Nkuâl Sa Thầy lah ntŭk lor bôk năp bah n’gor Kon Tum ƀư lôch jêh  nău  kan dơn ngoăy Bí thư Chi bộ nkre ƀư kruanh thôn n’hanh Bí thư Chi bộ nkre ƀư kruanh Ban pah kan Mặt trận thôn, tĭng nuih n’hâm Nghị quyết 21, nar 16/6/2022 bah Ban Chấp hành Trung ương Đảng khóa XIII mpeh nău n’hao dăng rdâk tay mpôl kan đảng tâm dâng n’hanh n’hao săk blău rmôt kan đảng viên tâm rơh mhe. Nău dơn ngoăy hŏ kơl nkuâl ƀư glêh tam nău kan, n’hao nău dơi mât bôk kan, tĭng ƀư ăp nău dơn kan chính trị.

Dơi geh “Ƀon lan nsum nơm, Đảng n’hao đă” năm aơ lah năm kan tâl bar wa Đỗ Hiền Lương dơn ƀư Bí thư Chi bộ nkre ƀư kruanh thôn 2 thị trấn Sa Thầy, nkuâl Sa Thầy. Gay ƀư lôch jêh nău kan Bí thư Chi bộ đah 67 đảng viên n’hanh kruanh thôn ta nklang nkuâl, geh nău ŭch âk mpeh hun hao lĕ mpeh tuch tăm mât rong n’hanh tăch rgâl rhŏ dŏng, tĭng wa Lương, ân lah nuĭh bah Đảng, bah ƀon lan, lah ntŭk rgum tâm rnglăp ngăn:

“Ăp nău kan tâm dâng ri âk ntil, âk trong, mô kơp mông nar moh rnôk geh nău kan lah ân nkra dĭl. Nuĭh ƀon lan nsing nơm sơch  he hao ri he ân plơng tay nău nsing nơm nkra di lĕ nău  kan bah ƀon lan mô an geh nău tâm lah đah ƀon lan đah ƀon ri thôn dja đah thôn êng. Ntơm bah rnôk gâp ƀư tât aƀaơ lah mô hŏ geh nkô̆ nău gưl bah lơ nkah. Uănh nsum nău kan nkra đăp mpăn”.

Gay tĭng ƀư trong nchrăp dơn ngoăy Bí thư Chi bộ nkre ƀư kruanh thôn n’hanh Bí thư Chi bộ nkre ƀư Kruanh Ban pah kan Mặt trận thôn, tâm ăp năm rlău aơ Huyện ủy Sa Thầy uănh khlay tĭng ƀư jăp pah kan sơch nuĭh kan đăp mpăn mpeh nău gĭt blău, nău dơi kan, nuih n’hâm uĕh lŏng, trong gŭ rêh n’hanh nsing nơm. Nơm geh kơt nê̆ rmôt Bí thư Chi bộ nkre ƀư kruanh thôn hŏ mpơl dơi nău khlay kan găr ntil kruanh rđău kan chính trị, ntŭk rgum tâm rnglăp ta ăp chi bộ, thôn, ƀon. Wa Y Sâm, Groi Bí thư Rnâng kan Huyện ủy, Kruanh HĐND Sa Thầy an gĭt:

lor bôk năp ân ntrŏng ƀư nê lah nău sơch nuĭh kan. Sơch ăp nuĭh geh nsing nơm, ăp nuĭh gĭt wât trong nchrăp bah Đảng, trong kơl pháp luật bah Ngih dak. Ƀon lan ân nsing nơm, Đảng n’hao đă. Nkual jêr jŏt rđău đă tâm dâng ôp uănh tay ăp tŏng lam lĕ rngôch đah cán bộ mom, druh ndăm n’hanh lơn lah đah ăp kon se hŏ nti geh bằng cấp. Tâl bar đŏng lah đah ăp kon se hăn sĭt tahen gay n’hao n’glăp Đảng ntĭm nti tơm nuĭh kan tâm dâng”.

