Bơi tât du pơh lor ma hăn tahen, jêng tahen ƀon lan, Tống Duy Nam, Phường Phúc Thành. Nkuăl ƀon têh Ninh Bình hŏ geh lăp Đảng, ton bah năp n’ha cờ Đảng, n’ha cờ neh dak. Nam lah ngoai tâm 177 bu mom hăn tahen geh gưl uỷ, n’gâng kan n’gor Ninh Bình ân lăp Đảng. Geh lăp Đảng lah du nau nsôih têh ngăn gay Nam rgop n’hâm ân neh dak:

 ‘Gâp geh lăp Đảng ri saơ rhơn ngăn, rhơn yor nơm lah ngoai tâm ăp nŭih geh lăp Đảng. Lăp tâm tahen ri gâp mra nsôih ân ueh chiăr nti săk nơm, chiăr ntĭng nau nchâp gay ma jêng nŭih tahen geh nau blau”.

 Kŏ tâm nau rhơn nê, 2 tahen mhe bah Thủ đô lah La Đức Thắng, Phường Hoàng văn Thụ, Quận Hoàng Mai ndrel Phạm Thế Anh, Phường Đông Ngạc, Quận Bắc Từ Liêm hŏ năl kloh lơn nau kan bah nơm tâm rnôk gŭ tahen ndrel nau ƀư kan jêh aơ. La Đức Thắng, nkoch:

‘Rnôk geh lăp Đảng kơt aơ, nau kan hăn ba kơi nê đŏng ƀư nơm ŭch geh ƀư nau kan kơl an ndrel kŏ ŭch mra jêng du hê nŭih Đảng viên geh nau blau tâm âk nau kan”.

 Phạm Thế Anh, Phường Đông Ngạc, Quận Bắc Từ Liêm, ri lah:

 “Gâp rhơn ngăn rnôk geh lăp đảng lor ma hăn ƀư tahen, gâp saơ săk gâp nơm ân geh nau nsôih, nsôih ân âk ndrel jêh lôch 12 khay geh nau ntul rlong ri săk gâp nơm geh jêng đảng viên ueh ân neh dak. Rnôk lăp tahen gâp ŭch chiăr nti ân ueh, ƀư jêh ăp nau kan geh jao”.

 Ăp druh ndăm geh lăp đảng lor ma hăn tahen lah ăp nŭih geh nau blau, mra ƀư nau kan tahen, geh nau mĭn, nau gơih đah nau kan tâm nkual, geh nau ŭch lăp tâm rmôt kan bah Đảng hŏ geh ăp gưl kan bah nkual kơl chiăr nti, rnglăp lăp. Aơ lah nau kan tâm dăch dơh ngăn bah cán bộ gưl kan tâm dâng, kơt lah nau nkoch bah wa Trần Duy Nhất, Kruanh UBND xã Gia Thịnh, nkuăl Gia Viễn, n’gor Ninh Bình:

‘Ntơm bah rnôk bôk năp, hên hŏ tâm mâp đah ăp druh ndăm kơl an ndrel druh ndăm leo trong geh nau mĭn ueh ndrel hŏ đă ăp druh ndăm nê hăn nti, kŏ rhơn lah năm aơ xã rnglăp geh 2 druh ndăm lor ma hăn lăp tahen. Gay đăp mpăn ăp nau dơi nchrăp ndrel nkô̆ nau nê, rnăk vâl tâm dâng, chi bộ kŏ kơl an, pơk trong ân ueh đŏng”.

Âk nkuăl kŏ năl nau kan hun hao đảng viên tâm druh ndăm lăp tahen lah du nau kan ueh, yơn lah rnoh nŭih druh ndăm dơi lăp đảng tâm ăp nkuăl lah êng êng. Nkuăl ƀon têh Hà Nội tâm rnôk săch kan năm 2024 hŏ rnglăp geh 15 druh ndăm hăn lăp tahen, geh rnoh đê̆ 0,4% rnoh druh ndăm hăn tahen, yơn 10% druh ndăm lăp tahen tă lôch nti Cảm tình Đảng. Đại tá Đào Văn Nhận, Groi Kruanh n’gâng kan Bộ Tư lệnh Thủ đô Hà Nội, mbơh:

 ‘Năm aơ, nkual ƀon têh kŏ rgum rđau kan, rđau đă geh ăp nhoat rgâl mhe, tâm nê 30 Quận, nkuăl kŏ geh ƀư ăp jrâu lăp ntĭm nti đảng ân công dân jêh rnôk khám săch, tŏng nau dơi gay hăn tahen, mra lăp tahen râng jrâu nti cảm tình Đảng. Rnôk aơ, tâm lam nkual ƀon têh geh 15 công dân geh lăp đảng lor ma hăn tahen”.

 Lăp nti, lăp đảng ân druh ndăm hăn tahen lah du nau ntrŭnh têh tâm âk nkual. Tĭng nau kơp ê tĭng ăp, ăp n’gor, nkual ƀon têh tâm lam dak hŏ rnglăp geh ma rhiăng đảng viên lah druh ndăm geh nau blau gay lăp hăn tahen. Aơ geh uănh lah du nau kan khlay, nchrăp, n’hao nau nâp chính trị tâm druh ndăm lăp tahen ndrel hôm pơk trong ân nau ntĭm nti, pă nŭih cán bộ ân ăp rmôt kan kŏ kơt lah ăp nŭih cán bộ tơm bah rmôt dân quân tự vệ, dự bị động viên tâm nkuăl jêh rnôk ƀư jêh nau kan bah tahen sĭt tâm nkuăl./.