Tĭng ƀư bôk  nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang lvang năm 2021 - 2030, n’gor Bình Định nsrôih, rĭng hŭch 2% - 3% ăp năm druh ndăm tâm  bĭch ur sai mô tŏng năm deh  n’hanh mât kân mô ntoh geh tay druh ndăm tâm bĭch ur sai dăch ndŭl mham đah ăp ntŭk, rnoi mpôl đê̆ geh rnoh tâm bĭch ur sai mô tŏng năm deh n’hanh dăch ndŭl mham âk.  

          Nhih nti Phổ thông Dân tộc nội trú THCS n’hanh THPT An Lão geh 2 gưl nti đah lơn âk kon se nti lah nuĭh Ba Na, H’rê. Nar 5/4/2024, Ban Dân tộc n’gor Bình Định kan nsum đah Nhih nti Phổ thông Dân tộc nội trú THCS n’hanh THPT An Lão ntoh măt Câu lạc bộ “Druh ndăm lah mô đah nău tâm bĭch ur sai mô tŏng năm deh n’hanh dăch ndŭl mham” ta nhih nti dja.

Câu lạc bộ dja way ƀư sinh hoạt way nkô̆ gay njrăng n’gang nău tâm bĭch ur sai mô tŏng năm deh n’hanh dăch ndŭl mham an kon se nti.  Ăp kon se nti  hôm dơi đăm gĭt ăp quy định rmal đah nău tih tâm bĭch ur sai mô tŏng năm deh n’hanh dăch ndŭl mham, nău tât khuch bah tâm bĭch ur sai mô tŏng năm deh n’hanh dăch ndŭl mham tât n’hâm suan n’hanh nău rêh; mbơh nti mât chăm n’hâm suan deh nse druh ndăm rchong.

Đinh Thị Bảo Thi, kon se nti jrô 9A2, Nhih nti Phổ thông Dân tộc nội trú THCS n’hanh THPT An Lão saơ ăp ntil nău câu lạc bộ nsĭt an ăp băl dŭt uĕh n’hanh ngăn ngăn:

“Ta nhih nti geh nai ntĭm hŏ nkoch trêng mpeh nău tâm gŭ ur sai mô tŏng năm  deh an mpôl hên hôm lôch nê mpôl hên nkoch trêng tay an ăp băl êng ƀa ƀă gĭt mpeh nău khuch  tâm bĭch ur sai mô hŏ tŏng năm deh. Bah nău nkoch trêng dja, mpôl hên ndrel tĭng ƀư jăp, mô tih”.

Âk xã ta nkuâl mpeh yôk yang An Lão geh trong ƀư uĕh gay nking nchăng nău tâm bĭch ur sai mô tŏng năm deh n’hanh dăch ndŭl mham. Ta xã An Hưng, ăp thôn, ƀon tâm nkol, tâm ton n’glăp nkô̆ quy định  na  nê̆ rmal ăp nău tih geh tât nău tâm bĭch ur sai mô tŏng năm deh n’hanh dăch ndŭl mham. Ăp bu ranh ƀon, kruanh ƀon, nuĭh geh nsing nơm geh nău khlay kan tâm nău nkoch trêng, rgŏ jă nuĭh ƀon lan ndrel nsum ti nking nchăng tâm bĭch ur sai mô tŏng năm deh n’hanh dăch ndŭl mham. Wa Đinh Văn Ranh ta thôn 4, xã An Hưng an gĭt:

“Nuĭh geh nsing nơm mpôl hên way grêt dêh ngăn ngăn n’hanh rƀah gĭt tĭng rnăk ƀon lan gay ndrel n’gâng kan, nsum mpôl bah thôn hăn nkoch trêng. Lah saơ rnăk I geh nuĭh nchrăp tâm bĭch ur sai mô hŏ tŏng năm deh lah mpôl hên hăn tât na nê̆ gay nkoch trêng tât jay, mô an ƀư tâm nđăp rnôk mô hŏ tŏng năm deh. Ăp nar sinh hoạt thôn, sinh hoạt ăp n’gâng kan, ăp rơh nê mpôl hên ndop nkoch trêng an păng lăp đŏng”.

