Ta mpeh Tây Bắc bah n’gor Dak Lak, nkuâl Buôn Đôn geh 47 Km trong n’har bri đah dak Campuchia, geh rnoh âk 65.000 nuĭh, 29 rnoi nuĭh ndrel gŭ rêh. Ăp năm rlău aơ, ta nâm nău rđău kan bah Đảng, ƀon lan ăp rnoi mpôl đê̆ nkuâl Buôn Đôn hŏ tâm rnglăp rlău dơi ăp jêr jŏt, nsrôih hun hao wăng sa n’hao nău rêh, rdâk njêng n’har bri đăp mpăn, nâp dăng. Âk nghị quyết geh nău dơi đăt ndal bah Đảng bộ nkuâl hŏ lăp ngăn ngăn tâm nău rêh. Ntoh lư lah nghị quyết mpeh dăp rgum si tăm ndơ mât n’hanh rgâl mhe khoa học kỹ thuật tâm nău kan hŏ dơi an ƀư na nê̆ tât tĭng thôn ƀon.

Tân Hòa lah xã rêh ma du ntil nău kan tuch tăm, dơi rƀŏng tât hun hao wăng sa tơm  lah tăm tơm jong nar, tơm glêh nar nkre đah tăm rlŭ tơm sa play. Tât aƀaơ, trong rƀŏng dja hŏ dơi ƀư jêng ngăn ngăn ăp ntŭk tăm cam, quýt, play bŭng, play rba tĭng trong rƀŏng VietGAP, tŏng nău dơi tăch n’gluh; nkre ntrôl âk dŏng khoa học kỹ thuật tâm nău kan tuch tăm. Ăp năm bah năp nơh, nsĭt geh tăm tơm sa play ta xã geh kân mbrơi tă bah mô tŏng tơm dak tŏ tâm khay wai, yơn nkô̆ nău dja hŏ dơi nkra. Wa Ngô Xuân Nam, groi kruanh UBND xã Tân Hoà, nkuâl Buôn Đôn an gĭt:

Tuch tăm dơi geh nău ntuh kơl mât uănh bah ăp gưl tâm bah ri aơ nơh đăp mpăn tŏng ăp tơm dak tŏ jêng săk geh âk, rnoh hvi neh tăm đah ăp ntil tơm tăm âk geh hvi..  

Tĭng kruanh rđău kan xã Tân Hoà, nơm geh nău dăp rgum si tăm bôk năp nsĭt an geh uĕh jêng rĭng geh tĭng  bôk nuĭh bah xã hao ngăch oi, geh tât 36 rkeh prăk năm 2022  rlău trong nchrăp ndơ̆ luh 11%, hao 13,8% rđĭl đah năm 2021. Aơ lah ntŭk nsing gay Đảng bộ, n’gâng kan, ƀon lan xã Tân Hoà ntrôl dăng hun hao wăng sa tâm let năp tay.

Ndrel đah xã Tân Hoà, ăp năm mhe aơ păng rup wăng sa ta xã Ea Wer, nkuâl Buôn Đôn nar lơn ma chrat ang uĕh. Gay nău rêh nuĭh ƀon lan ta ntŭk hun hao, đảng bộ n’gâng kan xã hŏ uănh khlay ntop kơl nuĭh ƀon lan lơn âk lah rnăk ach o, rnăk dăch kêng ach o, rnăk geh nău rêh jêr jŏt tât dơi đah ăp tơm prăk manh bah ngân hàng chính sách xã hội n’hanh ăp tơm prăk ndop bah ăp bôk nău kan gưl neh dak. Tâm nê geh tơm prăk n’hŭch ach o jŏ jong nâp dăng gay ntuh kơl rgâl trong kan tuch tăm, hun hao ăp ntil si tăm ndơ mât tâm di n’hao nsĭt geh wăng sa, tĭng kơn klaih rlău ach o. yuh H’in Dy Niê, xã Ea Wer, nkuâl Buôn Đôn an gĭt:

Ntơm bah rnôk manh tơm prăk rnăk ach o ri gâp dŏng rnoh prăk nê tăm cà phê, rvăt phân poh, rvăt ndrôk gay mât rong aƀaơ nău rêh hŏ bah ir jêr jŏt n’hanh đăp mpăn lơn hôm”.

Tĭng wa Y A Toan Ênuôl, Bí thư huyện ủy Buôn Đôn, gay ntrŭt ntrôl hun hao wăng sa rêh jêng kon nuĭh ta ntŭk hun hao, n’hao nău rêh an nuĭh ƀon lan. Đảng bộ, n’gâng kan nkuâl hôm uănh khlay tât ăp tơm ndơ ntuh kơl gay hun hao buăt nthoi ndơ dŏng ntung trong, dak bât, điện, nhih nti. Aƀaơ ntung trong ta nkuâl Buôn Đôn bôk năp hŏ tŏng an nău ŭch geh rsong hăn, tuch tăm n’hanh tâm rsong tăch rgâl. Nău dja rgop tâm nău hun hao nsum bah n’gor. Năm 2022, rnoh ngăch hun hao wăng sa bah nkuâl geh 8%, nsĭt geh ngân sách tât n’hanh rlău rnoh ndơ̆ luh. Bôk nău kan rdâk njêng ƀon lan mhe dơi mât ŭanh rđău đă, lam nkuâl hŏ geh tât 90 rnoh ntil nău kan, rnoh âk rnăk ach o hŭch hôm 34%. Tâm let năp tay, Đảng bộ, n’gâng kan nkuâl n’har bri Buôn Đôn ntik n’hao tay nău khlay rđău kan, nchŏng đă tâm rdâk njêng ăp trong ntĭt leo hun hao wăng sa tâm di, mât dŏng săk geh ta ntŭk gay rdâk njêng nkual n’har bri nâp dăng. Wa YA Toan Ênuôl an gĭt:

Rgŏ jă ƀon lan tĭng ƀư ăp trong nchrăp gung trong bah đảng, trong kơl pháp luật bah ngih dak. Ndrel kan nsum đah ăp n’gâng kan tâm ban kơt mặt trận nsum mpôl gay ntrôl ngăch hun hao wăng sa rêh jêng kon nuĭh đăp mpăn njrăng n’gang neh dak rnă njrăng bah nkuâl tâm ban kơt bah nkual n’har bri đŏng”.

He mbra dơi saơ nơm geh ntik n’hao uĕh nău khlay rđău kan bah đảng n’hanh rgŏ rgum geh ăp tơm ndơ ntuh kơl, ntô̆ n’hao suan dăng tâm rnglăp ăp rnoi mpôl đê̆, gưl ủy, n’gâng kan n’hanh  ƀon lan ăp rnoi mpôl đê̆ nkuâl n’har bri Buôn Đôn dôl nsum suan, du nuih n’hâm rlău dơi ăp jêr jŏt, ntul rlong, nsrôih rdâk njêng nkual n’har bri Dak Lak nar lơn ma geh têh ndrŏng.