Nar rƀŭn chi bộ Đảng 4, Đảng bộ Ngih săm ƀŭt THPT Hoàng Hoa Thám, nkuăl Lệ Thuỷ, n’gor Quảng Bình ueh ngăn. Pơk bôk nar rƀŭn, ăp Đảng viên nkoch ăp nau tât Wa Hồ. Rơh rlau aơ, tâm ăp nar rƀŭn Đảng, ăp chi bộ tâm Đảng bộ Ngih săm ƀŭt THPT Hoàng Hoa Thám nkpch ăp nau mpeh Wa Hồ gay ma kơt ntĭm nti ndrel kơt tĭng. Tâm nê, nchŏng kloh ăp nau ê dơi tâm cán bộ đảng viên gay ma nchrăp trong rklaih, nkra mô lah kơt tĭng ăp nau ueh, kan ueh. Nai nti Nguyễn Thị Thương, Chi bộ 4, Đảng bộ Ngih săm ƀŭt Hoàng Hoa Thám, nkuăl Lệ Thuỷ mbơh, bah năp nar rƀŭn, ăp đảng viên nchrăp nau nkoch tât Wa Hồ gay nkoch ân đảng viên tâm chi bộ. Nê lah ăp nau nkoch “Dak duh, dak n’ik”, “mông nar khlay ngăn”, “Ngan por pă jêng pe”, “ao răm”, “bar mpang ty”... ntơm bah rnôk ntrŭnh nau aơ, ăp chi bộ rƀŭn rgum ueh ngăn:

 ‘Bah năp ăp nar rƀŭn Chi bộ, hên joi ăp ndrôm săm ƀŭt ueh, nau nkoch ueh mpeh nkô̆ nau nkoch ntĭm nti ndrel pah kan tĭng nau mĭn, nau kan, nau rêh Hồ Chí Minh. Bah ăp nau nkoch aơ ri hên rhuăt luh ăp nau ntĭm nti ân săp đảng viên, bah rmôt Chi bộ ndrel Đảng bộ. Kŏ tă bah nê rhuăt luh ăp nau nau ntĭm nti tă bah nau rêh jêng ân tât tâm nau kan ngăn”.

 Đảng bộ nkual têh Nông trường lệ Ninh, nkuăl Lệ Thuỷ n’gor Quảng Bình geh bơi tât 500 đảng viên rƀŭn tâm 12 chi bộ. Ăp khay, gưl uỷ ƀư rƀŭn du ôi gay ma tâm nchră, săch nau kan ueh, khlay nkoch tât wa ân ăp đảng viên ndrel djăt tâm bôk nar rƀŭn. Wa Nguyễn Thanh Hải, Bí thư Chi bộ Tổ dân phố Liên Cư, nkuăl têh nông trường Lệ Ninh, nkual Lệ Thuỷ ân lah, nau ueh bah chi bộ âk ngăn đảng viên lah kon lŏ mir ri ma nau nkoch trêng nau ntrŭnh mrô 05 bah Bộ chính trị ân geh nau nơih, ngăn ndrel kơl an ăp đảng viên dơi geh ƀư tâm nau rêh, nau kan. Tâm nar rƀŭn êp ăp ngăn, geh đảng viên hăn rƀŭn la, khuch tât nar rƀŭn chi bộ. Rnôk aơ, wa Nguyễn Thanh Hải, Bí thư Chi bộ nkoch nau mpeh Wa Hồ: “Mông nar khlay ngăn- 10 mnĭt kŏ la đŏng”. Bah nau nkoch aơ, gưl uỷ ŭch ăp đảng viên uănh êng săk nơm, blau mĭn tât mông kan bah nơm, bah âk nŭih ndrel blau uănh khlay nau nê:

 ‘Đảng viên ƀư tĭng ăp khay, 3 khay du tŏ, ăp năm ndrel dŭt năm gay ma tâm rgop nsum ndrel nchră nau nâp bah đảng biên. Ŭch ƀư ueh tâm nau nkoch mpeh Wa Hồ ndrel gay ân rêng lam ngăn tâm nau rêh, tâm ƀon lan ri bôk năp phung hên tâm rnôk rƀŭn mbơh chi bộ, săch âk nau kan ueh ngăn bah Wa, mpeh ăp nau ntoh lư gay ma ntĭm nti, kơt tĭng, tâm nê kŏ rgum ƀư kloh ăp nau mô ueh, mô tâm di tâm cán bộ, đảng viên. Nau mĭn bah phung hên lah tă bah nau kan jê̆ ngăn, leo lăp tâm nau rêh nuih n’hâm bah đảng viên, gĭt nkre tă bah ăp nau nkoch jê̆”.

Đảng bộ Lệ Thuỷ, n’gor Quảng Bình geh 38 Đảng bộ ndrel 19 chi bộ, đah 11.800 đảng viên. Ƀư tĭng nau rđau mrô 05 mpeh nau ntrŭt dăng nau ntĭm nti ndrel ƀư tĭng nau mĭn, nau rêh, nau kan Hồ Chí Minh, tât rnôk aơ, 100% chi bộ đảng tâm lam nkuăl ƀư ueh nau kan nkoch nau tât Wa Hồ, nŭih ueh kan ueh tâm nar rƀŭn. Wa Lê Vĩnh Thế, Bí thư nkuăl uỷ Lệ Thuỷ, n’gor Quảng Bình mbơh, nkoch nau tât Wa Hồ rgop nau rgâl mhe nkô̆ nau ndrel n’hao nau nâp nau rƀŭn Chi bộ tâm dâng, tă bah nê, njêng nau ntrơn rgâl ueh ngăn tâm ăp cán bộ, đảng viên ndrel ƀon lan. Ăp nau nkoch tât Wa geh nau rêng jru ngăn, gay đảng viên, ƀon lan ntĭm nti, năl kloh nau kan bah nơm tâm nau kan ndrel nau rêh:

‘Phung hên leo nau ntĭm nti, pah kan tĭng nau mĭn, nau rêh, nau kan Hồ Chí Minh tâm ăp nau ntrŭnh bah Đại hội Đảng ăp gưl ndrel ƀư nau tâm rgop nsum ma nau kan chính trị tâm nkuăl kơt: Jut jăng ach o, rklaih ntrơn ntŭk ntu, ndâk njêng ƀon lan mhe. Lệ Thuỷ kŏ ndâk 5 nau kan geh nsum ma nau mĭn, nau rêh Hồ Chí Minh, leo tât ăp đảng bộ, chi bộ ƀư ngăn ân ăp đảng viên. Mro ƀư nau kan aơ geh nsum ma nau kan mbơh leo trong lor bah nŭih dâk bôk, đảng viên leo trong lor, ƀon lan tĭng ba kơi gay ƀư ueh n’hâm dăng rgum nsum bah ƀon lan tâm lam nkuăl”./.