Ban Thường vụ Huyện ủy An Lão rđău đă ăp gưl ủy Đảng, n’gâng kan, mặt trận, nsum mpôl lăp nkoch trêng, n’hao nău gĭt êng an nuĭh ƀon lan mpeh nkô̆ nău tâm bĭch ur sai mô tŏng năm  deh n’hanh deh nse gay der bah nău tâm bĭch ur sai mô tŏng năm deh n’hanh dăch ndŭl mham. Nău nkoch trêng ân ma nău dâk kan ngăn ngăn, di nuĭh n’hanh di trong ƀư nkoch trêng ân jôn rbăn, ngăch ngăr. Wa Phạm Minh Tâm, Kruanh jrô kan Dân tộc nkuâl An Lão an gĭt:

“Đah Jrô kan rnoi mpôl đê̆ ân kan nsum đah huyện đoàn An Lão, UBND ăp xã, thị trấn, ntrôl dăng pah kan nkoch trêng ma âk trong ƀư êng êng. Lơn lah ta 3 nhih nti nội trú n’hanh 2 nhih nti bán trú bah nkuâl. Rgum tâm nău nkoch trêng an kon se nti jêng tât nkô̆ nău ntlơi nti tâm bĭch ur sai ơm. Yor kơt nê̆ tâm năm aơ mô geh nuĭh tâm bĭch ur sai ơm mô tŏng năm deh”.

Nkuâl mpeh yôk yang Vân Canh lah nkual geh âk nuĭh Bana, H’rê gŭ rêh hŏ geh du đêt nuĭh tâm  bĭch ur sai ơm mô tŏng năm deh dŭt âk n’gor Bình Định. Nkô̆ geh tât tâm bĭch ur sai ơm ăp kon se mô  hŏ gĭt ăp tŏng mpeh nău gĭt ntĭm nti mât prăp săk, n’hâm suan deh nse n’hanh  druh ndăm rchong, nău mô gĭt wât âk  mpeh pháp luật; mô geh nău mât njrăng bah rnăk wâl. Wa Nguyễn Xuân Việt, Groi Kruanh rnâng kan UBND nkuâl Vân Canh an gĭt, nkuâl hŏ tâm pă cán bộ Jrô kan rnoi mpôl đê̆ n’hanh ăp xã way hăn tât tĭng thôn, ƀon rgŏ jă ăp rnăk ký ton mô an geh nău tâm bĭch ur sai mô tŏng năm deh n’hanh dăch ndŭl mham. Nău kan nsum đah nhih nti n’hanh rnăk wâl êng dơi uănh khlay.

“Bol nkoch trêng dŭt âk, ăp n’gâng kan lăp kan yơn nô  nău tâm bĭch ur sai ơm nha hôm geh đŏng. Aƀaơ, trong nkoch trêng tơm, nău gĭt êng bah ƀon lan ma  lơn lah ăp kon se mhe têh  mô hŏ geh nău gĭt ăp tŏng nău khuch bah nău tâm gŭ ur sai ơm jêng tât rnôk lăn geh hôm ri jêh aơ tay khuch têh tât nău mât chăm  n’hâm suan an oh  kon,  khuch tât nău geh wăng sa rnăk wâl n’hanh nău tât khuch lam rêh jêng nsum. Nkuâl hŏ đă ăp n’gâng kan dơi kan, nhih nti nkoch trêng mhâm ƀư gay n’hao nău gĭt êng an kônh wa, lơn lah đah nuĭh ân dơi nkoch trêng lah rmôt kon se”.

N’gor Bình Định nsrôih, rĭng hŭch 2% - 3% ăp năm rnoh druh ndăm tâm bĭch ur sai ơm mô hŏ  tŏng năm deh  n’hanh mât kân mô an ntoh tay druh ndăm tâm bĭch ur sai dăch kêng ndŭl mham đah ăp ƀon lan, rnoi mpôl đê̆  geh rnoh tâm bĭch ur sai mô tŏng năm deh n’hanh dăch ndŭl mham âk. Wa Đinh Văn Lung, Kruanh Ban Dân tộc n’gor Bình Định an gĭt, đơn vị hŏ đă ăp nkuâl kan nsum đah ăp nhih nti ta ntŭk n’hao dăng nkoch trêng, nău lư n’hanh ntĭm nti an kon se nti nău gĭt wât  nsum lơn mpeh n’hâm suan deh nse, nău gĭt di mpeh tâm bĭch ur sai rnăk wâl, năp nău blău rêh, ăp trong njrăng der bah tâm bĭch ur sai  ơm an ăp kon se:

“Nău nkoch trêng tâm bĭch ur sai mô tŏng năm deh n’hanh dăch ndŭl mham gŭ tâm trong nchrăp 2 bah trong nchrăp 9, bôk nău kan 1719. Ban Dân tộc n’gor hŏ geh rdâk njêng trong nchrăp bôk năm n’hanh tâm pă prăk dŏng kan an ăp nkuâl gay ndrel nkoch trêng. Rlău ma nkoch trêng ri Ban Dân tộc n’gor ndrel njêng câu lạc bộ ntoh măt câu lạc bộ lah mô đah tâm bĭch ur sai mô tŏng năm deh n’hanh dăch ndŭl mham; ƀư pano áp phích nchih pla nkoch trêng ta du đêt nuĭh ƀon lan, du đêt xã ma geh rnoh nuĭh tâm gŭ ur sai ơm mô tŏng năm deh âk”./.