư tĭng mô knŭng tât ăp nău rgâl tâm trong ƀư sa, hun hao wăng sa rnăk wâl ma hôm rgâl nău mĭn, nău wât bah ƀon lan nkual prêh:

“Kônh wa ƀon lan, lơn lah ăp oh yuh bu ur tâm bản mât rong nta an nău geh rnăk wâl, rgop jŭt n’hŭch ach o.

Wa Đỗ Quảng Vịnh, Groi Kruanh Ban Dân tộc n’gor Yên Bái an gĭt: Năm bah năp, Ban lĕ rgop ăp nkuăl, nkual têh tâm n’gor ƀư ăp jrô tiăr nti “N’hao n’hâm soan nsum mpôl n’hanh cán bộ mbơh ƀư bôk nău kan ta ăp gưl mpeh Bôk nău kan lam dak hun hao wăng sa-rêh jêng nkual rnoi mpôl đêt n’hanh nkual yôk” an bí thư chi bộ, ăp kruanh thôn bản, ăp chi hội n’hanh ntŭk gŭ rêh ƀon lan, gay cán bộ ta ntŭk n’hanh nuĭh ƀon lan wât, ƀư tĭng, geh di nău kơl:

Ban tâm rgop đah ăp nău kan rgŏ jă ăp nuĭh, tâm rgop ăp bôk nău kan rƀŏng tĭng gay m’hâm ƀư wăk kol, tâm trŭp tâm rnôk mbơh ƀư. Đah bah dâng, ngăn lah ăp ntŭk dơi dŏng ăp nău kơl ri rnôk mbơh ƀư an na nê̆ kloh rah wah, na nê̆, di nuĭh, ntŭk ntô an nău kơl tât đah nuĭh ƀon lan”.

Ndơ̆ nău kơl tâm nău rêh, n’hao nău wât bah nuĭh ƀon lan, nta an tâm ban âk tâm nău rêh, ngăn lah ta ăp ntŭk ƀon lan gŭ nkual rnoi mpôl đêt, n’gor Yên Bái dôl nsrôih jêh nău rƀŏng hun hao nâp nâl, Uĕh nđĭr, tâm di, uĕh n’hanh răm m’ak”.