Ăp năm êp aơ, bu năch dăch ngai tât nkuăl ƀon têh Kon Tum gay ma uănh ăp nau kan văn hoá, ndơ ngêt sa bah ƀon lan tâm nkuăl lơn ma âk. Năm 2019, đảng viên Rơ Mah Hiu, tâm ƀon Tiêng 1, xã Tân Sơn, nkuăl ƀon têh Pleiku hŏ janh pơk hvi lơn ntŭk tăch ndơ ngêt sa bah rnoi Jrai tâm nglan ngih păng nơm. Ntŭk ngih jong bah rnoi Jrai, geh mpla chĭng, gâr, sah, mô lah rup ndah...nê lah ăp ntil ndơ mơng tâm nau rêh, tuch tăm ndrel nau vay bah rnoi Jrai. Ăp ndơ sa tă bah byăp bri, kao play mbŭng, n’ha bum blang...ndrel ka kro, djar, ka gir, geh kônh wa rnoi Jrai tâm ƀon rong, tăm, nhŭp tâm dak. Bol ma ndơ sa ndrel nau gơm nơih, yơn njêng nau kah êng ngăn, kơl bu năch dăch ngai tât gay ma sa nar lơn ma âk. Tâm rnôk ƀư ngih, bah chi bộ ƀon Tiêng 1, đảng viên Rơ Mah Hiu geh gĭt tât ăp nau ntrŭnh mpeh hun hao pâl n’aih ndrel mât nau ơm. Nkre, nô kŏ râng ăp jrâu ntĭm nkoch mbơh mpeh nau răk kloh ndơ ngêt sa ndrel nau ƀư kan pâl n’aih nsum mpôl. Hăn tâm di trong, ntŭk tăch ndơ sa nar lơn ma hun hao, nô Hiu geh prăk ri kơl an âk lơn đŏng ân kônh wa ndrek geh prăk:

‘Rnăk gâp geh nau mĭn ŭch pơk ntŭk tăch ndơ ngêt sa gay ma leo nsĭt nau săk geh ân rnăk vâl ndrel rnăk vâl kônh wa đŏng. Năch rnôk aơ bu ŭch ngăn saơ tur chĭng, hyơt tĭng nau vay bah rnoi Jrai. Gâp jă rmôt tur chĭng tâm ƀon tât đŏng. Gâp trok prăk ân ma bu rlau bar tŏ, gay ma ân bu lŏ ƀư ueh nau vay ơm, ngăn lah njêng nau văng sa, tal bar lah mât nau ơm yau tă bah kăl e”.

Tân Sơn lah xã nkuăl tâm êp ma nkuăl ƀon têh Pleiku. Ta aơ geh 5 ƀon, thôn. Tâm nê, geh 2 ƀon lah Tiêng 1 ndrel Tiêng 2 geh âk ngăn lah rnoi Jrai. Ntơm năm 2016 tât rnôk aơ, rnơm ntrŭnh ƀư nau mrô 06, ăp ƀon rnoi mpôl đê̆ ta aơ geh kơl an ƀư mhe, trong trong hăn ndrel ăp ngih rƀŭn rgum. Nŭih ƀon lan geh ntĭm nti mpeh nau ƀư pâl n’aih nsum mpôl mât nau ơm chĭng gong, tanh njuh...Tâm nau kan tuch tăm, kônh wa tăm cà phê, ƀư lŏ ndrel ndâk nkuăl tăm ân geh tŏng dơi tăch luh. Ngăn lah, 63 rnăk ach o, êp ach o geh kơl an rnoh prăk 1,3 rmen gay jut lơi ngih truh sat, kơl an kon ntil tăm, mpa rong tă bah bôk nau kan. Rnôk aơ, tâm 350 rnăk rnoi Jrai tâm xã Tân Sơn, knŭng hôm 3 rnăk ach o, nau geh dơi du hê bôk nŭih dŭt năm 2023 lah 43 rkeh. Ndrel ma nê, ăp ƀon kŏ geh chĭng, rmôt tanh njuh, nkre kơl an ƀon lan tâm n’ur, ntĭm nti ăp nau ơm ueh bah rnoi Jrai. Wa Rơ Châm Joi, đảng viên ƀon Tiêng 2, xã Tân Sơn, nkuăl ƀon têh Pleiku, ngơi:

‘Rnôk aơ, ăp ngih kŏ geh cà phê, geh neh tăm ba. Kônh wa rhơn ngăn. Rnôk aơ ngih dak nkra trong, rnâng kan kŏ kơl mbơh nkoch mpeh bảo hiểm y tế kŏ dơi geh tât 95%”.

Wa Phạm Văn Hiếu, Bí thư Đảng uỷ xã Tân Sơn, nkuăl ƀon têh Pleiku mbơh, nkô̆ nau bah nau ntrŭnh mrô 06 Rnâng kan nkuăl uỷ Pleiku lah nau rgum, ƀư ueh nau sakư tam bah tu tơm ntuh kơl hun hao văng sa, rêh jêng nkual rnoi mpôl đê̆. Ndri ma, ăp năm rlau aơ, Đảng uỷ xã ndrel ăp chi bộ ƀon, thôn hŏ rđau, đă lam ntrong kan chính trị ƀư ăp bôk nau kan, nau kan văng sa ndrel ăp nau kơl an ân tâm di ma ăp ƀon rnoi mpôl đê̆. Tâm nê, đảng bộ ndrel n’gâng kan hăn ndrel ma kônh wa tâm nau rgâl tơm tăm, mpa rong, ƀư tĭng nau blau mhe tâm nau kan tuch tăm, tă bah nê n’hao nau săk geh, n’huch ach o nâp nâl:

‘Ntơm rnôk geh bôk nau kan ndrel nau ntrŭnh bah n’gor uỷ, thành uỷ ri nau rêh bah kônh wa geh rgâl âk ngăn, rnoh rnăk ach o ăp năm huch. Âk rnăk ach o geh ngih dak, mặt trận, ngih dak, nŭih geh nuih n’hâm lŏng kơl an, ri ma geh nau rgâl, đăp mpăn nau rêh”.

Ăp nau tă geh bah xã Tân Sơn, nkuăl ƀon têh Pleiku, Gia Lai ân saơ, nau leo ăp nau ntrŭnh bah đảng lăp tâm nau rêh, hŏ njêng geh ăp nau kan ngăn, ƀư rgâl ăp ntil tâm nau rêh, n’hao nau săk geh nâp nâl bah ƀon lan./.