Du nar nkoch trêng, ntĭm mbơh pháp luật bah ăp tahen Đồn biên phòng Pù Nhi ân ăp ƀon lan tâm nkuăl Mường Lát, n’gor Thanh hoá. Bol ma geh nkoch tât ăp nau ntrŭnh bah pháp luật yơn dĭng lĕ geh nkoch tâm dăch dơh lơn gay kônh wa nơih djăt, nơh gĭt ndrel nơih kơt, mô lah geh nau ŭch ôp kŏ geh ôp ndrel geh mbơh nkoch kloh.

 Lah xã gôl yôk bah nkuăl Mường Lát, Pù Nhi geh trong n’har jong 15km êp ma dak Lào. Ndri ma, nŭih ƀon lan hăn ro đah 2 dak âk trong. Yor nê, nau kơl an kônh wa gĭt lơn ăp nau ntrŭnh tâm nau hăn ro lah nau khlay, ngăn lah hôm ndrel ma nau mât ƀư tơm nkuăl neh đăp mpăn n’har bri. Đại uý Nguyễn Văn Phương, kruanh rmôt bonh đă ƀon lan đồn Biên phòng Pù Nhi, mbơh:

 ‘Gŭ kan tâm xã Pu Nhi, nkuăl Mường Lát, ngoai tâm ăp nkuăl jêr ngăn mpeh nau rnă njrăng ri hên dŏng âk nau kan, ntơm bah nkoch trêng rgum ân tât nkoch trêng mbơh tĭng trong, n’ăp ma nau ngơi yuăn ndrel nau ngơi bah rnoi mpôl đê̆, jêh nê kônh wa ƀon lan tâm nkuăl aơ geh n’hao lơn nau kơt tĭng, ntŭk kan biên phòng ƀư ăp nhoat geh n’hao, nau kan hăn ro mô gĭt moh nau ri tât ôp cán bộ biên phòng rnôk jur hăn kan mô lah hăn tât đồn gay ma mâp ôp ăp nau ƀư tĭng pháp luật. Ntơm bah nê rnoh nau tih hành chính ăp nau tih êng kŏ geh huch đŏng, kônh wa ƀon lan gơih ngăn rânh, đăng ký tâm ăp rnăk jêh ri ăp rmôt mât njrăng trong n’har bri, ăp ntŭk kan đăp mpăn bah nkuăl, ndrel ma tahen Biên phòng mêt uănh trong n’har bri”.

  Êng nau ƀư rƀŭn thôn, ƀon, ăp tahen biên phòng Pù Nhi hôm hăn jru, tâm dăch lơn tât tâm dâng, vay tâm rgop ma nŭih geh bu rnơm tâm ƀon lan tât ăp rnăk gay nkoch trêng, bonh đă ƀon lan ƀư tĭng ăp nau ntrŭnh bah pháp luật mpeh nau mât njrăng, hăn trong, njrăng ma tuý ndrel jut lơi ăp nau rluk mâl ơm, tâm gŭ ur sai ơm, tâm gŭ dăch dak mham; nkre nsum ty kơl an mât trong n’har bri. Geh râng du nar nkoch trêng nau mpeh pháp luật yor Đồn biên phòng Pù Nhi ƀư, yuh Sung Thị Xi, rnoi Mông, tâm xã Pù Nhi, nkoch mbơh:

 ‘Gâp rhơn ngăn rnôk ăp tahen biên phòng vay ƀư ăp nar nkoch trêng mpeh nau blau pháp luật. Nau aơ ueh ngăn yor hên rêh tâm nkuăl n’har bri, âk nŭih hăn ro ma trong teng, kơt nê lah tih pháp luật. Lah geh bu mhal ri mra khuch tât nau văng sa bah rnăk vâl. Êng nê ri rnơm gĭt mpeh pháp luật ma ăp nau ơm kŏ geh jăng lơi, jêh ri bu râng nau mât njrăng n’gâng ntăm ndrel ma tahen biên phòng”.

 Đah Đồn Biên phòng Nghĩa Thuận nkuăl Quảng Bạ, n’gor Hà Giang, mât rlau 20 rbăn km trong n’har bri, tâm 2 xã n’har bri, đah 18 thôn, tâm nê geh 8 thôn tâm dăch ma n’har bri. Ăp năm ma aơ, Đồn Biên phòng Nghĩa Thuận năl nau kan nkoch trêng pháp luật lah nkô̆ nau khlay, gay rgum n’hâm dăng bah nŭih ƀon lan râng mât nkuăl n’har bri bah neh dak, mât đăp mpăn chính trị, đăp mpăn nau rêh tâm nkuăl n’har bri.

  Lah nŭih rnoi mpôl đê̆ tâm nkuăl, Thượng uý Ly Mý Lùng, nŭih pah kan trinh sát bah đồn Biên phòng Nghĩa Thuận hŏ dŏng ăp nau nkoch trêng tâm dăch ma ƀon lan rnoi Mông, kơl an ƀon lan n’hao nau gĭt pháp luật, rgâl nau mĭn, nau kan, tă bah nê nsôih râng mât nkuăl n’har bri:

Đồn Biên phòng Nghĩa Thuận hŏ ƀư ueh nau nkoch trêng 3 nau ntrŭnh mbơh pháp lý bah trong n’har bri neh kơh Việt Nam-Trung Quốc. Luật Biên phòng Việt nam, ăp nau ntrŭnh geh tât nau kan bah phung tih dôih hình sự, tih hành chính ndrel ăp nau kan njrăng, rdâng nau ji ân ƀon lan tâm nkuăl n’har bri. Ngăn lah, tâm rgop ma gưl uỷ, n’gâng kan tâm nkuăl nkoch trêng mpeh nau ntrŭnh mrô 27 ndrel nau ntrŭnh mrô 9 bah n’gor mpeh nau jut jăng lơi nau rluk mâl ơm, nau vay mô ueh, nau tih, ndâk nau rêh ân ueh tâm ƀon lan ăp rnoi”./.