Đah nău nsrôih ƀư lôch jêh trong nchrăp bah Trung ương n’hanh bah n’gor, tât khay 8/2023 tâm 64 thôn, ƀon mpeh 11 xã, thị trấn bah nkuâl Sa Thầy hŏ geh 53 Bí thư Chi bộ nkre ƀư kruanh thôn n’hanh 11 Bí thư Chi bộ nkre ƀư kruanh Ban pah kan Mặt trận thôn. Ngăn an saơ, nău dơn ngoăy Bí thư Chi bộ nkre ƀư kruanh thôn mô lah  Kruanh Ban pah kan Mặt trận thôn hŏ kơl ƀư glêh tam nuĭh kan, hŭch dơi 64 nuĭh kan n’gul rnâng kan ta thôn n’hanh nău kan rgum ta du bôk tơm dơh an nău tĭng ƀư.

Nơm geh sơch dơi ăp nuĭh mât bôk kan blău, ƀĭt juet nău kan ngăch ngăr, nănh mĭn, nănh ƀư, nsrôih lĕ đah nău dơn kan n’hanh geh nsing nơm âk tâm ƀon lan jêng hŏ ntik dơi nău tam pah kan. Wa Phan Chí Thiện, Bí thư Đảng ủy xã Ya Ly, nkuâl Sa Thầy lah rjăp:

“Pe ƀon rnoi mpôl đê̆ ri Bí thư Chi bộ nkre ƀư kruanh thôn lah nuĭh ƀon tơm ta ntŭk, dŭt gĭt wât mpeh kônh wa, nô nău wăng sa nău rêh ƀon lan jêng dŭt dơh đah nău kan Bí thư Chi bộ lah an trong nchrăp n’hanh tâl bar lah tĭng ƀư nău kan bah kruanh thôn. Dŭt dơh tâm nău an tĭng ƀư ăp trong nchrăp bah Đảng, pháp luật bah Ngih dak”.  

Hôm wa Nguyễn Minh Thuận, Bí thư Đảng ủy thị trấn Sa Thầy, nkuâl Sa Thầy an gĭt:

“Đảng ủy hŏ nsrôih ƀư lôch jêh 100% pah kan dơn ngoăy dja. Nău dơh lah nuĭh ƀon lan dơn kan na nê̆, đăm jru năn ngăch trong nchrăp, trong kơl bah Đảng n’hanh nuĭh nkre ƀư jêng ngăn ngăn, rdâk njêng trong nchrăp gay an tĭng ƀư ta nkual ƀon lan gŭ bah he. Nău  dơh tâl bar đŏng lah lôch pah kan rdâk njêng Đảng ri hŏ n’hao têh n’hanh rgâl mhe dơi trong kan, nău khlay kan rđău kan bah Đảng lơn lah nău khlay kan bah Bí thư ta nsum mpôl ntŭk ƀon lan gŭ”

Ntơm bah nău dơi bôk năp bah nău tĭng ƀư dơn ngoăy nău kan Bí thư Chi bộ nkre ƀư kruanh thôn n’hanh Bí thư Chi bộ nkre ƀư Kruanh Ban pah kan Mặt trận thôn, Huyện ủy Sa Thầy dôl tĭng groi nđôi tay, ntrŭt ntrôl, ôp uănh, nkre geh nău rgâl tâm di năn ngăch gay ăp nuĭh dơi “Ƀon lan nsing nơm, Đảng n’hao đă” tĭng ƀư jăp nău khlay kan, nău dơn kan bah he. Mpeh jŏ jong Huyện ủy Sa Thầy mbra ra uănh tay mbro, uănh năl nău gĭt blău, nău dơi kan, nău nsing nơm bah rmôt cán bộ ta thôn ƀon, đảng viên tâm ăp chi bộ gay sơch nuĭh kan; uănh khlay pah kan kơi năp nti, n’hao nău gĭt blău, nău dơi kan n’hanh geh trong kơl dơh tâm di gay rmôt kan dja đăp mpăn pah kan. Kơp nsum lam n’gor Kon Tum, hŏ geh 360 tâm lĕ rngôch rnoh 756 thôn ƀon, tổ dân phố geh Bí thư Chi bộ nkre ƀư kruanh thôn, kruanh tổ dân phố n’hanh Bí thư Chi bộ nkre ƀư kruanh Ban pah kan Mặt trận. Nău n’glăp 2 nău kan jêng ngoăy rgop ƀư rtŭt glêh cán bộ ta ăp thôn ƀon./.