Aơ lah ăp nau ton nsôih ƀư bah H’Mên Teh, rnoi Bunong lah đảng viên mhe geh rnglăp tâm lơ 22/12/2023, tâm chi bộ Buôn Diêo, xã Bông Krang, nkuăl Lắk. H’Mên Teh mbơh, geh lăp Đảng lah nau rhơn ndrel n’hao săk nơm yor ăp nau nsôih bah nơm tâm rơh rlau aơ geh kơp dơn:

            ‘Gâp geh lăp Đảng ri gâp rhơn n’hao săk ngăn. Tâm du năm ƀư đảng viên dự bị aơ gâp mra nsôih gay ma chiăr nti săk jăn nơm ân ăp nau ueh bah Đảng viên ndrel ân geh nsôih lơn gay 12 khay ba kơi jêng đảng viên ngăn”.

            Geh lăp đảng ntơm năm 2018, yuh Lữ Thị Thái rnoi Thái, rnôk aơ lah Đảng viên pah kan jan sa blau bah Chi bộ buôn Thái, xã Bông Krang, nkuăl Lắk. Hăn lor tâm nau ntrơn rgâl tơm tăm mpa rong tâm nkuăl, rnôk aơ đah nau rong ndrôk, rong ndrŭng brai, tăm tơm sa play, hŏ leo nsĭt an rnăk yuh Thái rnoh prăk rlau 400 rkeh. Êng nê, yuh Thái hôm leo trong tâm ăp nau kan bonh đă tâm thôn ƀon pă êng neh nkra trong ƀon lan, mpoh ang trong ƀon, ƀư trong kao:

            ‘Lah ngoai tâm ăp nŭih đảng viên gâp mrô leo trong, tal bôk năp lah nkoch mbơh kônh wa ƀư ueh ntrong kan bah Đảng, pháp luật bah Ngih dak, hôm đah săk nơm ri mro hăn leo lor ăp ntrong. Ƀư nau ntrŭnh mrô 05 bah nkuăl uỷ ri hên leo lăp tâm nau kan ngăn, săk gâp kŏ ƀư lor gay kônh wa kơt tĭng ri rnôk aơ ntrơn rgâl tơm tăm mpa rong tâm ƀon lah 70%, bah năp nơh tăm cà phê mô tâm di đah nhe aơ, ri ntrơn tăm ndơ êng ri ueh oi, rnôk aơ kônh wa hun hao văng sa dăng ngăn”.

            Mô êng knŭng uănh kơl hun hao đảng viên rnoi mpôl đê̆ tĭng ăp chi bộ, nau kan hun hao đảng viên rnoi mpôl đê̆ geh nsum ma nau pă nŭih cán bộ lah rnoi mpôl đê̆ tâm ntrong kan chính trị, ntŭk kan Ngih dak mro geh nkuăl Lắk kơl an đŏng. Tât rnôk aơ, rnoh cán bộ, công chứcm viên chức lah đảng viên rnoi mpôl đê̆ tâm lam nkuăl lah 1.547 nŭih. Tâm nê, gưl xã geh 227 nŭih. Nô Y Wu Sruk, Groi Kruanh UBND xã Yang Tao, nkuăl Lắk mbơh, nau kan hun hao đảng viên rnoi mpôl đê̆ geh dŏng cán bộ lah nŭih rnoi mpôl đê̆ tâm ntŭk hŏ ƀư tĭng ueh n’hâm dăng bah ntŭk kan Đảng tâm dâng. Bah nê, rgop nau ƀư ueh nkô̆ hun hao văng sa, rêh jêng tâm nkuăl, ndrel ma nê, nau kan nkoch trêng, bonh đă ƀon lan tâm thôn geh ƀư tĭng ăp nau ntrŭnh, ntrong kan, Nghị quyết bah Đảng, ngih dak geh nơih, săk tam lơn:

             “Xã Yang Tao geh 95% nŭih rnoi mpôl đê̆, gâp gĭt nau vay lĕ mơng bah ơm bah ƀon lan ta aơ, ngăn lah nau ngơi gay ma nkoch mbơh ma kônh wa, gâp kŏ lah nŭih tâm ntŭk aơ đŏng, gâp gĭt nau rêh bah ƀon lan, nau geh jêng, nau jêr bah ƀon lan, tă bah nau nê nkre ƀư tĭng trong kan bah Đảng nơih nkoch mbơh gay ƀon lan gĭt ndrel nơih nkoch trêng tâm nau rêh”.

            Nkuăl Lắk geh rlau 75 rbăn nŭih, tâm nê rnoh nŭih rnoi mpôl đê̆ rlau 63%. Wa Đào Thị Thanh An, Groi Bí thư Rnâng kan nkuăl uỷ nkuăl Lắk, n’gor Dak Lak mbơh, gay hun hao đảng viên tâm ăp chi bộ thôn, ƀon nkuăl jru, ngai, nkuăl rnoi mpôl đê̆, Rnâng kan nkuăl uỷ jao ân Ban tổ chức nkuăl tâm rgop nsum ma Rnâng kan ndâk njêng Đảng vay ntĭm mbơh nau kan nkoch trêng, nau ƀư nau kan gay ma doh rklaih, nkre bonh đă, nkah lah, mêt uănh nau ƀư nau kan hun hao đảng tâm thôn, ƀon. Rnơm nê, nau kan hun hao đảng geh ƀư tâm di nau ntrŭnh, đăp mpăn nau dơi ndrel nau nâp dăng bah đảng viên mhe. Rnôk aơ lam nkuăl hôm 737 nŭih geh nau blau dôl lah ntŭk gay ma ăp nŭih ŭch ân geh lăp đảng tâm năm 2024. Wa Đào Thị Thanh An lah rjăp:

            ‘Ăp năm phung hên kŏ ndâk ăp nau nchrăp, ăp nau ntrŭnh đă gay rđau tât ăp ntŭk kan tâm dâng bah Đảng nkre ntơm bôk năm gay geh nau uănh, mbơh nŭih geh nau blau râng hăn nti ăp jrâu ntĭm nti ân geh lăp Đảng. Gay n’hao nau nâp ân ăp nŭih đảng viên ăp năm hên kŏ ndâk nau pă nau kan ân ăp đồng chí uỷ viên Rnâng kan, Uỷ viên Ban chấp hành tât râng rƀŭn rgum đảng ndrel đah ăp chi bộ thôn, ƀon gay ma ndrel rƀŏng, êng nau hun hao văng sa rêh jêng, ndâk njêng ân đăp mpăn ƀon lan tâm dâng kŏ geh ntĭm mbơh ân đảng viên tâm ăp chi bôk thôn ƀon kơl an ƀư ueh nau ndâk njêng Đảng, kơl an nau pă nŭih ân hun hao đảng viên”.

            Rmôt cán bộ, đảng viên lah nŭih rnoi mpôl đê̆ tâm Lắk hŏ ƀư ueh nau dơi tơm ngăn bah lam ntrong kan chính trị tâm dâng, mro leo trong tâm nau ndâk njêng rmôt geh tâm rnglăp lam ƀon lan, mât ndrel hun hao nkuăl./.